FDA អាមេរិកអនុញ្ញាតឲ្យប្រើថ្នាំលេបសម្រាប់ព្យាបាលជំងឺបាក់ទឹកចិត្តក្រោយសម្រាល

2023-08-08 07:18:12
ចំនួនមតិ 0 | ចំនួនចែករំលែក 0

រដ្ឋបាលចំណីអាហារ និងឱសថរបស់អាមេរិក (FDA) កាលពីសប្ដាហ៍មុនបានសម្រចអនុញ្ញាតឲ្យប្រើប្រាស់ឱសថសម្រាប់ព្យាបាលបញ្ហាបាក់ទឹកចិត្តក្រោយសម្រាលក្នុងប្រទេសរបស់ខ្លួនហើយ។ នេះបើតាមការចុះផ្សាយរបស់សារព័ត៌មាន CNN កាលពីថ្ងៃទី៥ ខែសីហា ឆ្នាំ២០២៣។

ជំងឺបាក់ទឹកចិត្តក្រោយសម្រាលត្រូវគេដឹងថាអាចកើតមានលើស្រ្តីម្នាក់ក្នុងចំណោមប្រាំពីរនាក់។ ជំងឺនេះជាជំងឺធ្ងន់ធ្ងរមួយដែលអាចគំរាមកំហែងដល់អាយុជីវិតស្រ្តី ដែលពួកគាត់អាចជួបប្រទះនឹងអារម្មណ៍សោកសៅ មានកំហុង ឬគិតថាខ្លួនគ្មានតម្លៃ ហើយក្នុងករណីធ្ងន់ធ្ងរវិញអាចឈានដល់ការធ្វើបាបខ្លួនឯង និងកូនផងដែរ។

ថ្នាំសម្រាប់ព្យាបាលជំងឺបាក់ទឹកចិត្តក្រោយសម្រាលនេះបានត្រូវប្រកាសឲ្យដាក់លក់ដោយក្រុមហ៊ុនឯកជន និងត្រូវលេបមួយថ្ងៃមួយគ្រាប់ក្នុងរយៈពេល១៤ថ្ងៃ។ ផលរំខានរបស់ឱសថនេះអាចធ្វើឲ្យវិលមុខ អង់កម្លាំង រាក ងងុយដេក និងមាន អាការៈដូចផ្ដាសាយ ដែលនេះជាផលរំខានមួយ មិនតម្រូវឲ្យអ្នកប្រើថ្នាំបើកបរ ឬធ្វើសកម្មភាពមួយចំនួនដែលអាចនាំឲ្យគ្រោះថ្នាក់។ បើតាមភ្នាក់ងារឱសថនេះ អ្នកប្រើប្រាស់ថ្នាំអាចបើកបរ ឬធ្វើការទាក់ទងនឹងគ្រឿងម៉ាស៊ីបានដរាបណាមានរយៈពេល១២ម៉ោងក្រោយប្រើថ្នាំនេះ។

បើតាមវិទ្យាស្ថានសុភាពផ្លូវចិត្តអាមេរិក បានប៉ាន់ប្រមាណថាទារកប្រហែលជា៤សែននាក់បានរស់នៅជាមួយម្ដាយមានជំងឺបាក់ទឹកចិត្តក្នុងមួយឆ្នាំៗនៅសរដ្ឋអាមេរិក។ ហើយថាបើមិនទៅទទួលការព្យាបាលទេ ជំងឺបាក់ទឹកចិត្តនេះអាចបន្តកើតមានលើស្រ្តីរាប់ខែ ឬឈានដល់ឆ្នាំក៏មាន។

ប្រភព៖ CNN ដោយ៖ ទូច សុខា