មុន​ ជា​ជំងឺ​ស្បែក​ដែលបណ្តាលមកពីខ្លាញ់ និងកោសិកាស្បែកងាប់ស្ទះក្នុងរន្ធញើស។ ភាគច្រើនវាកើតឡើងលើមនុស្សវ័យជំទង់ និងទើបពេញវ័យ ប៉ុន្តែក៏អាចកើតលើ​អ្នក​ស្ថិត​ក្នុង​វ័យ​ខុស​ពី​នេះ​ដែរ។

មុន មានច្រើនប្រភេទ ដែលបណ្តាលមកពីកត្តាផ្សេងៗគ្នា និងទាមទារឲ្យមានការព្យាបាលខុសៗគ្នាផងដែរ។

ថ្ងៃនេះកញ្ញា នឹងនាំហេ្វនៗមកដឹងអំពីប្រភេទ និងលក្ខណៈមុនខុសៗគ្នារបស់​មុន​ដើម្បីឲ្យហ្វេនបានស្គាល់ និងស្វែងរកវិធីព្យាបាលឲ្យបានសមស្រប។

មុនក្បាលខ្មៅ៖ ជាប្រភេទមុនដែលគេស្គាល់ច្រើនជាងគេ ដោយសារភាពងាយស្រួលក្នុងការចំណាំ និងការកើតឡើងញឹកញាប់។ មុន​ប្រ​ភេទ​នេះ​កើត​ឡើង​ដោយសារតែការស្ទះនៃរន្ធញើស ដោយសារខ្លាញ់ និងកោសិកាចាស់ៗដែលងាប់។

មុនក្បាលខ្មៅ វិវត្ត​មក​ពី​រន្ធញើសដែលបើកចំហនៅលើផ្ទៃស្បែក ហើយត្រូវបានបំពេញដោយប្រេងលើស និងកោសិកាស្បែកងាប់។

មនុស្សមួយចំនួនយល់ច្រឡំថា មុននោះខ្មៅដោយសារធូលី ឬសារធាតុកខ្វក់។ តាមពិត វាបណ្តាលមកពី សារជាតិមេឡានីននៃស្បែក​ត្រូវ​បានធ្វើអុកស៊ីតកម្ម និង​ប្រែ​ក្លាយ​រន្ធ​ញើស​ដែល​ស្ទះទៅជា​មាន​ពណ៌​ខ្មៅ។

មុនក្បាលស៖ មុនដែលបិទមុខជិត ហើយមានក្បាលសៗ មានឈ្មោះថាមុនក្បាលស ។ វាកើតឡើងនៅពេលដែលប្រេង និងកោសិកាស្បែកទៅស្ទះនៅរន្ធញើសហើយរារាំងរន្ធញើសនោះមិនឲ្យបើក។ អ្នកមានមុនក្បាលស និងក្បាលខ្មៅ អាចរកទិញថ្នាំ ឬផលិតផលដែលគ្មានវេជ្ជបញ្ជាដើម្បីធ្វើការព្យាបាលបាន ព្រោះផលិតផលទាំងនោះក៏មានប្រសិទ្ធភាពក្នុងការព្យាបាលមុនក្បាលសដែរ។ យ៉ាងណា​បើ​ស្ថាន​ភាព​មុន​គួរ​ឲ្យ​បារម្ភ គួរ​ប្រឹក្សា​ជាមួយ​គ្រូពេទ្យ​សើស្បែក​។​

មុនខ្ទុះ៖ ជាមុនធំ ដែលមានខ្ទុះ ដែលមើលទៅស្រដៀងនឹងដំបៅ។ មុន​ខ្ទុះបង្កឲ្យមានការឈឺចាប់ ហើយគួរទៅទទួលការព្យាបាលដោយគ្រូពេទ្យជំនាញខាងសើស្បែក ព្រោះមុន​នេះក៏អាចបណ្តាលឲ្យមានស្នាមលើស្បែក​ផងដែរ។ មុន​ខ្ទុះត្រូវបានចាត់ទុកថាមានមុនកម្រិតធ្ងន់ធ្ងរ។

តើហ្វេនៗមានមុនប្រភេទមួយណាដែរ? ប្រសិនបើមានមុនដែលស្ថិតក្នុងកម្រិតធ្ងន់ធ្ងរ គួរតែទៅពិគ្រោះនឹងអ្នកជំនាញសើរស្បែក ដើម្បីទទួលការព្យាបាលឲ្យទាន់ពេលវេលា។