ការមានផ្ទៃពោះ ឬកាេពពោះ ជាបទពិសោធន៍​ដ៏​អស្ចារ្យ​មួយ​សម្រាប់​ស្រី​ៗ​យើង ដែល​រួម​ផ្សំ​ជាមួយ​នឹង​ភាព​រំភើប​រីករាយ លាយឡំនិង​ស្រ្តេស​ក្នុង​ដំណើរ​ការ​មួយ​នេះ។ ជាការពិត​ណាស់​ ប៉ាៗម៉ាក់​ៗត្រូវ​យក​ចិត្ត​ទុក​ដាក់ខ្លាំងក្នុងការថែទាំសុខភាព ទាំង​គិតលើ​របប​អាហារ ដំណេក ការ​ប្រើ​ថ្នាំ ការតាមដានសុខភាពជាមួយវេជ្ជបណ្ឌិត និង​សុខភាព​ផ្លូវ​ចិត្ត​គ្រប់​ត្រី​មាស​ទាំង​អស់ ដើម្បី​បញ្ចៀស​ផលវិបាក​ផ្សេង​ៗ។

ដូច្នេះ​ហើយ ដើម្បី​ឲ្យ​ការ​ពពោះ​វិវត្តដោយ​រលូន និង​មាន​​សុវត្ថិភាព​គ្រប់​ត្រី​មាស​ទាំងអស់ក្រៅពីរឿងខាងលើនេះ ការយល់ដឹងពីលំហាត់ប្រាណក្នុងកំឡុងពេលពពោះក៏ជារឿងសំខាន់ផងដែរ។

គន្លឹះ១០ចំណុច ដែលអ្នកម្តាយគួរដឹងនៅពេលហាត់ប្រាណអំឡុងពេលមានផ្ទៃពោះ៖

១. ជៀសវាងការហាត់ប្រាណបែបហក់លោត ឬកាយវិការដែលអាចបង្កឲ្យដួល ឬហាត់ប្រាណនៅក្នុងបរិយាកាសក្តៅ។ ២. ផ្លាស់ប្តូរកាយវិការហាត់ប្រាណមួយៗយឺតៗតាមសម្រួល កុំបង្ខំ។ ៣. កុំខំប្រឹងហាត់ប្រាណឲ្យហួសកម្រិតរបស់ខ្លួន។ ៤. មិនគួរហាត់ប្រាណដោយដេកដាក់ខ្នងនៅនឹងផ្ទៃរាប។ ៥. ផឹកទឹកឲ្យបានគ្រប់គ្រាន់ ជាការល្អ គួរផឹកទឹកមុនពេលចាប់ផ្តើមហាត់ប្រាណ ពេលកំពុងហាត់ប្រាណ និងបន្ទាប់ពីហាត់ប្រាណរួច ។ ៦. ត្រូវឈប់ហាត់ប្រាណភ្លាម បើមានអារម្មណ៍ថាឈឺក្បាល វិលមុខ ចង់ក្អួត អស់កម្លាំង។ ៧. បើមិនច្បាស់នឹងកាយវិការហាត់ណាមួយ ត្រូវពិគ្រោះជាមួយគ្រូពេទ្យ ឬអ្នកជំនាញ ៨. ការហាត់ប្រាណនៅពេលនេះគឺដើម្បីឲ្យមានសុខភាពល្អ មិនមែនដើម្បីរាងស្អាតនោះទេ។ ៩. ការហាត់ប្រាណដោយដើរ ជាវិធីងាយបំផុត និងធ្វើឲ្យមានអារម្មណ៍ស្រស់ស្រាយ។ ១០. ហាត់ប្រាណមួយភ្លេតៗរៀងរាល់ថ្ងៃ មានប្រយោជន៍ជាងហាត់ប្រាណម្តងច្រើនម៉ោង ប៉ុន្តែយូរៗទើបបានហាត់ម្តង។

ចុចអានបន្ត៖ ស្ត្រីមានផ្ទៃពោះមិនគួរទម្លាប់៤យ៉ាងនេះដែលអាចជះផលអាក្រក់ដល់ទារកពេលកើត

ប្រភព៖ មន្ទីរពហុព្យាបាល និងសម្ភពសោភា