ការ​លេង​កីឡា បាន​ជួយ​ដល់​សុខភាព និង​កាយ​សម្បទា​របស់​កុមារ​បាន​យ៉ាង​ច្រើន។ ប៉ុន្តែ​​បើយោង​តាម​ការ​សិក្សា​ឃើញ​ថា ​មាន​​កុមារី និង​​ក្មេង​ស្រី​តិច​ណាស់​ដែល​ចាប់​អារម្មណ៍​លើ​វិស័យ​មួយ​នេះ​។ ​

​ផ្អែក​តាម​ការ​សិក្សា​ស្រាវជ្រាវ​​ពី Women in Sport and the Youth Sport Trust ​(WSYS) ​មាន​ក្មេងស្រី 56% ​ប៉ុណ្ណោះ​ ដែល​ចាប់​ផ្តើម​សកម្មភាព​កីឡា​បើ​ធៀប​នឹង​ក្មេង​ប្រុស 71% ​ហើយ​ក្នុង​នោះ 45% នៃ​ក្មេង​ស្រី​មើល​ឃើញពី​ភាព​សំខាន់​នៃ​ការ​អប់​រំ​កាយ បើ​ធៀប​នឹង​ក្មេង​ប្រុស 60%។ អ្វី​ដែល​កាន់​តែ​ភ្ញាក់​ផ្អើល​ទៀត​នោះ ​ក្មេង​ស្រី​ចាប់​ពី​អាយុ​​៧ឆ្នាំ ​​បាត់​បង់​ចំណាប់​អារម្មណ៍​លើ​​ការ​លេង​កីឡា​គួរ​ឲ្យ​កត់សម្គាល់។

អាស្រ័យ​ហេតុ​នេះ​ហើយ ​ការ​លើក​​ទឹក​ចិត្ត និង​ជម្រុញ​បន្ថែម​ដល់​​ក្មេង​ស្រី​ ក្នុង​វិស័យ​កីឡា​ ជា​រឿង​សំខាន់​និង​មិន​គួរ​មើល​រំលង ឲ្យ​ដូច​ជា​ក្មេង​ប្រុស​ដែរ។ មួយ​​វិញ​ទៀត ​ការ​ផ្សព្វផ្សាយ​ មិន​ថា​តាម​ទី​សាធារណៈ​ក៏​ជួយ​​មួយ​ផ្នែក​ផង​ដែរ ដើម្បី​ឲ្យ​ក្មេងស្រី​កាន់​តែ​យល់​ច្បាស់​ថា ​ការ​រីក​ចម្រើន​​លើ​កាយ​សម្បទា​គឺ​ជា​​ប្រយោជន៍​មួយ​ដែល​បាន​ពី​កីឡា។ ​មិន​តែ​ប៉ុណ្ណោះ ​ក៏​ត្រូវ​មាន​ការ​ណែនាំ​ បង្ហាញ​ពី​ស្នាដៃ គំរូ ឬ​ទេពកោសល្យ​របស់​អត្តពលិក​ឆ្នើម ឬ​កីឡាការីនី​ល្បីៗ​ដូច​ជាកីឡា​ហែល​ទឹក ​បាល់​ទាត់… ​ដែល​ធ្លាប់​ឈ្នះ​មេដាយ​ ដល់​មហាជន​ឲ្យ​បាន​ស្គាល់។ ​លើស​ពី​នេះ ​ក៏​ត្រូវ​មាន​សារ​​ជា​គំរូ​បន្ថែម​ដើម្បី​ជម្រុញ​ឲ្យ​ក្មេង​ស្រី​កាន់​តែ​ចាប់​អារម្មណ៍​លើ​កីឡា​ផ​ង​ដែរ។

ដូច្នេះ​ហើយ ​ការ​បំផុស​លើ​ក្មេងស្រី​ឲ្យ​មើល​ឃើញ​ពី​គុណ​បប្រយោជន៍​នៃ​ការ​លេង​កីឡា ​ដែ​ល​ពាក់​ព័ន្ធ​នឹង​កាយ​សម្បទា ​​ដាច់​ខាត​ត្រូវ​តែ​មាន ពិសេស​កុមារី​អាយុ​​ចាប់​ពី​៧ឆ្នាំ។ ក្រៅ​ពីនេះ ​នៅ​តាម​ស្ថាប័ន ឬសាលា​រៀនគួរ​មាន​សកម្មភាព​ ឬ​ការ​ប្រកួត​កីឡា​ មួយ​សប្តាហ៍​ម្តង ឬ​ច្រើន​ជាង​នេះ ​ដែល​ជួយ​បង្កើន​ការ​ចូល​រួម​របស់​ក្មេង​ស្រី​ក្នុង​វិស័យ​នេះ​រយៈពេល​យូរ៕

ប្រសិនបើអ្នកចាប់អារម្មណ៍កម្មវិធីជុំរុំបាល់ទាត់នារីដំបូងបង្អស់នៅកម្ពុជា អាចណែនាំប្អូនស្រី ក្មួយស្រី កូនស្រី របស់អ្នកមានអាយុ ៦ -១២ឆ្នាំ ចូលរួមចុះឈ្មោះជាមួយ GO FC តាមដំណនេះ Link សូមបញ្ជាក់ កម្មវិធីជំរុំបាល់ទាត់ នឹងរៀបចំនៅថ្ងៃ ២៩ ឧសភា ម៉ោង ៤- ៦:៣០ល្ងាច នៅទីលាន CIS Roller Dome។ ចុះឈ្មោះមុន ដើម្បីចូលរួមវគ្គហ្វឹកហាត់ជាមួយ GO FC ៕ ​​