Bang Si Hyuk គឺ​ជា​បុគ្គល​គ្រប់គ្រង​កំពូល​ក្រុម​ចម្រៀង​ប្រុស​កូរ៉េ BTS និង​ជា​ផលិតករ​ជួរ​មុខ​នៅ​ប្រទេស​កូរ៉េ។ កាល​ពី​ថ្ងៃ​ទី ២៥ ខែ​មេសា​មុន​នេះ បណ្ដាញ​ព័ត៌មាន JoongAng Ilbo បាន​រាយការណ៍​ថា តម្លៃ​ភាគហ៊ុន​នៃ​សហព័ន្ធ​ក្រុមហ៊ុន​កម្សាន្ត​ខ្នាត​យក្ស​កាន់​តែ​ឡើង​ថ្លៃ ក្រោយ​ពេល ក្រុម​ចម្រៀង​ប្រុស​ល្បី​ឈ្មោះ BTSបាន​ជាប់​បេក្ខភាព​ក្នុង​កម្មវិធី​ប្រគល់​ពាន​រង្វាន់ Grammy។

ប្រភព​ដដែល​បាន​ឲ្យ​ដឹង​ថា បុគ្គល​ដែល​ទទួល​បាន​​ការ​សរសើរ​ច្រើន​បំផុត​នោះ​គឺ លោក Bang Si Hyuk អ្នក​គ្រប់គ្រង​របស់​ក្រុម​ចម្រៀង​ខាង​លើ។ យ៉ាងណាក្ដី មនុស្ស​ជា​ច្រើន​មិន​ដឹង​​ឡើយ​ថា ទម្រាំ​ឈាន​ដល់​ចំណុច​កំពូល​ខាង​លើ ផលិតករ​អាយុ ៤៩​ឆ្នាំ​បាន​ឆ្លង​កាត់​ភាព​លំបាក​ជា​ខ្លាំង។

ដោយនៅ​ឆ្នាំ ១៩៩០ លោក​បាន​ប្រលង​ក្នុង​កម្មវិធី​​និពន្ធ​ចម្រៀង​មួយ​ ហើយ​​បាន​ជាប់​លេខ​៣។ បន្ទាប់​មក​លោក​ត្រូវ​បាន​ផលិតករ JYP រក​ឃើញ​ និង​មក​ធ្វើ​ការ​នៅ​ផលិតកម្ម​នេះ ហើយ​មាន​រហស្សនាម​ថា Hitman Bang។ ឆ្នាំ ២០០៥ លោក​សម្រេច​បើក​ផលិតកម្ម Big Hit របស់​ខ្លួន​ឯង តែ​ក្រុមហ៊ុន​ជិត​ក្ស័យធន នៅ​ឆ្នាំ ២០០៧ មុន​ពេល​ក្រុម​ចម្រៀង 8Eight និង 2AM ជួយ​សង្គ្រោះ។ ឆ្នាំ​២០១០ លោក​មាន​គម្រោង​បង្កើត​ក្រុម BTS និង​ត្រូវ​បាន​បង្ហាញ​មុខ​ជា​ផ្លូវ​ការ​នៅ​ឆ្នាំ ២០១៣។

ឆ្នាំ ២០១៧ ក្រុមហ៊ុន​រក​បាន​ប្រាក់​ចំណេញ ២២.៩​លាន​ដុល្លារ​ជា​លើក​ដំបូង។ នៅ​ពេល BTS​ ចាប់​បាន​ល្បី​ឈ្មោះ​ជាង​មុន Big Hit ចាប់​ផ្ដើម​ទិញ​ក្រុមហ៊ុន​ដទៃ​ទៀត​ដូច​ជា Pledis, Zico Koz, Source Music និង YG Plus ជាដើម។

បន្ទាប់​មក​ក្រុមហ៊ុន​បាន​ប្ដូរ​ឈ្មោះ​ទៅ​ជា​សហព័ន្ធ HYPE និង​ត្រូវ​ដាក់​លើ​ទីផ្សារ​ភាគហ៊ុន ហើយ​មាន​តម្លៃ ៧.៦​ពាន់​លាន​ដុល្លារ ដោយ​ភាគហ៊ុន​មួយ​មាន​តម្លៃ ២៣៥​ដុល្លារ។ ភាគហ៊ុន​ចំនួន ៤៧៨៦៩៥ ក៏​ត្រូវ​បាន​ចែក​ដល់​សមាជិក​ទាំង​៧​ខាង​លើ។ ទ្រព្យ​សរុប​របស់ Bang Si Hyuk ត្រូវ​បាន​ប្រមាណ​​​សរុប​ចំនួន ៣​ពាន់​លាន​ដុល្លារ។ លោក​ជា​អ្នក​មាន​ជាង​គេ​ទី​១៦ នៅ​ប្រទេសកូរ៉េ។ កាល​ពី​ឆ្នាំ ២០២១ HYPE ​បាន​ទិញ​ផលិតកម្ម Ithaca Holdings ដែល​ជា​អ្នក​គ្រប់គ្រង​កំពូល​តារា​ដូច​ជា Ariana Grande និង Justin Bieber៕