ការធ្វើការងារនៅកន្លែងដែលមានការប្រកួតប្រជែងខ្លាំងគឺជារឿងដ៏ល្អសប្រាប់អ្នក ពីព្រោះខិតខំព្យាយាមបំពេញកាតព្វកិច្ចជាបុគ្គលិកល្អ និងចង់បង្ហាញខ្លួនឯងថាអ្នកគឺពូកែនឹងជាបុគ្គលិកឆ្នើមរបស់ក្រុមហ៊ុន។ ការខិតខំប្រឹងប្រែងធ្វើការងារគឺដើម្បីបំពេញតម្រូវការរបស់ក្រុមហ៊ុន ក៏ដូចជាការបង្កើនមុខជំនាញរបស់ខ្លួនបានយ៉ាងល្អប្រសើរផងដែរ។

ទាំងអស់នេះមិនថាអ្នកកំពុងតែធ្វើការពីផ្ទះ ឬនៅការិយាល័យក៏ដោយនៅពេលនិយាយដល់ពាក្យថាការញៀននឹងការងារគឺមិនសំដៅទៅលើរឿងអាក្រក់នោះទេ តែវាអាចនាំអ្នកទៅរកបញ្ហាសុខភាពមួយចំនួនដោយមិនដឹងខ្លួនដូចជាការគេងមិនលក់ ឬគេងមិនបានគ្រប់គ្រាន់ និងផលប៉ះពាល់មួយចំនួនទៀតទៅនឹងជីវិតរស់នៅប្រចាំថ្ងៃ។

អ្នកអាចដឹងបានថាអ្នកកំពុងតែញៀននឹងការងារឬអត់ដោយផ្អែកទៅលើចំណុចគោលៗទាំង ៥ ខាងក្រោមនេះ៖

• អ្នកមានអារម្មណ៍ថាមិនស្រណុកចិត្ត ឬស្ត្រេសរាល់ពេលដែលអ្នកទំនេរមិនមានការងារធ្វើ
• អ្នកតែងតែយកការងារមកបន្តឬបញ្ចប់វានៅឯផ្ទះ (និងធ្វើគ្មានម៉ោងសម្រាកបើកំពុងតែធ្វើការពីផ្ទះ)
• សុខភាពរាងកាយរបស់អ្នកមិនល្អ ដោយសារការមិនហាត់ប្រាណ ការញ៉ាំអាហារដែលគ្មានសារធាតុចិញ្ចឹម និងការបោះចោលនូវទម្លាប់គេងតាមម៉ោងជាដើម
• អ្នកតែងតែចាប់ធ្វើការលឿននឹងនៅធ្វើការយូរជាងគេ ហើយអ្នកនៅតែបន្តចូលមើលអ៊ីម៉ែលឬការងារទៀតនៅពេលណាដែលអ្នកទំនេរ
• នៅពេលដែលអ្នកគិតថាមានតែការងារទេដែលអាចបំបាត់ ឬជួយព្យាបាលនៃការឈឺចាប់បានទៅលើកំហុសឆ្គង ស្ត្រេសដែលបណ្ដាលមកពីស្នេហា គ្រួសារ និងបញ្ហាជីវិត

អ្នកដែលឈានដល់ការញៀននៃការងារជាទូទៅគឺតែងតែចំណាយពេលតែម្នាក់ឯងជាមួយនឹងកុំព្យូទ័រដើម្បីបន្តធ្វើការ។ អ្នកនឹងគ្មានពេលជាមួយក្រុមគ្រួសារ មិត្តភក្ដិ គ្មានពេលហាត់ប្រាណ ឬមិនមានពេលចម្អិនម្ហូបសុខភាព ហើយអ្នកនឹងផ្ដាច់ចេញពីជីវិតបណ្តាញសង្គម និងនៅតែជាមួយការងារតែប៉ុណ្ណោះ៕

ចុចអានបន្ត៖ កំហុសឆ្គង ៥ យ៉ាងនៃភាសាកាយវិការដែលធ្វើឲ្យអ្នកដទៃវាយតម្លៃអ្នកខុស