នៅក្នុងទំនាក់ទំនងស្នេហា ការប្រើនឹងបង្ហាញនៃសេចក្ដីស្រឡាញ់រវាងដៃគូនីមួយៗគឺមានភាពខុសៗគ្នា។ ដៃគូខ្លះមិនសូវជាប្រើភាសានៃក្ដីស្រឡាញ់ច្រើនទេ តែគាត់បង្ហាញវាតាមរយះសកម្មភាពប្រចាំថ្ងៃរបស់គាត់ ខណៈពេលដែលដៃគូខ្លះទៀតធ្វើសកម្មភាពតិចបំផុត ប៉ុន្តែគាត់ប្រើភាសាស្នេហានឹងភាពផ្អែមល្ហែមច្រើន។

សូមកុំគិតឲ្យសោះថាភាសានៃក្តីស្រឡាញ់ "អូនស្រឡាញ់បងឬបងស្រឡាញ់អូន" គឺគ្រាន់តែជាការនិយាយទៅកាន់ដៃគូនោះ តាមពិតវាប្រៀបបានដូចជាភាសាកាយវិកាអញ្ចឹង។ ការប្រើភាសានៃក្ដីស្រឡាញ់ជាមួយដៃគូសង្សារ ឬស្វាមីភរិយារបស់អ្នកជាប្រចាំនឹងអាចជួយឲ្យអ្នកយល់ដឹងច្បាស់អំពីអារម្មណ៍របស់ដៃគូអ្នកបានកាន់តែច្រើនជាងមុន ពីព្រោះវាមិនមែនត្រឹមតែជាការនិយាយប៉ុណ្ណោះទេ ប៉ុន្តែវាជាការបញ្ចេញ និងបង្ហាញអំពីក្តីស្រឡាញ់របស់អ្នកទៅកាន់គាត់។

ទាំងនេះគឺជាភាសានៃក្តីស្រឡាញ់ ៥ យ៉ាងដែលអ្នកគួរតែប្រើ និងបង្ហាញវាជាមួយដៃគូរបស់អ្នកឲ្យបានញឹកញាប់៖

១. សេចក្តីស្រឡាញ់នឹងការសរសើរដែលចេញពីក្នុងចិត្ត ទាំងការគិតនឹងការនិយាយចេញមកថាអូនស្រឡាញ់បង ឬបងស្រឡាញ់អូនឲ្យបានជាប្រចាំ។

២. សកម្មភាពនៃការជួយ អ្នកខ្លះមិនសូវពូកែក្នុងការនិយាយ តែអ្នកអាចជួយធ្វើការងារគ្រប់យ៉ាងដោយមិនចាំបាច់សួរឬសុំពីដៃគូ ធ្វើវាដោយស្ម័គ្រចិត្ត ដោយក្តីស្រឡាញ់

៣. ការទទួលបានកាដូ មិនចាំបាច់ថ្ងៃពិសេស ឬបុណ្យទានអ្វីឡើយ ជាផ្កាមួយទង នំ ឬផ្លែឈើដែលគាត់ចូលចិត្តយកមកឲ្យ វានឹងធ្វើឲ្យដៃគូសប្បាយចិត្ត និងស្រឡាញ់អ្នកកាន់តែខ្លាំង

៤. ពេលវេលាគ្រប់គ្រាន់ឲ្យគ្នា ការចំណាយពេលជាមួយគ្នាគឺជាអ្វីដែលដៃគូចង់បានបំផុត ទុកទូរសព្ទចោលហើយមើលទូរទស្សន៍ជាមួយគ្នា ចម្អិនម្ហូប ឬដើរលេងក្នុងសួនកំសាន្តជាមួយគ្នាជាដើម

៥. ការផ្តល់ចំណង់ផ្លូវភេទ កុំនិយាយឲ្យសោះថាផ្លូវភេទមិនសំខាន់ សំខាន់នោះគឺសេចក្តីស្រឡាញ់! ការពិតនោះវាគឺជារឿងដ៏សំខាន់បំផុតសម្រាប់ជីវិតដៃគូ

នៅពេលដែលអ្នកទាំងពីរមានការយល់អំពីអត្ថន័យទៅលើភាសានៃក្ដីស្រឡាញ់ វានឹងអាចជួយធ្វើឲ្យទំនាក់ទំនងស្នេហារបស់អ្នកទាំងពីរបានប្រសើរឡើង និងមានសុភមង្គល។ ដូច្នេះសម្រាប់ដៃគូណាដែលមិនសូវបានប្រើភាសានៃក្ដីស្រឡាញ់នេះ គួរតែគិតគូរខិតខំព្យាយាមធ្វើរឿងទាំងនេះឡើង ដើម្បីឲ្យទំនាក់ទំនងស្នេហារបស់អ្នកពោពេញទៅដោយសេចក្ដីស្រឡាញ់៕

ប្រភពរូបភាព៖ Pinterest

ចុចអានបន្ត៖

• សញ្ញាទាំង ៨ យ៉ាងនេះប្រាប់អ្នកថា អ្នកគួរតែបញ្ចប់ទំនាក់ទំនងស្នេហារបស់អ្នកទៅ
• សញ្ញា ៧ យ៉ាងបញ្ជាក់ថាដៃគូអស់ចំណាប់អារម្មណ៍ចំពោះអ្នក