ការស្វែងរកសុភមង្គលរបស់មនុស្សម្នាក់ៗគឺជារឿងសំខាន់ក្នុងជីវិត ហើយការស្វែងរកនោះវាអាស្រ័យទៅតាមបុគ្គលម្នាក់ៗទៅលើអ្វីដែលពួកគេចង់បានជាគោលដៅរបស់ពួកគេសម្រាប់ថ្ងៃអនាគត។ បទពិសោធន៍នៃ “សុភមង្គល” វាត្រូវាបានបង្ហាញឡើងចេញជាច្រើនទម្រង់ ហើយក៏អាស្រ័យទៅតាមឥរិយាបថ និងកាលៈទេសៈផ្សេងៗគ្នាផងដែរ។

សុភមង្គលមានច្រើនទម្រង់ ច្រើនរូបភាពផ្សេងៗគ្នា ហេតុដូចច្នេះហើយបានជាមនុស្សនៅតែមិនមានភាពសប្បាយចិត្តគ្រប់ពេលនោះ ដោយសារតែអ្នកមានមួយ អត់មួយនៃប្រភេទសុភមង្គលនោះ។ អ្នកគួរព្យាយាមស្វែងយល់ថា តើអ្នកខ្វះអ្វីនៅក្នុងជីវិតរស់នៅ ហើយខិតខំស្វែងរកវាមកដាក់ក្នុងខ្លួន។

ទាំងនេះគឺជាប្រភេទសុភមង្គលដែលអ្នកគួរតែមានសម្រាប់ខ្លួនឯង ហើយប្រភេទនៃសុភមង្គលទាំងនោះរួមមាន៖

១. សេចក្តីត្រេកអរ រីករាយ ជាអារម្មណ៍ដែលបានមកពីការឲ្យតម្លៃ ការកោតសរសើរទៅលើអ្វីៗដែលខ្លួនកំពុងតែមានបាន ឬទទួលវាបានតាមរយៈការគិតនឹងអកប្បកិរិយាវិជ្ជមានរបស់អ្នក ហើយវិធីដែលងាយនោះគឺធ្វើអ្វីៗដែលអ្នកចូលចិត្ត។

២. សេចក្ដីរំភើបសប្បាយចិត្ត វាមានភាពស្រដៀងគ្នាជាមួយនឹងភាពត្រេកអរដែរ គ្រាន់តែថាវាមានរយះពេលយូរជាង វាជាប្រភេទអារម្មណ៍នៃការជំរុញលើកទឹកចិត្តឲ្យអ្នកមានការខិតខំប្រឹងប្រែងកាន់តែខ្លាំងដើម្បីទទួលបានភាពសប្បាយចិត្តនោះ។

៣. សេចក្ដីដឹងគុណ វាងាយនឹងបាត់បង់ទៅណាស់ប្រសិនបើអ្នកមិនមានការយកចិត្តទុកដាក់ និងព្យាយាមប្រើវាជាប្រចាំនោះ វាគឺជាផ្នែកសំខាន់បំផុតនៃសុភមង្គល ហើយការធ្វើវាជាប្រចាំនឹងធ្វើឲ្យអ្នកទទួលបានភាពរីករាយ និងមានសុខភាពល្អជាងអ្នកដែលមិនចេះដឹងគុណនូវអ្វីដែលខ្លួនមានបាន។

៤. សេចក្ដីស្រឡាញ់ មិនថាជាស្នេហារ ឬការស្រឡាញ់ខ្លួនឯងឡើយ វាជាប្រភពនៃសេចក្ដីសុខនឹងសុភមង្គលដែលបានមកពីសេចក្តីស្រឡាញ់នោះ ហើយទាំងពីរគឺចាំបាច់ណាស់ក្នុងជីវិតរស់នៅរបស់អ្នក។ សេចក្ដីស្រឡាញ់ទទួលបានពីមនុស្សជុំវិញអ្នក ក្រុមគ្រួសារ មិត្តភក្តិ ដៃគូស្នេហា និងសត្វចិញ្ចឹមសុទ្ធតែជាប្រភពនៃក្តីស្រឡាញ់ដែលផ្ដល់ឲ្យអ្នកនូវសុភមង្គលគ្មានទីបញ្ចប់។

ភាពសុទិដ្ឋិនិយម ការពេញចិត្ត និងការមានអារម្មណ៍ថាមានសំណាងចំពោះអ្វីដែលខ្លួនមាននៅក្នុងជីវិតសព្វថ្ងៃគឺជាវិធីក្នុងការទទួលយកសុភមង្គលមកដាក់ខ្លួន។ មនុស្សដែលមានភាពសុទិដ្ឋិនិយមមានទំនោរផ្តោតទៅលើរឿងល្អៗនឹងភាពវិជ្ជមានដែលមានការរួមបញ្ចូលគ្នានៃការដឹងគុណ សេចក្ដីស្រឡាញ់ និងភាពសប្បាយរីករាយក្នុងជីវិតរបស់ពួកគេ៕

ប្រភពរូបភាព៖ Pinterest

ចុចអានបន្ត៖

• ៤ វិធីដើម្បីក្លាយជាមនុស្សដ៏ល្អប្រសើរម្នាក់នៅក្នុងសង្គម
• របៀបរស់នៅឲ្យសប្បាយចិត្តខណៈពេលកូវីដកំពុងរាលដាលខ្លាំង