ចាំណា! ស្និទ្ធខ្លាំង ស្រឡាញ់ខ្លាំង ឈឺចាប់ក៏ខ្លាំង មិនថាគូស្នេហ៍ មិត្តភក្តិ ឬសាច់ញាតិនោះទេ
- 2021-06-23 08:18:00
- ចំនួនមតិ 0 | ចំនួនចែករំលែក 0
ចាំណា! ស្និទ្ធខ្លាំង ស្រឡាញ់ខ្លាំង ឈឺចាប់ក៏ខ្លាំង មិនថាគូស្នេហ៍ មិត្តភក្តិ ឬសាច់ញាតិនោះទេ
គម្លាតកាន់តែជិត ការឈឺចាប់ក៏ប្រឈមមុខខ្ពស់ដូចគ្នា មិនថាជាស្នេហា មិត្តភក្តិនោះទេ ព្រោះនៅពេលអ្នកកាន់តែជិតដិតខ្លាំង កំហុសក៏កាន់តែមានច្រើន ហើយភាពប្រេះស្រាំគឺងាយកើតឡើងបំផុត។ លើសពីនេះក៏មានពាក្យអប់រំមួយឃ្លានិយាយថា«រំពឹងកាន់តែខ្ពស់ ការខកចិត្តកាន់តែខ្លាំង» ពេលខ្លះវាពិតជាមិនខុសមែន ព្រោះនៅពេលអ្នករំពឹង ជឿជាក់អ្នកណាម្នាក់អស់ពីខ្លួនខ្លាំងពេក អ្នកអាចស្លាប់ចិត្តដោយសារគេក៏មាន។
ចំពោះមនុស្សជុំវិញខ្លួន ទោះអ្នកស្រឡាញ់គេខ្លាំងប៉ុណ្ណាក៏ដោយក៏កុំស្និទ្ធខ្លាំងពេក គួរតែមានគម្លាតខ្លះទើបអាចរក្សាវាបានយូរអង្វែង។
១. រវាងស្វាមីភរិយា គួរតែទុកចន្លោះតូចមួយ
ប្ដីប្រពន្ធមានទំនាក់ទំនងស្និទ្ធស្នាលណាស់តែវាមិនមែនមានន័យថាគ្មានអាថ៌កំបាំងរវាងអ្នកទាំងពីរនោះទេ។ជាពិសេសនៅពេលដែលប្តីឬប្រពន្ធរបស់អ្នកមានការចាប់អារម្មណ៍ផ្សេងគ្នានៅក្នុងចំណង់ចំណូលចិត្ត មិនត្រូវបង្ខិតបង្ខំឱ្យអ្នកដទៃទៀតមានចំណាប់អារម្មណ៍ដូចគ្នាឡើយ។ ត្រូវការរក្សាចម្ងាយជាក់លាក់មួយដែលយល់ព្រមនឹងចំណង់ចំណូលចិត្តរវាងគ្នានិងគ្នា។ បែបនេះទើបអាចរស់នៅដោយសុខដុមបាន។
២. រវាងកូន អ្នកក៏គួរទុកគម្លាតមួយឲ្យពួកគេដូចគ្នា
នៅក្នុងសង្គមសព្វថ្ងៃនេះមានឪពុកម្តាយជាច្រើនដែលជាប់រវល់ពេកហើយមិនអាចចំណាយពេលវេលាច្រើនក្នុងការថែទាំកូន ៗ។ ក៏មានឪពុកម្តាយជាច្រើនដែលជិតស្និទ្ធ និងយកចិត្តទុកដាក់ចំពោះកូន រហូតពេលខ្លះគ្មានទុកចន្លោះឲ្យកូនធ្វើអ្វីតាមដែលចំណង់របស់ពួកគេ ពោលគឺគ្រប់សកម្មភាពត្រូវរងការគ្រប់គ្រងពីឪពុកម្ដាយគ្រប់ជំហាន។
អ្នកគួរតែមានគម្លាតរវាងឪពុកម្តាយ និងកូន ៗដូចគ្នាបើសិនជាអ្នកមិនចង់មានវិប្បដិសារីក្នុងជីវិត។ កូនដែលត្រូវបានម្ដាយឪពុកស្រឡាញ់ខ្លាំងពេក មើលថែខ្លាំងពេក ត្រូវបានក្លាយជាកូនទំនើង មិនស្គាល់ភាពលំបាក ឬអ្វីជាខ្លួនឯង។ មួយវិញទៀតការរឹតត្បិតពីឪពុកម្ដាយធ្វើឲ្យកូនមានសម្ពាធ ហើយមិនសូវជាមានអារម្មណ៍ល្អចំពោះឪពុកម្ដាយឡើយ ហើយជម្លោះក៏តែងកើតមានជារឿយៗនៅក្នុងគ្រួសារដែលដាក់គំនាបកូនខ្លាំងពេក។ ការរក្សាគម្លាតមួយសម្រាប់កូនៗគឺជាវិធីមួយដែលល្អ និងផ្ដល់នូវភាពរឹងមាំដល់កូន ហើយការឈឺចាប់ដែលអ្នកអាចទទួលបានពីកូនវិញក៏មានភាគរយតិចដែរ។
៣. គម្លាតរវាងគូសង្សារ
គូសង្សារមិនគួរមានគម្លាតជិតខ្លាំងពេកនោះទេ ព្រោះវាអាចឲ្យអ្នកទទួលការឈឺចាប់ខ្លាំង។ គម្លាតរវាងមនុស្សពីរនាក់អ្នកមិនទាន់មានឈ្មោះជាប្ដីប្រពន្ធគឺរឹតតែមានច្រើន ព្រោះនៅពេលអ្នកដាក់ក្ដីសង្ឃឹមខ្លាំងលើមនុស្សម្នាក់ដែលគ្មានជាប់ចំណងត្រឹមត្រូវអីនឹងគ្នានោះ អ្នកអាចនឹងធ្លាក់នរកនៅពេលដែលគេប្រែប្រួល។ មិនបាច់បើកចំហរឿងផ្ទាល់ខ្លួនអីខ្លាំងពេកទេ ក៏មិនត្រូវចំណាយពេលច្រើនជាមួយគេតែម្នាក់ពេកដែរ ហើយរឹតតែមិនគួរបិទសេរីភាពខ្លួនដោយសារស្នេហា។ កុំរំពឹងលើគេខ្ពស់ពេក គួរតែមានគម្លាតសម្រាប់ខ្លួនឯងខ្លះ បែបនេះទើបនៅពេលមានបញ្ហាអ្នកមិនស្លាប់ខ្លួន។
៤. គម្លាតរវាងមិត្តភក្តិ
មិត្តភក្តិក៏ដូចគ្នា កុំជឿគេខ្លាំងលើសពីជឿលើខ្លួនឯង។ មិត្តភក្តិអាចឲ្យអ្នកឈឺចាប់ជាងបាត់បង់ស្នេហាក៏ថាបាន ដូច្នេះអ្នកត្រូវចេះរក្សាគម្លាតដ៏ល្អមួយរវាងគ្នា និងគ្នា។ ពេលខ្លះអ្នកផ្ដល់ក្ដីស្រឡាញ់ឲ្យគេអស់ពីខ្លួន មិនប្រាកដថាអ្នកផ្ដល់ឲ្យអ្នកវិញដូចគ្នាទេ ព្រោះមនុស្សយើងអ្វីដែលមើលមិនឃើញគឺចិត្ត។ រក្សាកុំឲ្យមានបញ្ហា អ្នកត្រូវចេះផ្ដល់ក្ដីស្រឡាញ់ដែលសមល្មម ហើយកុំស្និទ្ធគ្នាខ្លាំងពេក ព្រោះនៅពេលមានរឿងទាស់គ្នាតែបន្តិច វាអាចក្លាយជាធំបាន។
ចាំណា! ស្និទ្ធខ្លាំង ឈឺចាប់ក៏ខ្លាំង មិនថាគួស្នេហ៍ មិត្តភក្តិ ឬសាច់ញាតិនោះទេ៕
ចុចអាន៖គន្លឹះរៀបចំជីវិតឲ្យកាន់តែប្រសើរក្រោយពេលជួបរឿងអាប់អួ