ជាទូទៅការថែទាំសុខភាពស្បែកនៅក្រោមរង្វង់ភ្នែកភាគច្រើនត្រូវបានគេមើលរំលងជាញឹកញាប់ ជាពិសេសនៅក្នុងទម្លាប់ថែរក្សាស្បែកនឹងសម្រស់របស់មនុស្សម្នាក់ៗ។ នេះក៏ដោយសារតែសុខភាពស្បែកនៅបរិវេណនោះមិនសូវជាមានបញ្ហាចោទខ្លាំងឡើយ ហើយអ្នកដែលមាននោះភាគច្រើនគឺបណ្ដាលមកពីសុខភាពទូទៅ ការផឹកគ្រឿងស្រវឹងនឹងជក់បារីជាប្រចាំ ឬក៏ការគេងមិនបានគ្រប់គ្រាន់ក៏អាចជាមូលហេតុដែរ។ វាពិតជាចាំបាច់នឹងសំខាន់ណាស់ក្នុងការថែរក្សាសម្រស់នៅក្រោមរង្វង់ភ្នែកឲ្យមានសុខភាពល្អនោះ។

បញ្ហាសុខភាពស្បែកមុខគឺមានទំនាក់ទំនងគ្នាទាំងអស់ ដែលអ្នកត្រូវយកចិត្តទុកដាក់ ក្រៅពីបញ្ហាមុខកើតមុន ជាំ ស្បែកស្ងួតជ្រាវជ្រួញ បញ្ហាស្បែកខ្មៅយារធ្លាក់ឬជាំនៅក្រោមរង្វង់ភ្នែកគឺជាកត្តាសំខាន់ផងដែរ ពីព្រោះមនុស្សនឹងធ្វើការវាយតម្លៃអ្នកភ្លាមៗទៅលើបញ្ហានោះ។ ហេតុដូចច្នេះហើយបានជាអ្នកត្រូវបញ្ចូលក្រែមលាបក្រោមរង្វង់ភ្នែកទៅក្នុងទម្លាប់ថែរក្សាសម្រស់ប្រចាំថ្ងៃរបស់អ្នក។

ទាំងនេះគឺជាហេតុផល ៤ យ៉ាងដែលអ្នកគួរតែចាប់ផ្ដើមប្រើក្រែមលាបក្រោមរង្វង់ភ្នែកចាប់ពីពេលនេះតទៅ៖

១. ការបង្ការទុកមុនគឺវាល្អជាងការព្យាបាល តាមការណែនាំបានប្រាប់ថាអ្នកគួរតែចាប់ផ្ដើមប្រើក្រែមលាបនេះចាប់ពីអាយុ ២០ ជាងឡើងទៅ ដើម្បីការពារស្រទាប់ស្តើងនៃស្បែកជុំវិញភ្នែករបស់អ្នកឲ្យមានសុខភាពល្អ និងការបង្ការពីស្នាមជ្រាវជ្រួញមុនអាយុ។

២. ជួយសម្រួលពីការហត់នឿយរបស់ភ្នែក ប្រសិនបើអ្នកកត់សំគាល់ឃើញថាខ្លួនអ្នកមានអាការហើមភ្នែកដោយប្រការណាមួយនោះ ការលាបក្រែមភ្នែកគឺជាវិធីព្យាបាលល្អ ជាពិសេសប្រសិនបើវាមានធាតុផ្សំពីជាតិកាហ្វេអ៊ីន វានឹងជួយកាត់បន្ថយការហើមនៅក្រោមរង្វង់ភ្នែកបានយ៉ាងមានប្រសិទ្ធិភាព។

៣. ផ្ដល់សំណើមដល់ស្បែកក្រោមភ្នែករបស់អ្នក នៅលើបរិវេណក្រោមរង្វង់ភ្នែកគឺជាផ្នែកមួយដែលងាយទទួលរងភាពស្ងួតបំផុត ហើយវាក៏ដូចជាស្បែកមុខដែរ អ្នកត្រូវផ្ដល់សំណើមឲ្យវាជាប្រចាំ។

៤. ជួយប្រយុទ្ធប្រឆាំងនឹងស្នាមជាំខ្មៅក្រោមរង្វង់ភ្នែក ក្រែមការពារភ្នែកមិនមែនគ្រាន់តែជាផលិតផលផ្តល់សំណើមតែប៉ុណ្ណោះទេ តែវាក៏មានតួនាទីក្នុងការជួយការពារស្បែកពីភាពជ្រាវជ្រួញដែលបណ្ដាលមកពីកត្តាជាច្រើនបានយ៉ាងមានប្រសិទ្ធិភាពខ្ពស់ផងដែរ។

អ្នកត្រូវចាំថាបញ្ហាស្បែកក្រោមរង្វង់ភ្នែកអាចបណ្ដាលមកពីកត្តាជាច្រើនណាស់ ដូចច្នេះការលាបក្រែមក្រោមរង្វង់ភ្នែកគឺជាវិធីល្អមួយក្នុងការការពារ ការបង្ការ ការកាត់បន្ថយ និងជាការព្យាបាលបានយ៉ាងល្អផងដែរ៕

ប្រភពរូបភាព៖ Pinterest

ចុចអានបន្ត៖

• អត្ថប្រយោជន៍ ៥ យ៉ាងពីការប្រើក្រែមការពារកម្ដៅថ្ងៃជាប្រចាំ
• រូបមន្តដ៏មានប្រសិទ្ធិភាពក្នុងការជួយកាត់បន្ថយស្នាមជ្រាវជ្រួញ