៦ រឿងដែលអ្នកគួរបញ្ឈប់ធ្វើនៅថ្ងៃនេះ បើចង់បានភាពស្ងប់និងរីករាយដាក់ខ្លួន

2021-02-10 03:40:00
ចំនួនមតិ 0 | ចំនួនចែករំលែក 0

ថ្វីត្បិតអ្នកមិនអាចត្រលប់ទៅអតីតកាលបាន តែអ្នកអាចជួសជុលកំហុសដោយចាប់ផ្តើមពីថ្ងៃនេះទៅអនាគតបាន។ ដើម្បីភាពជោគជ័យនិងសន្តិភាពផ្លូវចិត្ត អ្នកត្រូវផ្លាស់ប្តូរការគិតមួយចំនួនដើម្បីស្វែងរកសុភមង្គលពិតសម្រាប់ខ្លួនអ្នក។

១. ឈប់ខ្វល់រឿងអតីតហើយកុំភ័យពីរឿងអនាគតពេក

ការបារម្ភច្រើនលើរឿងដែលមិនទាន់កើតឡើង ហើយគិតតែរឿងកន្លងហួស វាមិនខុសពីអ្នកកំពុងបំផ្លាញសេចក្តីសុខផ្លូវចិត្តរបស់ខ្លួនឡើយ។ ការពិត គឺអ្នកគួរតែយកចិត្តទុកដាក់ពីបច្ចុប្បន្នឲ្យបានច្រើនវិញ ទើបជីវិតរស់នៅដោយសេចក្តីសុខបូរិបូរណ៍។

២. ឈប់រអ៊ូរទាំ

ការទួញសោក ឬរអ៊ូរទាំ មិនមែនជាវិធីដោះស្រាយបញ្ហាទេ តែផ្ទុយទៅវិញមានតែបង្កើនភាពអវិជ្ជមាន ហើយធ្វើឲ្យខ្លួនឯងជាប់គាំងប៉ុណ្ណោះ។ ផ្លូវចិត្តអ្នកនឹងស្រស់បំព្រង នៅពេលអ្នកគិតអ្វីល្អៗ ។ រាល់បញ្ហាក្នុងជីវិតនឹងប្រែជាស្ងប់ស្ងាត់ បើអ្នកចេះផ្តល់ឱកាសនិងចេះគ្រប់គ្រងវាបាន។

៣. ឈប់ប្រៀបធៀបខ្លួនឯងជាមួយអ្នកដទៃ

បញ្ហាដ៏ធំបំផុតរបស់មនុស្ស គឺចូលចិត្តយកជីវិតខ្លួនឯងទៅប្រៀបធៀបជាមួយអ្នកដទៃ។ ពួកគេមើលត្រឹមតែភាពជោគជ័យពីសម្បកក្រៅរបស់បុគ្គលនោះ រួចហើយមកអង្គុយទួញសោក។ តែពួកគេ មិនបានដឹងទេថា ទម្រាំបុគ្គលនោះទទួលបានភាពជោគជ័យដល់ថ្ងៃនេះ ថាពួកគេបានឆ្លងកាត់ការលំបាក ញើសឈាមខ្លាំងកម្រិតណា ។ ហេតុនេះ ជីវិតរបស់អ្នកគឺជារបស់អ្នក មិនមែនជារបស់អ្នកដទៃឡើយ។ គ្រាន់តែរស់នៅនិងប្រឹងប្រែងឲ្យដល់ទីបញ្ចប់ ធ្វើអ្វីដែលអ្នកចង់ រៀនអ្វីដែលអ្នកចូលចិត្ត ព្រមទាំងចេះរីករាយជីវិតតាមបែបផែនរបស់អ្នក គឺគ្រប់គ្រាន់ហើយ។

៤. ឈប់ច្រណែនអ្នកដទៃ

បើអារម្មណ៍ច្រណែន ដោយសារតែឃើញគេជោគជ័យហើយជម្រុញឲ្យអ្នកខិតខំដែរ នោះគឺជារឿងធម្មតាទេ។ តែបើការច្រណែនឈ្នានីស ចង់បានជាប្រយោជន៍ផ្ទាល់ខ្លួន នោះគឺជាសោកនាដកម្មមួយសម្រាប់ខ្លួនឯងហើយ។ អ្នកនិពន្ធវីល្លៀមម្នាក់និយាយថា ហេតុអ្វីជាញឹកញាប់ មនុស្សច្រនែនតែងតែគេងយំ? នោះដោយសារគាត់ត្រូវរងទារុណកម្មមិនត្រឹមភាពបរាជ័យរបស់ខ្លួនឯងនោះទេ តែក៏ដោយសារភាពជោគជ័យរបស់អ្នកដទៃផងដែរ។ ដូច្នេះ អ្នកត្រូវរីករាយអ្វីដែលខ្លួនមាន នោះទើបរកសុភមង្គលរបស់ខ្លួនឯងឃើញ។

មនុស្សគ្រប់គ្នាសុទ្ធតែមានភាពរឹងមាំនិងទន់ខ្សោយរៀងៗខ្លួន។ ជំនួសឲ្យការអង្គុយច្រណែនអ្នកដទៃ ត្រូវសម្លឹងមើលខ្លួនឯងថា តើអ្នកមានអ្វីខ្លះនៅក្នុងដៃដែលអាចឲ្យអ្នកដទៃចង់ច្រនែនដែរទេ?

៥. ឈប់សម្លឹងមើលអ្វីដែលនៅក្រៅខ្លួន

ជំនួសឲ្យការសម្លឹងមើលតែអ្វីដែលអ្នកខ្វះខាត អ្នកគួរសម្លឹងមើលឲ្យបានច្រើនពីអ្វីដែលខ្លួនកំពុងមាន។ ចំណាយពេលឲ្យបានច្រើនដល់ខ្លួនឯង ដោយសេចក្តីស្ងប់សុខនិងយល់ពីខ្លួនឯង ទើបជាឱកាសនិងអាទិភាពពិតប្រាកដថា អ្នកមានអ្វីដែលជាភាពរួចរាល់ហើយសម្រាប់ខ្លួនឯង។

៦. ឈប់នាំអារម្មណ៍ខ្លួនឯងចូលទៅរកផ្លូវអវិជ្ជមាន

ការដឹងគុណ អាចជាប្រភពមួយសម្រាប់ផ្លូវចិត្តនិងរាងកាយរបស់អ្នក។ ផលិតគំនិតសុទិដ្ឋិនិយម និងធ្វើចិត្តឲ្យត្រជាក់រាល់ថ្ងៃមុនចូលគេង នោះអ្នកនឹងឃើញថា ភ័ព្វសំណាងនិងរឿងល្អៗបានកើតឡើងសម្រាប់អ្នកមិនខាន។ នៅពេលបេះដូងពោរពេញដោយការដឹងគុណ អ្នកនឹងដឹងថាគ្រប់រឿងដែលចូលមកសុទ្ធតែមានហេតុនិងផលមិនខាន។ ហេតុនេះ ត្រូវយកចិត្តទុកដាក់ដល់រឿងទុក្ខសោក និងសប្បាយរីករាយទាំងអស់ ដើម្បីជាឱកាសពង្រឹងខ្លួនឯងឲ្យរឹងមាំបន្ថែមទៀត៕

ប្រភព៖ emdep ប្រែសម្រួល៖ លឹម សុនា