ការមានទំនុកចិត្តពេញលេញគឺមិនងាយស្រួលនោះទេ ជាពិសេសនៅពេលលទ្ធផលនៃការបរាជ័យច្រើនហួសពេក ឬក៏វាអាក្រក់ខ្លាំងពេក។ ប៉ុន្តែតាមការស្រាវជ្រាវរបស់អ្នកវិទ្យាសាស្ត្រ និងទ្រឹស្ដីរបស់សាស្ត្រាចារ្យមួយចំនួនបានបង្ហាញថា យើងពិតជាអាចជួសជុលនូវទំនុកចិត្តដែលបានបែកបាក់ប្រេះស្រាំឲ្យបានប្រសើរឡើងវិញ។

តើទំនុកចិត្តគឺជាអ្វី? វាជាអារម្មណ៍ ឬជាជំនឿដែលថាអ្នកមានតម្លៃ ហើយមានសមត្ថភាព (ឬហៅថាការជឿជាក់លើខ្លួនឯងជាលក្ខណៈវិជ្ជមាន)។ ភាពសុទិដ្ឋិនិយម ភាពក្លាហានក្នុងការប្រឈមមុខនឹងបញ្ហានានា និងផ្តល់ឲ្យអ្នកមានទំនុកចិត្តនេះ។ តើវាមកពីណា? វាជាអ្វីដែលមាននៅក្នុងមនុស្សម្នាក់ៗរួចទៅហើយ (ឬក៏ហៅថាហ្សែន) ហើយវាអាចមកពីសម្ពាធសង្គម បរិស្ថានរស់នៅជុំវិញអ្នក និងអ្វីៗដែលអ្នកព្យាយាមគ្រប់គ្រងវា។

ទាំងនេះជាទំនុកចិត្តបីប្រភេទដែលអ្នកត្រូវតែមានពួកវា៖

១- ទំនុកចិត្តផ្នែកខាងក្រៅ

នេះគឺជារបៀបដែលអ្នកស្រាឡាញ់ទៅលើខ្លួនឯង មិនថាស្គម ធាត់ ខ្ពស់ ឬទាបក៏ដោយ តែអ្នកមានទំនុកចិត្តថាអ្នកស្រឡាញ់ និងសប្បាយចិត្តនូវអ្វីដែលខ្លួនមាន។ វាជាអ្វីដែលមនុស្សផ្សេងទៀតមើលឃើញនៅលើរូបរាងខាងក្រៅរបស់អ្នក ហើយវាងាយស្រួលក្នុងការវាយប្រហារណាស់។ ដូចច្នេះនៅពេលអ្នកណាម្នាក់វាយតម្លៃអ្នក ឬបដិសេធអ្នក ប្រសិនបើអ្នកមិនមានទំនុកចិត្តនេះទេវានឹងចេញប្រត្តិកម្មយ៉ាងលឿន ដែលបណ្តាលឲ្យអ្នកខឹង អាក់អន់ចិត្ត ឬអាចធ្លាក់ទឹកចិត្តស្អប់ខ្លួនឯងទៀតផង។

២- ទំនុកចិត្តលើរបៀបនៃការរស់នៅ

ទាំងនេះគឺជាអ្វីៗដែលផ្តល់ទំនុកចិត្តដល់អ្នកដូចជា៖ ចំណង់ចំណូលចិត្តរបស់អ្នក អ្វីៗទាំងអស់ដែលអ្នកពូកែ និងអាចធ្វើវាបានល្អនៅក្នុងជីវិត។ ការងាររបស់អ្នក មិត្តភក្តិគ្រប់ជ្រុងជ្រោយ និងក្រុមគ្រួសារ គឺជាអ្វីដែលបានផ្តល់ទំនុកចិត្តឲ្យអ្នកក្នុងជីវិតរស់នៅប្រចាំថ្ងៃ។ ហើយទំនុកចិត្តទីពីរនេះគឺមានទំនាក់ទំនងយ៉ាងសំខាន់ជាមួយនឹងទំនុកចិត្តទីបី។

៣- ទំនុកចិត្តលើខ្លួនឯង (ឬជាស្នូលនៃទំនុកចិត្ត)

មួយនេះពិតជាមានសារៈសំខាន់ណាស់ វាជាអ្វីដែលនៅសេសសល់ពីទំនុកចិត្តទាំងពីរខាងលើ ប៉ុន្តែប្រសិនបើអ្នកមានវា អ្នកគឺជាមនុស្សរឹងមាំ និងឯករាជ្យ។ តែជាអកុលសប្រសិនបើទំនុកចិត្តទាំងពីរខាងលើបាត់បង់ដូចជា៖ មិត្តភក្តិចាកចេញ គ្រួសារមិនខ្វាយខ្វល់នៅពេលដែលអ្នកត្រូវការ ភាពស្ត្រេស មិនអាចធ្វើការបានតទៅទៀតរហូតដល់បាត់បង់ការងារនោះ។ ស្នូលនៃទំនុកចិត្ត គឺជាអ្វីដែលនៅសេសសល់ ហើយវាជាទំនាក់ទំនងផ្នែកខាងក្នុងរបស់អ្នកដែលនៅជាមួយអ្នកជារៀងរហូត និងជាអ្វីដែលមនុស្សផ្សេងទៀងមើលមិនឃើញ។

កត្តាសំខាន់បំផុតនោះគឺការជ្រើសរើសរបស់អ្នក ការបង្ហាញ ឬសម្លឹងមើលពីភាពជោគជ័យរបស់អ្នក មិនថាតិចឬច្រើនពីព្រោះវាជាឆន្ទៈ ជាសេរីភាពផ្ទាល់ខ្លួនដែលអាចផ្លាស់ប្តូរសមត្ថភាពរបស់អ្នកឲ្យមានភាពជឿជាក់។ កុំខ្លាចការបរាជ័យអៃ អ្នកអាចកែលំអ និងបង្កើតទំនុកចិត្តសម្រាប់ខ្លួនឯងបាន។

រូបភាព៖ Pixabay, Pinterest

អានបន្ត៖

• ចង់បានភាពទាក់ទាញពីមនុស្សជុំវិញខ្លួន អនុវត្តវិធីទាំង ៨ យ៉ាងនេះ
• កាដូ ៥ យ៉ាងនេះពិសេសណាស់សម្រាប់ជូននៅថ្ងៃបុណ្យណូអែល