ទម្លាប់ហូបអាហារពេលព្រឹក៤យ៉ាង ដែលងាយបំផ្លិចបំផ្លាញសុខភាពជាទីបំផុត

2020-07-01 08:25:00
ចំនួនមតិ 0 | ចំនួនចែករំលែក 0

អាហារពេលព្រឹក ពិតជាមានសារៈសំខាន់សម្រាប់សុខភាពមនុស្សខ្លាំងណាស់។ ប្រសិនបើអ្នកហូបវាមិនបានត្រឹមត្រូវទេ អាចបណ្ដាលឲ្យមានជំងឺដង្កាត់ជាច្រើននាពេលអនាគត។

១. ហូបអាហារពេលព្រឹកបន្ទាប់ពីម៉ោង ៩

យោងតាមអ្នកជំនាញខាងចំណីអាហារ ម៉ោងមាសហូបអាហារពេលព្រឹកដែលជួយឲ្យសុខភាពរឹងមាំ មានកម្លាំងពលំ និងប្រសិទ្ធភាពបំផុតនោះ គឺចន្លោះម៉ោង ៦ -៨ ព្រឹក។ ហេតុផលគឺពេលនេះ ក្រពះកំពុងបញ្ចេញជាតិអាស៊ីតខ្លាំង ដែលល្អបំផុតសម្រាប់ស្រូបយកអាហារ។ តែបើអ្នកបរិភោគអាហារពេលព្រឹកក្រោយម៉ោង៩ លទ្ធភាពស្រូបយកជីវជាតិពីចំណីអាហារបានតិច មិនទទួលបានប្រសិទ្ធភាពខ្ពស់ដូចការចង់បាន ព្រមទាំងធ្វើឲ្យឆ្អែតហើយមិនចង់ហូបអាហារពេលថ្ងៃត្រង់ថែមទៀត។

២. ជ្រើសរើសអាហារពេលព្រឹកអត់គុណភាព

មនុស្សមួយចំនួនមានការរវល់នៅពេលព្រឹក ដូច្នេះពួកគេក៏សម្រេចជ្រើសយកអាហារក្រៀមៗដូចជា នំ ឬអាហារបំពងទទួលទាន ដែលងាយនឹងឲ្យរាងកាយអស់កម្លាំង ងងុយគេង មិនស្វាហាប់។ ចំពោះមនុស្សស្រី ថ្វីបើចង់សម្រកទម្ងន់ក៏ពិតមែន តែបើអ្នកជ្រើសយកវិធីនេះសម្រាប់អាហារពេលព្រឹកដែរ មិនត្រឹមមិនអាចសម្រកទម្ងន់បានទេ ថែមទាំងប៉ះពាល់ដល់សុខភាពទៀតផង។ ម្យ៉ាងទៀត បើអ្នកជ្រើសផឹកទឹកផ្លែឈើមានរសជាតិជូរ នោះបណ្តាលឲ្យមានជំងឺក្រពះថែមទៀត។

៣. ហូបបណ្ដើរ ដើរបណ្ដើរ

ទម្លាប់របស់មនុស្សមួយចំនួន ធ្វើយ៉ាងណាឲ្យតែបានអាហារពេលព្រឹកចូលពោះសិន ដោយពួកគេដើរផងញ៉ាំផង បើកឡានបណ្តើរហូបបាយបណ្តើរ ជិះម៉ូតូផងហូបបាយផង ព្រោះមិនចង់ឲ្យខាតពេល។ ទម្លាប់ទាំងនេះ ងាយនឹងធ្វើឲ្យក្រពះពោះវៀនរបស់អ្នកឆាប់មានបញ្ហាជាទីបំផុត។ លើសពីនេះ ពេលអ្នកដើរផងញ៉ាំផង បង្កើតឲ្យក្រពះពិបាកធ្វើការ យូរទៅនឹងមានបញ្ហារំលាយអាហារផងដែរ។

៤. ញ៉ាំលឿនពេក និងញ៉ាំច្រើនពេក

មិនថាអ្នកហូបលឿនពេក ឬញ៉ាំច្រើនជ្រុល នឹងដាក់បន្ទុកដល់បំពង់រំលាយអាហារ។ ដូច្នេះ នៅពេលអ្នកទទួលទានអាហារពេលព្រឹក អ្នកគួរតែញ៉ាំកុំប្រញាប់ ដើម្បីទទួលបានរសជាតិនិងក្រពះងាយរំលាយអាហារបានល្អ។ ម្ល៉ោះហើយ សម្រាប់អាហារពេលព្រឹក គួរតែជ្រើសរើសក្នុងបរិមាណសមល្មមដែលក្រពះអាចទទួលយកបាន៕

ប្រភព៖ Phunutoday ប្រែសម្រួល៖ លឹម សុនា