គ្រប់វីតាមីនទាំងអស់ សុទ្ធតែចាំបាច់ដើម្បីជួយឲ្យរាងកាយមានដំណើរការល្អជារៀងរាល់ថ្ងៃ។ ដូចជាភ្នែកមានសុខភាពល្អ រមែងតែងតែត្រូវការវីតាមីន A ជាដើម។ ហេតុនេះប្រសិនបើអ្នកមានសញ្ញាទាំង៧យ៉ាងដូចខាងក្រោម លេចចេញមកមានន័យថារាងកាយកំពុងតែខ្វះវីតាមីន A ហើយ។ មិនគួរធ្វេសប្រហែសឡើយ ត្រូវយកចិត្តទុកដាក់លើរបបអាហារសាជាថ្មី។

១. ស្បែកស្ងួតខ្លាំង

វីតាមីន A មានតួនាទីសំខាន់ក្នុងការជួសជុលកោសិកាស្បែកឡើងវិញ និងជួយផ្តល់ជាតិទឹកដល់ស្បែក។ បើអ្នកខ្វះវីតាមីន A នោះស្បែកនឹងប្រែជាស្ងួត ក្រហម របកក្រហាយជាដើម។ ពេលខ្លះអាចរមាស់ថែមទៀតផង។

២. មើលមិនឃើញនៅពេលយប់ (ខ្វាក់មាន់)

​នេះជាបញ្ហាដែលតែងកើតឡើងជាញឹកញាប់សម្រាប់អ្នកខ្វះវីតាមីន A ។ នៅពេលយប់ភ្នែករបស់អ្នក មាន​ការ​ចុះ​ខ្សោយខ្លាំង និងមិនអាចមើលអ្វីឃើញនៅទីកន្លែងងងឹត។

៣. កើតមុន

ដូចបានបង្ហាញខាងលើ វីតាមីន ​A ពិតជាសំខាន់ណាស់សម្រាប់សុខភាពស្បែក។ បើខ្វះវា​ស្បែករបស់មុខរបស់អ្នកនឹងប្រែជាស្ងួត និងផលិតជាតិប្រេងច្រើនលើសកម្រិត បណ្តាលឲ្យកើតមុន។ ហេតុនេះហើយទើបបានជា វីតាមីន A ត្រូវបានគេយកទៅប្រើប្រាស់ដាក់ក្នុងផលិតផលព្យាបាលមុន។

៤. មានបញ្ហាក្នុងការមានគភ៌

ប្រសិនបើអ្នកជួបបញ្ហាពិបាកក្នុងការមានផ្ទៃពោះ អាចបណ្តាលមកពីកង្វះវីតាមីន A។ ប្រព័ន្ធបន្តពូជទាំងបុរសនិងស្រ្តី អាចមានដំណើរល្អ លុះត្រាតែមានវីតាមីន A គ្រប់គ្រាន់។ ជាពិសេសសម្រាប់ស្រ្តីមានផ្ទៃពោះ គួរជ្រើសរើសរបបអាហារដែលមានវីតាមីន A ខ្ពស់ ដើម្បីជួយទ្រទ្រង់សុខភាព និងគភ៌ក្នុងផ្ទៃ។

៥. របួសមិនងាយជាសះស្បើយ

របួសអាចជាបានលឿន ដោយសារតែការផលិតរបស់ខូឡាជែន និង​វីតាមីន Aជាជំនួយការចម្បង។ កាលណាបើអ្នកមានរបួសហើយមិនងាយជា បញ្ជាក់ថាអ្នកត្រូវញ៉ាំអាហារដែលមានវីតាមីន A ខ្ពស់ដូចជា ការ៉ុត ក្រូច ទឹកដោះគោ និងសាច់ក្រហម។

៦. លូតលាស់យឺត

នេះជាបញ្ហាមួយដែលត្រូវតែយកចិត្តទុកដាក់ ជាពិសេសទារកនិងកុមារ។ វាជារឿងចាំបាច់ ដែលអ្នកម្តាយគ្រប់រូប ត្រូវទទួលយកវីតាមីន A ឲ្យបានគ្រប់គ្រាន់តាំងពីមានគភ៌៣ខែដំបូង និងព្យាយាមឲ្យកូនញ៉ាំអាហារមានវីតាមីន A តាំងពីពួកគេចូលអាយុ១ខួប។ ការធ្វើបែបនេះគឺដើម្បីធ្វើឲ្យភ្នែករបស់កូនមានសុខភាពល្អ ប្រព័ន្ធការពារភាពស៊ាំរឹងមាំ និងរាយកាយលូតលាស់បានល្អ។

៧. ភ្នែកស្ងួត

កង្វះវីតាមីន A ធ្វើឲ្យភ្នែកចុះខ្សោយក្នុងការផលិតទឹកភ្នែកនិងជាតិសំណើមនៅបរិវេណគ្រាប់ភ្នែក ជាហេតុបង្កឲ្យភ្នែកស្ងួត ពិបាកមើលជាដើម។

គន្លឹះសំខាន់ៗក្នុងការផ្តល់វីតាមីន A ដល់រាងកាយ

សម្បូរនៅក្នុងអាហារដូចជា៖

• ស៊ុត

• ត្រីសាល់ម៉ុន

• កូនស្ពៃ

• ដំឡូងផ្អែម

• ការ៉ុត។

កុំភ្លេចញ៉ាំអាហារដែលបានរៀបរាប់ខាងលើ ប្រសិនបើអ្នកសង្កេតឃើញថារាងកាយកំពុងតែជួបបញ្ហាខ្វះវីតាមីន A៕

ចុចអានបន្ត៖ សញ្ញា​ទាំង ៧ នៅ​លើ​ដៃជួយបង្ហាញ​ពី​សុខភាព​របស់អ្នក