ទង្វើទាំង ៨ បង្ហាញថា ដៃគូអ្នកមានគម្រោងកសាងអនាគតជាមួយអ្នកយ៉ាងពិតប្រាកដ

2020-05-19 09:15:00
ចំនួនមតិ 0 | ចំនួនចែករំលែក 0

ក្នុងទំនាក់ទំនងស្នេហាមួយ ពេលខ្លះវាពិតជាពិបាកក្នុងការងាយតម្លៃថាភាគីម្ខាងទៀតមានភាពច្បាស់លាស់នឹងអ្នកពិតប្រាកដ ឬ យ៉ាងណា។ យ៉ាងណាមិញ មនុស្សពីរអ្នកដែលស្រឡាញ់គ្នាពិត ច្បាស់ជាបញ្ចេញនូវចម្លើយតាមរយៈពាក្យសម្ដី និង កាយវិការរបស់ពួកគេជាក់ជាមិនខាន។ ក្នុងករណីដែលអ្នកកំពុងលង់ស្រឡាញ់គេខ្លាំង ហើយគិតគូដល់រឿងអនាគតជាមួយគេ អ្នកច្បាស់ជាចង់ដឹងហើយថា គេមានអារម្មណ៍និងការគិតបែបនោះដូចអ្នកដែរ ឬក៏អត់។ ដូច្នេះ មកដឹងពីចំណុចធំៗទាំង ៨ ដែលបង្ហាញឲ្យឃើញថាដៃគូរបស់អ្នកមានភាពច្បាស់លាស់នឹងទំនាក់ទំនងរបស់អ្នកទាំងពីរ ហើយអាចឈានដល់ការកសាងគ្រួសារជាមួយគ្នា៖

រូបតំណាង

**១. គេនិយាយរឿងអនាគតជាមួយអ្នក៖** មនុស្សប្រុសដែលស្រឡាញ់អ្នកពិត គេនឹងលើករឿងអនាគតមកពិភាក្សាជាមួយអ្នកដោយមិនបង្អង់យូរ ធ្វើឲ្យអ្នកអន្ទះសា ឬ មានមន្ទិលអំពីទឹកចិត្តរបស់គេឡើយ។

២. គេណែនាំអ្នកទៅកាន់មនុស្សជាទីស្រឡាញ់របស់គេ៖ បើគេច្បាស់លាស់នឹងទំនាក់ទំនងរបស់អ្នកទាំងពីរ គេនឹងបង្ហាញតាមរយៈការណែនាំអ្នកទៅកាន់មនុស្សដែលជិតស្និទ្ធរបស់គេ ដែលក្នុងនោះមាន ក្រុមគ្រួសារ ពួកម៉ាក ឬ មិត្តរួមការងារជាដើម។

៣. គេមានភាពស្មោះត្រង់នឹងអ្នកជានិច្ច៖ មនុស្សប្រុសដែលស្មោះត្រង់ មិនចេះភូតភរកុហក ឬលាក់លៀមនឹងអ្នកជាមនុស្សដែលឲ្យតម្លៃខ្លាំងលើអ្នក និង ស្នេហារបស់អ្នកទាំងពីរ។

រូបតំណាង

៤. គេតែងចង់ឃើញអ្នករីករាយ និង មានក្ដីសុខ៖ ចំណុចដែលគួរសង្កេតមួយដែរនោះគឺ គេមិនស្ទាក់ស្ទើរក្នុងការធ្វើអ្វីៗ ដើម្បីឲ្យអ្នកសប្បាយចិត្តឡើយ ព្រោះពេលអ្នករីករាយ គេក៏រីករាយដូចគ្នា។

៥. គេយកចិត្តទុកដាក់ស្ដាប់អ្នក៖ ពេលអ្នកមានរឿងក្នុងចិត្ត មិនថារឿងបែបណា គឺគេតែងនៅក្បែរចាំជួយលើកទឹកចិត្ត ស្ដាប់ និងជួយប្រឹក្សាយោបល់ជាមួយអ្នកជានិច្ច។

៦. គេគោរព និង ឲ្យតម្លៃអ្នក៖ ទោះស្និទ្ធស្នាលកម្រិតណាក្ដី បុរសដែលស្រឡាញ់អ្នកពិត តែងរក្សាបាននូវពាក្យសម្ដី និង អាកប្បកិរិយាសមរម្យ ក៏ដូចជាផ្ដល់នូវសិទ្ធគ្រប់គ្រាន់ដល់អ្នក ដូចកាលផ្ដើមស្រឡាញ់គ្នាពីដំបូង។

រូបតំណាង

៧. គេចំណាយពេលវេលាផ្ទាល់ខ្លួនដើម្បីអ្នក៖ ការផ្ដល់ពេលវេលាជារឿងសំខាន់នៅក្នុងទំនាក់ទំនងមួយ ជាពិសេសសម្រាប់អ្នកដែលមានការមមាញឹកខ្លាំង។ ដូច្នេះ បើអ្នកសង្កេតឃើញថា ដៃគូរបស់អ្នកតែងចំណាយពេលវេលាឲ្យអ្នក មិនថារវល់បែបណា នោះគេច្បាស់ជាឲ្យតម្លៃអ្នកខ្លាំងជាក់ជាមិនខាន។

៨. គេតែងនិយាយថាស្រឡាញ់អ្នក៖ ទោះជាបង្ហាញតាមរយៈសកម្មភាពច្រើនប៉ុណ្ណាក៏មនុស្សស្រីទាមទារនូវការនិយាយចេញពីមាត់ផ្ទាល់ដែរ។ ការនិយាយជារឿយៗថាគេស្រឡាញ់អ្នក ជាទង្វើមួយដែលស្ដែងថាគេពេញចិត្តនឹងបញ្ចេញនូវអារម្មណ៍ពិតរបស់គេ ទាំងតាមរយៈទង្វើ និងពាក្យសម្ដី៕