គូស្នេហ៍ស្រលាញ់គ្នាពិត គេមិនភ្លេចធ្វើរឿងទាំងនេះទេ

2020-05-19 02:50:00
ចំនួនមតិ 0 | ចំនួនចែករំលែក 0

ចំណងស្នេហ៍រឹងមាំ ក្តីស្រលាញ់ពិតប្រាកដ ជាបំណងប្រាថ្នាដ៏ធំមួយនៅក្នុងជីវិតរបស់មនុស្សម្នាក់ៗ។ មានទម្លាប់តូចតាចមួយចំនួន ពេលខ្លះគូស្នេហ៍បានមើលរំលង ដោយភ្លេចគិតថា វាគឺជាជាតិពុលម្យ៉ាង ដែលអាចចូលទៅបំផ្លាញទំនាក់ទំនងរបស់អ្នកឲ្យដាច់រហែកដោយមិនដឹងខ្លួន។ ស្នេហាមានភាពស្រស់បំព្រង រស់នៅជាមួយគ្នាយូរយ៉ាងណាក៏មិនធុញ មានចិត្តឲ្យគ្នា មិនផ្លាស់ប្តូរ លុះត្រាតែអ្នកបានធ្វើរឿងទាំងអស់នេះសិន។

១. លាក់បាំងរឿងសម្ងាត់ឲ្យគ្នាទៅវិញទៅមក

នៅពេលស្រលាញ់នរណាម្នាក់ អ្នកច្បាស់ជាចូលចិត្តនិយាយគ្នាលេង ជជែកពិភាក្សាគ្រប់រឿង។ រឿងណាដែលមិនសំខាន់ អ្នកអាចចែករំលែកខ្លះៗទៅកាន់អ្នកដទៃបាន ប៉ុន្តែចំពោះបញ្ហាផ្ទាល់ខ្លួនខ្លះវិញ មិនគួរឲ្យបែកធ្លាយដាច់ខាតសូម្បីជាមិត្តជិតស្និទ្ធខ្លាំងយ៉ាងណាក៏ដោយ។ ទោះគេសន្យាថានឹងមិនប្រាប់នរណាបន្ត ដើម្បីឲ្យអ្នកហ៊ាននិយាយចេញមក ពេលដៃគូដឹង គាត់នឹងអស់ជំនឿចិត្តលើអ្នកហើយក៏លែងចង់ប្រាប់រឿងសម្ងាត់អីទៀតដែរ។

២. មានភាពឯករាជ្យ

គូស្នេហ៍ដែលគ្មានភាពឯករាជ្យ យូរៗទៅអាចនឹងប៉ះពាល់ដល់ពេលវេលាផ្ទាល់ខ្លួនដូចជា៖
មិនអាចចេញទៅខាងក្រៅជាមួយអ្នករាប់អានគ្នាឬមិត្តភ័ក្តិ
មិនអាចឈោងចាប់ក្តីស្រមៃដែលខ្លួនចង់បាន
មិនអាចសប្បាយរីករាយជាមួយអ្វីដែលជាចំណង់ចំណូលចិត្តរបស់ខ្លួន
គ្មានពេលសម្រាប់ខ្លួនឯង ឬធ្វើរឿងអ្វីដូចមុនបាន។

ចំណុចខាងលើ មិនមែនមានន័យថា អ្នកត្រូវសប្បាយនូវទង្វើផ្ទាល់ខ្លួន រហូតភ្លេចឬទុកដៃគូចោលនោះទេ ប៉ុន្តែជាការផ្តល់ឱកាសឲ្យគ្នាទៅវិញទៅមក ដោយបើកចិត្តឲ្យទូលាយ មិនប្រចណ្ឌ ច្រណែន ឬទាមទារឲ្យគេនៅស្អិតជាប់ជាមួយដោយគ្មានហេតុផល។

៣. ផ្តល់ភាពរីករាយដោយមិនរំពឹងចង់បានអ្វីមួយត្រលប់ទៅវិញ

ទំនាក់ទំនងស្នេហាដែលរឹងមាំ គូស្នេហ៍តែងតែរស់នៅជាមួយគ្នា ដោយជះឥទ្ធិពលវិជ្ជមានឲ្យគ្នាទៅវិញទៅមក។ ស្នាមញញឹម សំណើច ភាពសប្បាយរីករាយ ត្រូវតែមានឲ្យគ្នាជាប្រចាំ។ កុំធ្វើតែពេលចង់យកចិត្តព្រោះមានកំហុស ឬដោយសារតែមានគោលបំណងចង់បានអ្វីមួយត្រលប់មកវិញនោះទេ។

៤. គាំទ្រលើកទឹកចិត្តជានិច្ច

មនុស្សពីរនាក់ស្រលាញ់គ្នាពិតប្រាកដ ពួកគេតែងតែនៅចាំជួយលើកទឹកចិត្តគ្នា ទោះជាមានរឿងអ្វីកើតឡើងក៏ដោយ។ ពូកគេអាចធ្វើជាសសរបង្អែក នៅពេលដៃគូម្ខាងទៀត ទន់ខ្សោយ គ្មានកម្លាំងចិត្តនឹងតស៊ូបន្ត។ ពេលជាប់គាំង ពេលគ្មានវិធី ពេលខ្វះទំនុកចិត្ត ពួកគេមិនបោះបង់ចោលគ្នា មានតែជំរុញឲ្យងើបឈរ ខំប្រឹងដើម្បីភាពជោគជ័យទាំងអស់គ្នាទៅថ្ងៃមុខ។

៥. មានសិទ្ធិស្មើគ្នា

ដៃគូត្រូវតែគោរពគ្នាទាំងសងខាង ដោយមិនប្រកាន់ថា គ្រួសារខាងណាមានជាងខាងណាទេ។ ចំណែកឯការផ្តល់សិទ្ធិស្មើគ្នា សំដៅទៅលើចំណុចច្រើនយ៉ាងរួមមាន៖

លុយកាក់
សេរីភាព
ពេលទំនេរ
ការងារ
ផលប្រយោជន៍
ការគោរព
ការស្តាប់គំនិតយោបល់
រួមទាំងកិច្ចការផ្ទះផងដែរ។

៦. ឈ្លោះគ្នាដើម្បីរកដំណោះស្រាយមិនមែនចង់ឈ្នះ

ការឈ្លោះគ្នាមិនមែនជាសញ្ញាល្អប៉ុន្មានទេ ប៉ុន្តែបើអ្នកចេះរកដំណោះស្រាយសមរម្យមួយ វានឹងអាចធ្វើឲ្យស្នេហាកាន់តែរឹងមាំជាងមុនទៅទៀត។ ពេលឈ្លោះគ្នា បើចង់ឈ្នះរៀងៗខ្លួនគ្មានបានអ្វីមកវិញឡើយ។ បើយកបញ្ហាទាំងនោះ ទៅពិចារណាឡើងវិញ រៀនសូត្រពីវាឲ្យបានច្បាស់ ជម្លោះមិនមែនជាឧបសគ្គធំទៀតទេ តែជាមេរៀនដ៏ល្អទៅវិញ៕