កុំឆ្លៀតពេលតែលេងហ្គេម ឬគេងយូរម៉ោង ងាកមកធ្វើការងារប៉ុន្មានមុខនេះចំណេញជាង

2020-05-06 08:45:00
ចំនួនមតិ 0 | ចំនួនចែករំលែក 0

នៅពេលអ្នកទំនេរ បើឆ្លៀតតែលេងហ្គេម មើលរឿង និងគេង វាច្បាស់ជាធ្វើឲ្យអ្នកឆាប់ធុញ និងមានអារម្មណ៍ថាខ្លួនឯងមិនបានចំណាយពេលឲ្យមានប្រយោជន៍។ ម្ល៉ោះហើយ ត្រលប់ទៅសម្លឹងសម្ភារៈក្នុងផ្ទះ លាងសម្អាតនិងរៀបចំវាឲ្យមានសណ្តាប់ធ្នាប់ គ្រាន់បើជាងអង្គុយស្តាប់តន្រ្តីចោលពេលទំនេរ។

១. សម្អាតទូទឹកកក

ទូទឹកកក ចាត់ទុកថាជាវត្ថុសំខាន់ព្រោះវាជួយរក្សាគុណភាពបន្លែ ផ្លែឈើនិងភេសជ្ជៈបានយូរ។ គួបផ្សំអំឡុងពេល Covid-19 ទៀត វារឹតតែដើរតួនាទីសំខាន់ ដោយកាត់បន្ថយការទៅផ្សារច្រើនដង។ ម្ល៉ោះហើយ អ្នកគួរសម្អាតទូទឹកកកឲ្យបានស្អាតល្អ ដោយប្រើក្រណាត់សើមទៅជូត ចៀសវាងយកទឹកទៅចាក់លាង ឬប្រើ Spray បាញ់ ព្រោះធ្វើឲ្យបន្ទះសៀគ្វីមួយចំនួនខូចបាន។ អ្នកគ្រាន់តែជូតបរិវេណធ្នើរក្នុងទូគឺគ្រប់គ្រាន់ហើយ វានឹងជួយឲ្យទូមានអនាម័យ និងក្លិនល្អ។

២. សម្អាតបន្ទប់ទឹក

វាក៏ចាត់ទុកជាកន្លែងដើរតួសំខាន់ផងដែរ ព្រោះគ្រប់គ្នាញឹកញាប់ប្រើវាដើម្បីសម្អាតរាងកាយ ឬបន្ទោរបង់ជាដើម។ ម្ល៉ោះហើយ បើសិនបន្ទប់ទឹកមិនមានអនាម័យទេ ច្បាស់ជាមេរោគតោងជាប់យើង ក្រោយប្រើប្រាស់រួចមិនខាន។ ហេតុនេះហើយ អ្នកគួរលាងសម្អាតជញ្ជាំង ដុសជូតកន្លែងណាដែលមានស្នាមប្រឡាក់ចេញ។ ម្យ៉ាងទៀត របស់ណាដែលមិនប្រើ គួរគ្រវាត់ចោលកុំឲ្យចង្អៀត ព្រោះជួយឲ្យបន្ទប់ទឹកមើលទៅមានសណ្ដាប់ធ្នាប់ អនាម័យជាងមុន។ ក្រៅពីនេះ បង្គន់ក៏ដូចគ្នា មិនគួរមិនអើពើដុសសម្អាតឡើយ។

៣. រៀបចំគ្រែគេង

គ្រែដែលពួកយើងប្រើសម្រាប់គេងឲ្យលក់សុបិនល្អរាល់យប់ ប្រហែលជាទីប្រមូលផ្តុំធូលីរាប់ពាន់ដែលយើងមិនបានដឹង។ ហេតុនេះ ដើម្បីការពារពីជំងឺផ្លូវដង្ហើម អ្នកគួរឧស្សាហ៍ប្តូរកម្រាលពូក ស្រោមខ្នើយ យ៉ាងហោចម្ដងក្នុងមួយអាទិត្យ។ លើសពីនេះ បើអ្នកគ្មានម៉ាស៊ីនបូមធូលីចេញពីខ្នើយកើយទេ អាចយកវាទៅហាលថ្ងៃក៏បាន ព្រោះវាជួយសម្លាប់បាក់តេរី និងជួយឲ្យដំណេកអ្នកប្រកបដោយផាសុកភាព ព្រមទាំងសុខភាពស្បែកដូចជាច្រមុះ មុខបានល្អទៀតផង។

៤. រៀបចំទូខោអាវ

ទូខោអាវរញ៉េរញ៉ៃនឹងធ្វើឲ្យអ្នកពាក់តែអាវដដែលៗច្រើនដង ដោយសារជួនកាលខោអាវស្អាតៗជាច្រើនបានកប់ក្នុងគំនររហូតអ្នករកមិនឃើញ។ ឆ្លៀតពេលទំនេរ អ្នកគួររៀបចំបត់ខោអាវឲ្យផ្លឹងៗ។ ខោអាវដែលឈប់ពាក់ គួរបរិច្ចាគ ខោអាវសម្រាប់រដូវរងាដែលចុងឆ្នាំទើបមកដល់ គួរដាក់វាម្តុំក្នុងប្រអប់ដើម្បីរៀបវាដោយឡែក ខោអាវក្នុងគួររកប្រអប់ណាដាក់វាដើម្បីងាយស្រួលរក មិនចំណាយពេលយូរ។

៥. រៀបចំទូដាក់ស្បែកជើង និងសម្អាតវាចេញ

តាមធម្មតា មុនពេលចេញក្រៅ អ្នកជ្រើសស្បែកជើងពាក់អាស្រ័យលើអារម្មណ៍និងតាមម៉ូដខោអាវ។ ដូច្នេះ ឆ្លៀតពេលទំនេរ អ្នកកុំភ្លេចប្រមូលស្បែកជើងណាដែលដុសលាងទឹកបានយកទៅហាលថ្ងៃ ឬជូតស្បែកជើងកុំឲ្យមានធូលីដី ឲ្យប្រៀបដូចជាស្បែកជើងទិញថ្មី។ ម្យ៉ាងទៀត កុំភ្លេចសម្អាតធ្នើរដាក់ស្បែកជើង រៀបវាឲ្យមានសណ្ដាប់ធ្នាប់ ពេលចង់ទៅណាស្រួលមិនបាច់រកច្រើន។

អានបន្ត៖ តិចនិក ៨ សន្សំលុយឲ្យសល់សម្រាប់ខ្លួនឯង និងអាចទុកសាគួពេលចំណូលធ្លាក់ចុះក្នុងគ្រាណាមួយ

ប្រភព៖ Spiceee ប្រែសម្រួល៖ លឹម សុនា