តិចនិក ៨ សន្សំលុយឲ្យសល់សម្រាប់ខ្លួនឯង និងអាចទុកសាគួពេលចំណូលធ្លាក់ចុះក្នុងគ្រាណាមួយ

2020-05-05 06:30:00
ចំនួនមតិ 0 | ចំនួនចែករំលែក 0

"លុយ" នៅពេលដែលចាយវាយ របូតចេញពីដៃ ហូរលឿនដូចជាទឹកទន្លេ អស់ពីកាបូបដោយមិនដឹងខ្លួន ប៉ុន្តែបើនិយាយពីចំណូលវិញ សន្សឹមៗមិនខុសគ្នាពីទឹកសន្សើម។ ហ៊ានតែចាយវាយផ្តេសផ្តាស វាអាចនឹងលើសពីចំណូលទៅទៀត។ ពេលនោះហើយដែលអ្នកត្រូវរងផលអវិជ្ជមាន នៅក្នុងជីវិត។ មិនគួរភ្លេចខ្លួនដាច់ខាត ត្រូវប្រកាន់ខ្ជាប់ នូវភាពច្បាស់លាស់សម្រាប់ចំណូលនិងចំណាយប្រចាំថ្ងៃ និងចេះពីរបៀបសន្សំឲ្យបានត្រឹមត្រូវ ទើបអាចសល់លុយ និងមិនភ័យខ្លាចថាខ្វះខាត នៅពេលចំណូលប្រែប្រួលធ្លាក់ចុះក្នុងគ្រាអាសន្នណាមួយ។

១. កាត់បន្ថយការចំណាយដែលពុំចាំបាច់

រូបតំណាង

ឧទាហរណ៍៖ អ្នកធ្វើការនៅការិយាល័យភាគច្រើន បានចំណាយលុយទិញកាហ្វេ១-២កែវរាល់ថ្ងៃ ហើយបើសរុបជាខែវិញគឺច្រើនខ្លាំងណាស់។ ហេតុនេះហើយអ្នកអាចផ្លាស់ប្តូរទម្លាប់ ដោយងាកមកឆុងដោយខ្លួនឯងវិញ នោះចំណូលរបស់អ្នកនឹងកើនជាងមុនដោយស្វ័យប្រវត្ត។ ចង់សល់លុយច្រើន មិនអាចធ្វេសប្រហែសមើលស្រាល លើការចំណាយប្រចាំថ្ងៃ ទោះបីអ្នកគិតថាវាជាចំនួនបន្តិចបន្តួចក៏ដោយ។

២. រាយក្នុងមុខបញ្ជីមុនពេលទៅទិញឥវ៉ាន់

រូបតំណាង

មិនថានៅពេលទៅទិញចំណីអាហារឬគ្រឿងសម្អាតនោះទេ អ្នកត្រូវតែកត់ក្នុងបញ្ជីជាមុនសិន។ វិធីនេះអាចជួយសន្សំបានទាំងពេលវេលាសម្រាប់ឲ្យអ្នកដើរទិញទំនិញ ថែមទាំងអាចការពារ មិនឲ្យចំណាយផ្តេសផ្តាសលើរបស់របរដែលគ្មាននៅក្នុងបញ្ជី។

៣. រកមើលទំនិញបញ្ចុះតម្លៃ

រាល់ទំនិញដែលគេដាក់បញ្ចុះតម្លៃមិនមែនមានន័យថាសុទ្ធតែគ្មានគុណភាពឡើយ។ ហាងទំនិញជាច្រើននឹងមានកម្មវិធីបញ្ចុះតម្លៃក្នុងឱកាសពិសេសណាមួយ ដើម្បីទាក់ទាញអ្នកទិញ និងលក់ដាច់ក្នុងបរិមាណច្រើន។ ហេតុនេះហើយអ្នកអាចរកមើលឥវ៉ាន់ណាដែលតែងតែប្រើប្រាស់ជាប្រចាំ ពិនិត្យមើលថ្ងៃផុតកំណត់ឲ្យបានត្រឹមត្រូវ និងអាចទិញស្តុកទុកខ្លះ ដើម្បីចំណេញលុយ។

៤. លក់ចេញរបស់របរដែលមិនប្រើប្រាស់

រូបតំណាង

របស់របរទាំងចាស់និងថ្មី ដែលអ្នកគិតថាមិនអាចប្រើប្រាស់បាន ឬលែងត្រូវការតទៅទៀត គួរលក់ចេញក្នុងតម្លៃទាបឬសមរម្យបំផុត ទៅឲ្យអ្នកផ្សេងដែលត្រូវការ តាមរយៈបណ្តាញសង្គមជាដើម។

៥. កាត់បន្ថយការញ៉ាំនៅខាងក្រៅ

ការចេញទៅដើរលេង ជួបជុំគ្នា ញ៉ាំអីនៅខាងក្រៅ ពិតជាធ្វើឲ្យលុយហូរចេញពីហោប៉ៅដោយមិនដឹងខ្លួន។ ចេញក្រៅកាន់តែញឹក ចំណូលនឹកកាន់តែតិចទៅៗ។ គួរមានទម្លាប់រៀនធ្វើម្ហូប រៀបចំបាយពីផ្ទះ បានទាំងសល់លុយនិងមិនប៉ះពាល់ដល់សុខភាព។

៦. កាត់បន្ថយការចាយវាយដោយប្រើកាត

នៅពេលដែលអ្នកចាយវាយដោយប្រើក្រដាសប្រាក់មិនមែនកាត វាគឺជាវិធីដ៏ល្អមួយសម្រាប់ជួយសន្សំសំចៃបានច្រើនជាងមុនផងដែរ។ ដោយសារតែការប្រើកាត អាចធ្វើឲ្យអ្នកមិនបានចាប់អារម្មណ៍លើបរិមាណដែលត្រូវចំណាយ ពេលខ្លះអាចបណ្តាលឲ្យអស់ពីកុងធនាគារ ដោយមិនខ្លួនជាក់ជាមិនខាន។

៧. កាត់បន្ថយការទិញឥវ៉ាន់អនឡាញ

រូបតំណាង

ទំនិញដែលគេបង្ហោះដាក់លក់នៅលើអនឡាញ ពិតជាទាក់ទាញនិងមានភាពងាយស្រួលក្នុងការទិញ ដោយមិនចាំបាច់ចេញពីផ្ទះ។ ហេតុផលបែបនេះហើយ ទើបធ្វើឲ្យអ្នកត្រេកត្រអាលចង់ទិញ ទប់អារម្មណ៍មិនជាប់ យូរៗទៅវាបណ្តាលទៅជាទម្លាប់អាក្រក់ ចេះតែចង់ចំណាយលុយគ្មានហេតុផល ហើយពេលខ្លះអ្នកបានខ្ជះខ្ជាយលុយទៅលើឥវ៉ាន់ដែលមិនចាំបាច់បាច់ទាល់តែសោះ

៨. ទិញរបស់ដែលមានគុណភាពល្អ

ចង់សន្សំសំចៃ គួរពិចារណាពិនិត្យមើលគុណភាពឲ្យបានត្រឹមត្រូវមុននឹងទិញ។ ស៊ូចំណាយលុយច្រើនជាងបន្តិច ដើម្បីបានទំនិញល្អយកមកប្រើប្រាស់បានយូរ ប្រសើរជាងទិញរបស់ថោកៗធូរថ្លៃ ប៉ុន្តែគុណភាពអន់ ដែលត្រូវចំណាយលុយច្រើនលើកច្រើនសា។

ការចំណាយលុយមិនអាចពឹងផ្អែកតម្រូវតែលើអារម្មណ៍បានឡើយ។ វាអាស្រ័យទៅលើតម្រូវការ និងចេះគិតគូរពីហានិភ័យទៅថ្ងៃមុខ ទើបមិនបណ្តាលឲ្យអ្នកចាយវាយតាមចិត្តចង់ និងសល់លុយសម្រាប់ខ្លួនឯងផងដែរ៕