សញ្ញាទាំង ៥ បង្ហាញថា អ្នកមិនបានស្រឡាញ់ខ្លួនឯងដូចដែលអ្នកគិតឡើយ

2020-05-05 04:15:00
ចំនួនមតិ 0 | ចំនួនចែករំលែក 0

ក្ដីស្រឡាញ់ចំពោះខ្លួនឯង គឺជាក្ដីស្រឡាញ់ដែលធំធេង និង សំខាន់បំផុតក្នុងឆាកជីវិតមនុស្សម្នាក់ៗ។ តែគួរឲ្យស្ដាយ ដែលពេលខ្លះអ្នកខិតខំចំណាយពេលវេលា និង កម្លាំងកាយ ចិត្ត ដើម្បីផ្ដល់ក្ដីស្រឡាញ់ទៅកាន់អ្នកដទៃ ឬ មនុស្សជុំវិញខ្លួនអស់១០០% ដោយគ្មានសេសសល់អ្វីសម្រាប់ខ្លួនឯង។ ពេលនោះហើយ អ្នកដែលចាប់ផ្ដើមមានអារម្មណ៍ថាហត់នឿយ និង លែងស្គាល់ខ្លួនឯងជាអ្នកណា។ ដូច្នេះ មកដឹងសញ្ញាទាំង ៥ ដែលបង្ហាញថា អ្នកមិនបានស្រឡាញ់ខ្លួនឯងដូចអ្នកគិតឡើយ៖

រូបតំណាង

**១. អ្នកលែងស្គាល់ខ្លួនឯង៖** អ្នកនឹងមានអារម្មណ៍ថា ដូចបានផ្ដាច់ចេញពីធាតុពិតដែលជាអ្នក ហើយអ្វីៗដែលអ្នកធ្វើគឺដើម្បីការផ្គាប់ចិត្ត និង ចុះសម្រុងជាមួយអ្នកដទៃ ដោយមិនបានខ្វល់ថាខ្លួនកំពុងតែធ្វើទង្វើដែលមិនមែនជាខ្លួនឯងហើយ។

២. អ្នកមិនខ្វល់ពីសុខភាពខ្លួនឯង៖ មនុស្សដែលស្រឡាញ់ខ្លួនឯង ជានិច្ចកាលតែងគិតគូដល់បញ្ហាសុខភាពរបស់ខ្លួន ហើយមានការប្រុងប្រយ័ត្នខ្ពស់ទៅលើការហូបចុក ជាពិសេសចៀសវាងដាច់ខាតនូវ ការសេពគ្រឿងស្រវឹង ជក់បារី ឬ ប្រើប្រាស់គ្រឿងញៀនជាដើម។

រូបតំណាង

៣. អ្នកចង់រត់គេចពីខ្លួនឯង៖ នៅពេលដែលជីវិតជួបប្រទះនូវឧបសគ្គណាមួយ អ្វីដែលអ្នកចង់ធ្វើមុនគេគឺ រត់គេចឲ្យផុត។ វាមិនត្រឹមតែសបញ្ជាក់ឲ្យឃើញថា អ្នកជាមនុស្សចូលចិត្តគេចពីបញ្ហានោះទេ តែវាក៏បង្ហាញថាអ្នកមិនបានស្រឡាញ់ខ្លួនឯងគ្រប់គ្រាន់ទៀតផង។

៤. អ្នកទ្រាំនៅក្នុងទំនាក់ទំនងមិនល្អ៖ មិនថាទំនាក់ទំនងក្នុងន័យស្នេហា ឬ មិត្តភាព អ្នកតែងជាមនុស្សដែលសុខចិត្តសម្ងំទ្រាំទ្រនូវទង្វើគ្រប់យ៉ាងរបស់ភាគីម្ខាងទៀត។ ការស្រឡាញ់ខ្លួនឯងពិតប្រាកដ គឺការហ៊ានដើរចេញពីបុគ្គលដែលមិនឲ្យតម្លៃអ្នក និង គ្មានផ្ដល់អ្វី ក្រៅពីភាពឈឺចាប់ និង ទុក្ខកង្វល់។

រូបតំណាង

៥. អ្នកមានអារម្មណ៍ថាគ្មានភាពរីករាយក្នុងជីវិត៖ នៅពេលដែលអ្នកមានអារម្មណ៍បែបនេះ អ្នកត្រូវឈប់ ហើយសួរខ្លួនឯងថា តើអ្វីទៅដែលបានឆក់យកក្ដីរីករាយពីអ្នក? ពោលគឹត្រូវមើលទៅក្រោយ ហើយនឹករឭកដល់ហេតុផលដែលធ្វើឲ្យអ្នកសម្រេចចិត្តជ្រើសរើសជីវិតដែលអ្នកកំពុងរស់នៅសព្វថ្ងៃ។

ដូច្នេះ បើអ្នកមានលេចចេញនូវសញ្ហាទាំង ៥ ខាងលើ អ្នកគប្បីប្តូរមកគិតគូពីក្ដីសុខរបស់ខ្លួនមុនអ្វីៗទាំងអស់។ ជួនកាល រឿងតូចតាចបំផុតដែលអ្នកមិនបានចាប់អារម្មណ៍ អាចធ្វើឲ្យអ្នកស្វែងរកខ្លួនអ្នកកាលពីមុន ផ្ដល់ជូននូវភាពរីករាយដល់អ្នកវិញ និង អាចធ្វើឲ្យស្រឡាញ់ខ្លួនឯងសារជាថ្មីក៏ថាបាន៕

ចុចអានបន្ត៖ ៨ យ៉ាងចាំបាច់ត្រូវធ្វើ ពេលអ្នករួចរាល់ក្នុងការក្លាយជាមនុស្សថ្មី

ប្រភព៖ powerofpositivity ប្រែសម្រួល៖ Siyou Tang