រៀនតាមស្ទីលធ្វើខ្លួនរបស់ Taeyeon ទោះអាយុ៣១ឆ្នាំ នៅតែក្មេងស្អាតដូច១៨ឆ្នាំ

2020-05-04 08:55:00
ចំនួនមតិ 0 | ចំនួនចែករំលែក 0

ទោះបីជាស្ថិតក្នុងវ័យ៣០ប្លាយហើយក៏ដោយ តែកំពូលតារាចម្រៀងស្រីកូរ៉េ Taeyeon នៅតែរក្សាបានសម្រស់សាច់ចាំ មិនខុសពីយុវវ័យ ដោយស្ទីលតែងខ្លួនថ្មីៗរបស់ខ្លួន។

គិតមកដល់ពេលនេះ តារាចម្រៀងស្រីជួរមុខកូរ៉េ Kim Tae Yeon បានបោះជើងចូលសិល្បៈរយៈពេល១៣ឆ្នាំមកហើយ។ ក្រៅពីជាប្រធានក្រុម នៃក្រុមចម្រៀងលំដាប់ A ក្នុងក្រុមGirls’ Generation នោះ ស្រីស្អាតវ័យ៣១ឆ្នាំរូបនេះ ក៏មានអាជីពចម្រៀងទោលល្បីរន្ទឺមិនធម្មតាដែរ។ ដោយគ្រប់បទទោលរបស់តារាមកពីផលិតកម្ម SM សុទ្ធតែទទួលបានជោគជ័យទាំងអស់។

Taeyeon ត្រូវបានទស្សនិកជនចាត់ទុកថា ជាតារាចម្រៀងដែលមិនត្រឹមតែមានសមត្ថភាពនោះទេ រូបសម្រស់របស់នាងក៏បានទាំងព្រមផងដែរ។ ជាក់ស្ដែង ប្រៀបធៀបនឹងកាលពី១៣ឆ្នាំមុន អាចនិយាយបានថា តារារូបនេះគ្មានអ្វីផ្លាស់ប្ដូរឡើយ ដោយអ្នកខ្លះបានលើកឡើងថា ស្រីស្អាតរូបនេះ ចង់ក្មេងជាងពីមុនផង។

ដើម្បីរក្សាបានរូបសម្បត្តិបែបនេះ តារាកើតឆ្នាំ១៩៨៩ និយមស្ទីលតែងខ្លួនបែបយុវវ័យ ទោះបីជានាងមានអាយុក្រៅសាមសិបហើយក៏ដោយ។ យោងតាមអ្នកផាត់មុខផ្ទាល់ខ្លួនរបស់ម្ចាស់បទ Four Seasons, Taeyeon ចូលចិត្តប្រើទ្រនាប់ស្ដើង និងភ្លឺជាងស្បែកធម្មជាតិមួយលេខដើម្បីមើលទៅក្មេងជាងវ័យ។

គូល័រថ្ពាល់គឺជាអាវុធសម្ងាត់ដែលស្រីស្អាតនេះមិនដែលចោលឡើយ តែនាងនិយមប្រើពណ៌ស្រាលៗ។ ការគូរខ្ទង់ច្រមុះបែបធម្មជាតិក៏ជួយឲ្យទម្រង់មុខរបស់ Taeyeon មានជម្រៅជាងមុន។ និយាយពីភ្នែកវិញ ប្រសិនបើមិនមែនជាកម្មវិធីធំៗ សិល្បការិនីវ័យ៣១ឆ្នាំ នឹងលាបតែម៉ាស្ការ៉ាប៉ុណ្ណោះ ដោយមិនប្រើពណ៌ភ្នែកឡើយ ដើម្បីឲ្យមើលឃើញភ្នែកថ្លា។ ក្រៅពីនេះ នាងមិនដែលចេញក្រៅផ្ទះ ដោយមិនប្រើឡេការពារកម្ដៅឡើយ៕

អានបន្ត៖ ថាបានគឺធ្វើបាន ស្រីស្អាតម៉ាឡេស៊ី ប្ដេជ្ញាចិត្តសម្រកពី ១២២គីឡូ ឡើងស្អាតមើលមិនស្គាល់

ប្រភព៖ Phunutoday ប្រែសម្រួល៖ Caramel