សំបុត្រផ្ញើជូនខ្លួនឯង ទុកអានពេលមានអារម្មណ៍ថាទន់ជ្រាយ
- 2020-04-28 05:23:00
- ចំនួនមតិ 0 | ចំនួនចែករំលែក 0
សំបុត្រផ្ញើជូនខ្លួនឯង ទុកអានពេលមានអារម្មណ៍ថាទន់ជ្រាយ
ជូនចំពោះខ្លួនឯង!
ពេលកន្លងមកខ្ញុំដឹងថាខ្ញុំតែងតែពឹងពាក់លើអ្នក។ ពេលខ្លះអ្នកយំ ពេលខ្លះអ្នកសើច ពេលខ្លះសប្បាយ ពេលខ្លះក៏កើតទុក្ខ។ ខ្ញុំដឹងថាអ្នកពិតជានឿយហត់ខ្លាំងណាស់ ហើយខ្ញុំក៏ដឹងថាអ្នករឹងមាំប៉ុនណាដែរ? រឿងអាក្រក់បានកន្លងផុតទៅ ស្អែកថ្មីចូលមកដល់ ខ្ញុំនឹងប្រាប់អ្នកថាគួរគិតបែបណាទើបល្អ។
១. ស្រលាញ់ខ្លួនឯងឲ្យបានច្រើន មើលថែខ្លួនឲ្យល្អ។ កុំខ្វល់ពីមនុស្សដែលមិនខ្វល់ពីយើង។
២. កុំឲ្យតម្លៃរបស់ក្រៅខ្លួនខ្លាំងជាងចិត្តគំនិត កុំឲ្យតម្លៃលុយខ្លាំងជាងស្នេហា។
៣. សន្សំបុណ្យកុសលដោយការមើលថែរក្សាឪពុកម្តាយដែលព្រះរស់នៅក្នុងផ្ទះ ចាំទៅធ្វើបុណ្យនៅវត្តតាមក្រោយ។
៤. រឿងណាអាចជួសជុលកែលម្អបាន គួរធ្វើឲ្យរួចរាល់មិនទុកយូរ ហើយបើអ្វីៗមិនអាចផ្លាស់ប្តូរបានទេ ក៏មិនត្រូវដេកកើតទុក្ខមិនស្រណុកចិត្តដែរ រឿងហួសហើយ ឲ្យវាកន្លងផុតទៅចុះ។
៥. ពេលជួបបញ្ហា ត្រូវប្រាប់ខ្លួនឯងថា វាជារឿងធម្មតា នរណាក៏ធ្លាប់ជួបប្រទះដែរ។ រៀនរស់នៅជាមួយបញ្ហា ប៉ុន្តែកុំឲ្យបញ្ហានៅជាមួយអ្នកយូរពេក។
៦. ដួលហើយងើបឡើងវិញពីចំណុចសូន្យ គ្មានអ្វីត្រូវខ្លាច។ គេដើរទៅមុនមិនប្រាកដថាលឿនជាងអ្នក។ បោះជំហានបង្ហាញភាពក្លាហាន ឲ្យអ្នកដទៃបានឃើញ ពីចំណុចខ្លាំងរបស់អ្នក។
៧. កុំអន់ចិត្តនឹងសម្រស់ព្រោះអ្នកស្អាតណាស់ កុំច្រណែននឹងសេដ្ឋីព្រោះលុយប៉ុណ្ណឹងក៏ចាយគ្រាន់រស់ស្រួលដែរ កុំប្រៀបធៀបខ្លួនទៅមនុស្សខ្ពស់ហួសមេឃព្រោះបានប៉ុនសព្វថ្ងៃនេះហើយ អ្នកមានទៅអន់អីឯណា។
៨. រាងកាយអ្នកមិនមែនជាម៉ាស៊ីន បើហត់សម្រាកខ្លះទៅ ដកដង្ហើមឲ្យស្រួលបន្តិច សឹមចាប់ផ្តើមបន្ត។
ដេកឲ្យលក់ស្រួល ក្រោកឡើងព្រឹកស្អែកថ្ងៃថ្មីអារម្មណ៍ល្អ មានគំនិតថ្មីៗ ហើយក៏អរគុណដែលអ្នករឹងមាំមកដល់ពេលនេះ និងអាចមានជំហរជាខ្លួនអ្នកមិនផ្លាស់ប្តូរ សូមបន្តភាពរឹងមាំតទៅទៀត។
ចុចអានបន្ត៖ រូបភាពបកអាក្រាតការពិតជាក់ស្តែងក្នុងសង្គមសព្វថ្ងៃ