រឿង៦យ៉ាងគួរធ្វើដើម្បីកាត់ចិត្តពីសង្សារចាស់ កុំឲ្យខ្លួនឯងឈឺចាប់មិនឈប់

2020-04-23 08:05:00
ចំនួនមតិ 0 | ចំនួនចែករំលែក 0

ស្នេហាដែលគិតថានឹងដើរជាមួយគ្នា តែបែរជាដើរដល់ផ្លូវបញ្ចប់ ច្បាស់ជាមានអ្នករងទុក្ខជាមិនខាន។ យ៉ាងណាក៏ដោយ ឈឺចចាប់ព្រោះស្នេហាយូរពេក មិនខុសពីកំពុងកប់ខ្លួនឯងទាំងរស់នោះឡើយ។ ម្ល៉ោះហើយ អ្វីដែលត្រូវធ្វើ គឺព្យាយាមកាត់ចិត្តបំភ្លេចស្នេហាដែលបានចាកចោលអ្នកទៅហើយ។

រូបតំណាង

**១. គាត់កើតមកមិនមែនជាគូព្រេងរបស់អ្នក**

ក្នុងលោកនេះ បានកំណត់រួចហើយថានរណាជាគូនឹងគ្នា ដូច្នេះកុំខកចិត្តអី បើសិនជួបស្នេហ៍មិនសមបំណង ប្រហែលជាគូអ្នកមិនទាន់មកដល់ក៏ថាបាន។

រូបតំណាង

២. កុំស្ដីបន្ទោសដាក់ខ្លួនឯង

ការកាត់ចិត្តពីអ្នកណាម្នាក់ពិតជាលំបាកណាស់ រហូតពេលខ្លះនារីមួយចំនួនគិតថាបើខ្លួនខំប្រឹង ឬសម្របជាមួយគាត់បន្ថែមជាងនេះបន្តិច នោះច្បាស់ជាល្អមិនខាន។ តែសូមបញ្ឈប់ការគិតបែបនេះទៀតទៅ ព្រោះស្នេហារបស់អ្នកបានចប់ហើយ។ កុំនៅសោកស្តាយហើយចង់ការពារគាត់កុំឲ្យចាកចេញទៀត។ គួរតែយកពេលវេលានេះ គិតអំពីការថែទាំខ្លួនឯង បើកបេះដូងទទួលអ្នកថ្មី កុំនៅគិតលើស្នេហាចាស់បន្តទៀត។

រូបតំណាង

៣. ឈប់ខ្វាយខ្វល់ពីរឿងរបស់គាត់ទៀត

លប់លេខទូរសព្ទរបស់គាត់ចោល ហើយក៏មិនបាច់ធ្វើជាមិត្តក្នុង social media ជាមួយគាត់បន្តទៀតដែរ។ រឹតតែកុំចូលមើល Story គេ កុំលួចទៅតាមដាន Profile គេ ចង់ដឹងអ្វីពីគេបន្តទៀតអី។ បើសិនពិតជាចង់ចប់មែន គួរតែកាត់ចិត្តពីបុរសម្នាក់នោះទៅ។ ត្រូវគិតថា រវាងអ្នកនិងគេ គឺរស់នៅក្នុងពិភពផ្សេងគ្នា ម្ល៉ោះហើយមិនថារឿងអ្វីដែលពាក់ព័ន្ធនឹងគាត់នោះទេ គឺសុទ្ធតែជារឿងឥតប្រយោជន៍ទាំងអស់។

រូបតំណាង

៤. ដាច់ខាតត្រូវតែទទួលស្គាល់ថា ស្នេហានេះបានស្លាប់ហើយ

យកពេលនេះប្រាប់ខ្លួនឯងថា ស្នេហានេះដល់ផ្លូវបំបែកហើយ។ រឿងរ៉ាវរវាងអ្នកនិងគាត់គឺមិនអាចបន្តបានទៀតទេ ដូចនេះមានតែអនុញ្ញាតឲ្យវាចាកចេញនិងទៅឲ្យអស់។ ព្យាយាមប្រាប់បេះដូងខ្លួនឯងឲ្យគិតស៊ីជម្រៅពីរឿងនេះ ពីព្រោះបើអ្នកនៅតែមិនព្រមទទួលយកការពិតទេ នោះជីវិតអ្នកកាន់តែជួបការលំបាកមិនខាន។

រូបតំណាង

៥. កុំរំលឹកអនុស្សាវរីយ៍ចាស់

ធម្មតា មនុស្សធ្លាប់ស្រលាញ់គ្នា ប្រាកដជាធ្លាប់ចែករំលែកការចងចាំល្អៗជាមួយគ្នាមិនខាន ដូចជា បទចម្រៀង មើលកុន ដើរលេងជាមួយគ្នា ញ៉ាំអាហារ ឬធ្វើរឿងសប្បាយៗជាមួយគ្នាជាដើម។ ហេតុនេះហើយ ប្រសិនបើអនុស្សាវរីយ៍ទាំងនេះស្រាប់តែផុសឡើងវិញ អ្នកគួរធ្វើចិត្តឲ្យរឹងមាំ ចៀសវាងចង់គិតចាប់ផ្ដើមជាមួយគាត់ម្ដងទៀត។

រូបតំណាង

៦. ធ្វើរឿងណាដែលសប្បាយៗ

បើអ្នកនៅតែធ្វើឲ្យខ្លួនឯងឈឺចាប់ ទឹកភ្នែកដោយសារតែគេទៀត របួសបេះដូងគ្មានថ្ងៃជាសះស្បើយឡើយ។ ហេតុនេះហើយ គួរតែងាកមកបន្លប់ចិត្តដោយការលេងហ្គេម លេងតន្រ្តី ច្រៀងកម្សាន្តលេង ឬរាំជាដើម។ បើអ្នកមិនអាចចេញក្រៅដើរលេងបានទេ អាចមើលកម្មវិធីដើរលេងនៅក្នុងស្រុកនិងក្រៅស្រុកតាមអ៊ីនធឺណេត។ ឬទៅធ្វើម្ហូបឆ្ងាញ់ៗទុកញ៉ាំលេង ហើយកុំរង់ចាំបុរសម្នាក់នោះទៀត។ កុំអង្គុយសម្រក់ទឹកភ្នែកព្រោះគេយូរពេក សូមចាកចេញពីពិភពខ្មៅងងឹតនេះ ហើយបញ្ជូនខ្លួនឯងទៅពិភពថ្មីមួយទៀតដែលស្រស់បំព្រងជាងនេះ៕

អានបន្ត៖ មួយជាតិកើតមកជាមនុស្សស្រី សួរថាអ្នកណាមិនចង់មានមនុស្សម្នាក់យកចិត្តទុកដាក់ជាមួយខ្លួននោះ

ប្រភព៖ Spiceee ប្រែសម្រួល៖ លឹម សុនា