២ វិធី កម្ចាត់មុនខ្នង នៅផ្ទះដោយខ្លួនឯង

2020-04-23 06:00:00
ចំនួនមតិ 0 | ចំនួនចែករំលែក 0

បញ្ហាមុនខ្នង បានកើតមានចំពោះមនុស្សស្ទើរគ្រប់គ្នា គ្រាន់តែតិចឬច្រើនតែប៉ុណ្ណោះ។ សម្រាប់ការព្យាបាល អាចនឹងពិបាកជាងមុនដែលកើតនៅលើមុខទៅទៀត។ ដោយសារតែផ្នែកខ្នង មិនមែនងាយស្រួលក្នុងការដុសសម្អាត និងលាបថ្នាំឲ្យជាស្បើយនោះឡើយ។ វិធីដ៏ល្អបំផុតដែលអ្នកមិនគួរមើលរំលង គឺស្រ្កាប់ធម្មជាតិ ដែលអាចលាយនៅផ្ទះដោយខ្លួនឯង ដើម្បីយកមកខាត់លើស្បែកខ្នងដែលមានបញ្ហា ជម្រុះកោសិកាចាស់ៗ ធ្វើឲ្យស្បែកខ្នងបាត់មុន និងម៉ដ្ឋរលោងសាជាថ្មី។

អ្នកអាចជ្រើសរើសវិធីណាមួយក្នុងចំណោមវិធីទាំង១ ដូចខាងក្រោម៖

វិធីទី១

គ្រឿងផ្សំ៖ ម្សៅល្មៀត+ ត្រសក់+ ស៊ុត (យកតែផ្នែកស)

វិធីធ្វើ៖ លាយគ្រឿងផ្សំទាំង៣មុខចូលគ្នា កូរឲ្យសព្វ បន្ទាប់មកយកមកលាបដុសខាត់ថ្នមៗលើខ្នង និងកន្លែងដែលកើតមុន។ ទុកចោលពី ១៥-២០ នាទី ទើបអាចលាងចេញជាមួយទឹកស្អាត។ អាចធ្វើពី ២-៣ ដងក្នុងមួយសប្តាហ៍។

ម្សៅល្មៀតត្រូវបានមនុស្សភាគច្រើនទទួលស្គាល់ថា ជាអ្នកជំនាញផ្នែកថែរក្សាសម្ផស្ស ជាពិសេសបញ្ហាមុនតែម្តង។ ប្រសិនបើលាយជាមួយនឹងត្រសក់ហើយស៊ុតបន្ថែម វាអាចជួយកែបញ្ហាមុនបានយ៉ាងមានប្រសិទ្ធភាព។

វិធីទី២

គ្រឿងផ្សំ៖ ស្រូវសាឡី+ ប្រេងអូលីវ

វិធីធ្វើ៖ យកស្រូវសាឡីកិនឲ្យម៉ដ្ឋ រួចលាយចូលគ្នាជាមួយប្រេងអូលីវឲ្យមានសភាពខាប់ល្មម បន្ទាប់មកយកមកលាបដុសខាត់ថ្នមៗលើខ្នង និងកន្លែងដែលកើតមុន។ ទុកចោលពី ១៥-២០ នាទី ទើបអាចលាងចេញជាមួយទឹកស្អាត។ អាចធ្វើពី ២-៣ ដងក្នុងមួយសប្តាហ៍។

ស្រូវសាឡី មាននាទីចូលទៅជម្រុះកោសិកាចាស់ៗមិនល្អ ផ្គួបផ្សំគ្នាជាមួយនឹងប្រឹងអូលីវ កាន់តែមានប្រសិទ្ធភាពទ្វេដង ក្នុងការកម្ចាត់មុនខ្នង ធ្វើឲ្យស្បែកម៉ដ្ឋរលោង។

វិធីសំខាន់ផ្សេងៗ ដែលអាចជួយរក្សាអនាម័យនិងទប់ស្កាត់មិនឲ្យកើតមុនលើខ្នង

មុននឹងធ្វើការដុសខាត់តាមវិធីធម្មជាតិដែលបានរៀបរាប់ខាងលើ ត្រូវងូតទឹកដុសសម្អាតខ្លួនជាមួយសាប៊ូឲ្យបានស្អាតល្អសិន។
ស្លៀកសម្លៀកដែលមិនស្អុះស្អាប់ រឹបតឹងខ្លាំងពេក និងត្រូវផ្លាស់ប្តូរជាប្រចាំ។
ជៀសវាងខោអាវណា ដែលមិនអាចបញ្ចេញញើសមកខាងក្រៅ និងឲ្យអ្នកហប់។
ជៀសវាងការអេះ ឬត្រដុសខ្លាំងៗ ដែលអាចបណ្តាលឲ្យមុនកាន់តែរីករាលដាល កាន់តែពិបាកកែខៃ៕

ចុចអានបន្ត៖ ទម្លាប់ ៤ ប្រចាំថ្ងៃងាយធ្វើឲ្យស្បែកខូចដោយមិនដឹងខ្លួន

ប្រភព៖ bestie ប្រែសម្រួល៖ ដេត ឈុនអ៉ី