គួរចៀសវាងធ្វើរឿងអស់ទាំងនេះ បើមិនចង់បាត់លាភសំណាងនៅថ្ងៃចូលឆ្នាំចិន

2020-01-23 02:25:00
ចំនួនមតិ 0 | ចំនួនចែករំលែក 0

ប្រជាជនចិនជឿថា បុណ្យចូលឆ្នាំចិនឬបុណ្យនិទាឃរដូវជាការចាប់ផ្តើមនៃឆ្នាំថ្មី។ ប្រសិនបើអ្នកមិនបានគោរពនិងធ្វើតាមទំនៀមទម្លាប់នោះទេ វាអាចនាំឲ្យអ្នកបាត់បង់នូវលាភសំណាង។ ហេតុដូចនេះហើយ អ្នកគួរតែគោរពប្រណិប័តន៍ទៅតាមប្រពៃណីឲ្យបានខ្ជាប់ខ្ជួនពិសេសសម្រាប់បងប្អូនជាប់ខ្សែស្រឡាយចិន។ បម្រាមមិនគួរធ្វើអស់ទាំងនោះរួមមាន៖

១. ហាមប្រើប្រាស់ថ្នាំ

នេះជាបម្រាមសម្រាប់បុគ្គលណាដែលប្រើថ្នាំនៅថ្ងៃចូលឆ្នាំចិនដំបូង ព្រោះប្រសិនបើអ្នកណាទទួលទានថ្នាំ គេជឿថាមនុស្សម្នាក់នោះអាចនឹងឈឺពេញមួយឆ្នាំតែម្តង។ នៅតាមតំបន់មួយចំនួន នៅពេលដែលគេលឺកណ្តឹងប្រាប់ថាថ្ងៃចូលឆ្នាំថ្មីបានមកដល់ហើយ អ្នកជំងឺក៏ស្រវាបំបែកកំប៉ុងថ្នាំភ្លាមដោយគេជឿថាការធ្វើបែបនេះនឹងនាំជំងឺរោគាចេញឆ្ងាយ។

២. ហាមជូតផ្ទះឬយកសំរាមបោះចោល

រូបតំណាង

ការជូតសម្អាតផ្ទះអាចមានន័យថា ជាការបោសសម្អាតទ្រព្យចេញពីផ្ទះ។ រីឯការយកសំរាមបោះចោលមានន័យថា ឆ្កឹះយកទ្រព្យសំណាងល្អចេញពីផ្ទះ។

៣. ហាមទទួលទានបបរឬសាច់នៅពេលព្រឹក

ការទទួលទានបបរពេលព្រឹកគឺជាការហាមប្រាមដោយសារតែគេជឿថា មានតែអ្នកក្រទេដែលទទួលទានបបរជាអាហារពេលព្រឹក។ ចំពោះការទទួលទានសាច់នៅពេលព្រឹកក៏គេហាមមិនឲ្យបរិភោគដែរ ព្រោះថានេះចាត់ទុកជាការមិនគោរពចំពោះព្រះពុទ្ធដែលជាអ្នកមិនសម្លាប់សត្វ។

៤. ហាមបោកសម្លៀកបំពាក់និងកក់សក់

អ្នកមិនគួរបោកសម្លៀកបំពាក់នៅពីរថ្ងៃដំបូងឡើយ ធ្វើបែបនេះដើម្បីគោរពដល់ទេវតាទឹកឬ Shuishen។ សម្រាប់ថ្ងៃដំបូង អ្នកមិនគួរកក់សក់ឡើយ ព្រោះដោយសារពាក្យ សក់ នៅក្នុងភាសាចិនស្រដៀងទៅនឹង ពាក្យ រកស៊ីមានបាន។ ដូច្នេះអ្នកមិនគួរកក់សក់នៅថ្ងៃចូលឆ្នាំចិនដំបូងឡើយ។

៥. ចៀសវាងការដេរប៉ាក់

ការប្រើកាំបិត កន្ត្រៃ និងវត្ថុស្រួចៗផ្សេងទៀតត្រូវបានហាមប្រាមនៅថ្ងៃចូលឆ្នាំចិនដោយសារតែវត្ថុអស់ទាំងនេះអាចនាំឲ្យបាត់បង់ទ្រព្យសំណាង។

៦. កូនស្រីទើបរៀបការរួចគឺហាមមិនឲ្យទៅលេងផ្ទះឪពុកម្តាយខ្លួន

រូបតំណាង

សម្រាប់កូនស្រីដែលរៀបការរួចគឺហាមមិនឲ្យទៅលេងផ្ទះម្តាយរបស់ខ្លួននៅថ្ងៃដំបូងឡើយ ព្រោះនេះជារឿងមិនល្អដែលនាំសំណាងមិនល្អទៅដល់ម្តាយឪពុកឬក៏មានបញ្ហារឿងសេដ្ឋកិច្ចគ្រួសារ។ តាមទំនៀមទម្លាប់ កូនស្រីទៅលេងផ្ទះម្តាយឪពុករបស់ខ្លួនបាននៅថ្ងៃទីពីរ។

៧. មើលថែក្មេងៗកុំឲ្យយំ

រូបតំណាង

ការយំរបស់ក្មេងអាចនាំសំណាងមិនល្អមកដល់គ្រួសារ ដូច្នេះម្តាយឪពុកត្រូវធ្វើយ៉ាងណាក៏ដោយការពារកុំឲ្យពួកគេយំ។

៨. ចៀសវាងការធ្វើឲ្យធ្លាក់របស់របរបែក

ការធ្លាក់របស់របរបែកអាចជាការនាំឲ្យបាត់បង់ទ្រព្យសំណាង។ ហេតុដូចនេះហើយ ចំពោះអ្នកលក់ដូរនិងរកស៊ីវិញតែងមានការប្រុងប្រយ័ត្នចំពោះរឿងមួយនេះ។

៩. ហាមទៅមន្ទីរពេទ្យ

សម្រាប់ការទៅពេទ្យគឺត្រូវបានហាមមិនឲ្យធ្វើចំពោះមនុស្សម្នាក់ៗនៅថ្ងៃចូលឆ្នាំចិនព្រោះវាអាចនាំជំងឺទៅដល់មនុស្សអ្នកនោះ។ អ្នកអាចទៅបានក្នុងករណីណាដែលត្រូវទៅបន្ទាន់ខ្លាំងតែប៉ុណ្ណោះ។

១០. ចៀសវាងមិនឲ្យមានការបាត់របស់របរនិងការខ្ចីលុយគេ

ក្នុងអំឡុងពេលចូលឆ្នាំចិន អ្នកត្រូវមានការប្រុងប្រយ័ត្នចំពោះការបាត់របស់របរពិសេសកាបូបលុយ ព្រោះវាអាចនាំឲ្យអ្នកមានការបាត់ជាបន្តបន្ទាប់នៅ។ ប្រសិនបើមានអ្នកជំពាក់លុយអ្នក ឬខ្ចីលុយ អ្នកគប្បីកុំទៅទារឬឲ្យ នៅអំឡុងពេលចូលឆ្នាំចិនឲ្យសោះព្រោះវានឹងនាំសំណាងមិនល្អដល់អ្នកពេញមួយឆ្នាំ។

១១. ត្រូវរក្សាក្រឡអង្ករឲ្យនៅហូរហៀរ

ក្រឡអង្ករគឺមិនត្រូវឲ្យនៅទទេឡើយ ព្រោះវាអាចលេចចេញជាភាពមិនល្អ ភ័យខ្លាច និងជាប្រថ្នូលមិនល្អសម្រាប់ឆ្នាំថ្មី។

១២. ហាមពាក់សម្លៀកបំពាក់ចាស់ៗនិងពាក់សម្លៀកបំពាក់ពណ៌សឬខ្មៅ

រូបតំណាង

នៅថ្ងៃចូលឆ្នាំចិន អ្នកមិនគួរប្រើសម្លៀកបំពាក់ចាស់ៗឡើយ។ ចំពោះក្មេងៗវិញ គេជឿថាប្រសិនបើប្រើសម្លៀកបំពាក់ចាស់ៗនោះគឺអាចនឹងនាំសំណាងមិនល្អ។ ចំពោះសម្លៀកបំពាក់ពីរពណ៌នេះវិញគឺមិនត្រូវឲ្យប្រើនៅថ្ងៃចូលឆ្នាំចិនឡើយ ព្រោះពណ៌ទាំងពីរនេះតំណាងឲ្យការកាន់ទុក។

១៣. ហាមសម្លាប់សត្វ

ចាប់ពីថ្ងៃទីមួយរហូតទៅដល់ថ្ងៃទីដប់ប្រាំ មិនត្រូវឲ្យមានការសម្លាប់សត្វឡើយព្រោះវាជាប្រថ្នូរមិនល្អ។

១៤. ការជូនអំណោយមិនសមរម្យ

សម្រាប់អំណោយនៅថ្ងៃចូលឆ្នាំចិន អ្នកត្រូវមានការប្រុងប្រយ័ត្នក្នុងការជូនទៅបងប្អូនសាច់ញាតិ។ អ្នកគួរចៀសវាងជូនកាដូរមួយចំនួនដូចជា នាឡិកា កន្ត្រៃនិងផ្លែសេ៊រីព្រោះរបស់អស់ទាំងនេះមានអត្ថន័យមិនល្អនៅក្នុងវប្បធម៌ចិន។

រូបតំណាង៖ Pinterest

ចុចអានបន្ត៖

សម្ភារៈតុបតែងមានលាភហុងស៊ុយ គួរត្រៀមឲ្យត្រូវក្បួនក្នុងថ្ងៃចូលឆ្នាំចិន

ប្រភព៖ China Highlights ប្រែសម្រួល៖ សុវណ្ណ ស្រីពីន