ទើបធ្លាយរូបចូលសណ្ឋាគារជាមួយប្រុសថ្មីសោះ Yang Mi ត្រូវគេទម្លាយក្រដាសពិនិត្យផ្ទៃពោះបាត់

2019-12-12 03:20:00
ចំនួនមតិ 0 | ចំនួនចែករំលែក 0

កំពូលតារាសម្ដែងស្រីចិន Yang Mi ត្រូវគេសង្ស័យថាកំពុងមានផ្ទៃពោះមានស្នេហាថ្មី ក្រោយពេលកម្រងរូបភាពនាង និងគេបណ្ដើរគ្នាចូលសណ្ឋាគារត្រូវបានគេទម្លាយ។

កាលពីព្រឹកថ្ងៃទី១០ ខែធ្នូកន្លងទៅនេះ បណ្ដាញព័ត៌មាន Ifeng បានធ្វើឲ្យទស្សនិកជនភ្ញាក់ផ្អើលគ្រប់គ្នា នៅពេលប្រភពខាងលើនេះបានទម្លាយកម្រងរូបភាពរបស់តារាសម្ដែងស្រីជួរមុខចិន Yang Mi និងតារាសម្ដែងប្រុស Wei Daxun បណ្ដើរគ្នាចូលសណ្ឋាគារមួយកន្លែង ដែលមានទីតាំងជិតកន្លែង Yang Mi កំពុងថតរឿង។

តាមនោះដែរ នៅក្បាលព្រលប់ ខាងប្រុសបានចូលស្នាក់នៅក្នុងសណ្ឋាគារខាងលើ ដល់ម៉ោងប្រហែល១០យប់ តួរឿង Eternal Love បានត្រលប់មកពីការថតរឿងវិញ ហើយចូលស្នាក់នៅទីនេះដែរ រហូតដល់ម៉ោង៦ភ្លឺ ទើបគេឃើញខាងប្រុសលួចលាក់ចេញមក។

ខណៈរឿងរ៉ាវខាងលើមិនទាន់ស្ងប់ស្ងាត់វិញផង ស្រាប់តែមុននេះបន្តិច អ្នកកាសែតម្នាក់ បានទម្លាយរូបភាពទៅពិនិត្យសុខភាពរបស់ស្រីស្អាតវ័យ៣៣ឆ្នាំ ដោយបង្ហាញថា នាងកំពុងមានផ្ទៃពោះទៀតផង។ ប៉ុន្តែអ្នកគាំទ្រមិនទាន់ដឹងនៅឡើយទេថា រូបភាពខាងលើ គឺពិតឬអត់។ ប្រឈមមុខនឹងរឿងនេះ ភាគីទាំងប្រុសស្រី មិនទាន់ចេញមុខបកស្រាយនៅឡើយទេ គឺសម្ងំស្ងាត់ជ្រាបតែម្ដង។

គួរបញ្ជាក់ផងដែរថា ស្រីស្រស់ប្រុសស្អាតមួយគូនេះ ចាប់ផ្ដើមស្គាល់គ្នា ក្រោយចូលរួមលេងក្នុងកម្មវិធី ទូរទស្សន៍មួយ ហើយ Wei Daxun គឺជាមិត្តរបស់ Harwick Lau ដែលជាអតីតស្វាមីរបស់ Yang Mi តែម្ដង៕