រូបមន្តលាងជម្រះមុខ មិនបណ្តាលឲ្យស្បែកស្ងួតពេលរដូវរងាចូលមកដល់
- 2019-10-04 08:50:00
- ចំនួនមតិ 0 | ចំនួនចែករំលែក 0
រូបមន្តលាងជម្រះមុខ មិនបណ្តាលឲ្យស្បែកស្ងួតពេលរដូវរងាចូលមកដល់
រដូវរងាមកដល់ ស្បែកឆាប់ស្ងួតនិងកើតមុនណាស់។ ម្ល៉ោះហើយ នារីជាច្រើនបារម្ភ និងធុញទ្រាន់។ តែកុំបារម្ភអី តាមក្បួនងាយៗខាងក្រោមអ្នកនឹងនៅតែបានស្បែកមុខមានសំណើមជាប់ជានិច្ច ទោះរដូវរងាក៏ដោយ។
១. លាងជម្រះគ្រឿងសម្អាងមុនលាងហ្វូម
នារីច្រើនរូបយល់ថា ជំហាននេះអត់ប្រយោជន៍ជាហេតុពួកគេតែងមើលរំលង។ យ៉ាងណាក៏ដោយ ការប្រើ Makeup Remover ត្រូវបានគេចាត់ទុកជាជំហានសំខាន់មុនពេលអ្នកឈានដល់ការលាងមុខ។ ទោះអ្នកមិនផាត់ម្សៅក៏ដោយ គ្រាន់តែប្រើឡេការពារកំដៅថ្ងៃក៏អ្នកនៅតែប្រើ Makeup Remover ដើម្បីសម្អាតភាពកខ្វក់និងគ្រឿងសម្អាងពីស្បែករបស់អ្នកដែរ ដើម្បីលាងជម្រះបានស្អាតល្អតាមរន្ធញើស។
២. ជ្រើសហ្វូមមាន PH ត្រឹមត្រូវ
ចំណុចនេះក៏នារីជាច្រើនមើលរំលងដែរ។ អ្នកគួរជ្រើសហ្វូមមាន PHប្រហែល 5.5 ដែលមានការបរិច្ឆេទត្រឹមត្រូវ។
៣. ប្រើផលិតផលសមនឹងប្រភេទស្បែក
សម្រាប់អ្នកមានស្បែកខ្លាញ់ងាយកើតមុន ត្រូវប្រើហ្វូមលាងមុខ។ ស្បែកស្ងូតត្រូវប្រើគ្រីមសម្រាប់សម្អាតមុខ (Cream Cleanser) ព្រោះវាផ្ទុកជាតិសំណើមច្រើន អាស៊ីតខ្លាញ់ដែលជួយស្បែកទន់មានសំណើមបានយូរ។ បើអ្នកមានស្បែកស្ងួតលាយខ្លាញ់ ត្រូវប្រើហ្វូមអំឡុងពេលថ្ងៃ ដើម្បីកំណត់ជាតិខ្លាញ់លើតំបន់ T-Zone។ ចំពោះអ្នកស្បែកមុខប្រតិកម្ម មិនត្រូវប្រើហ្វូមមានជាតិកាត់ខ្លាំង នោះឡើយ។
៤. ចៀសវាងផលិតផលផ្ទុកសារជាតិផូស្វាត
មុនសម្រេចចិត្តទិញផលិតផល ត្រូវមើលសារធាតុផ្សំនោះសិន ព្រោះផលិតផលមានជាតិផូស្វាតធ្វើឲ្យស្បែកអតុល្យភាព។
៥. លុបមុខដោយទឹកក្ដៅឧណ្ឌៗ
ទឹកក្ដៅពេកនឹងធ្វើឲ្យស្បែកបាត់បង់ជាតិប្រេងធម្មជាតិលើផ្ទៃមុខ ហើយប្រែជាស្ងួត។ អ្នកគួរលាងមុខដោយទឹកក្តៅឧណ្ឌៗដើម្បីសម្អាតកំទេចកំទីលើស្បែកមុខ។ ចំពោះតំបន់កវិញ ក៏ត្រូវខ្វល់ខ្វាយដែរ ដូច្នេះត្រូវលាងសម្អាតដូចគ្នា។
៦. ម៉ាស្សាឲ្យបានមួយនាទី
ក្រោយពីលាងមុខហើយ ប្រើម្រាមដៃម៉ាស្សាមុខតាមទិសដៅត្រឹមត្រូវដោយចាប់ពីក្រោមឡើងលើ កុំឲ្យស្បែកយារធ្លាក់។ ម្យ៉ាងទៀត កុំភ្លេចលាងដៃឲ្យស្អាតផងពេលម៉ាស្សា។
៧. កុំទុកមុខចោលឲ្យហួសមួយនាទីដោយគ្មានលាបអ្វីសោះ
ពេលលាងមុខរួច ស្បែកនឹងទទួលបានជាតិសំណើមភ្លាមៗ ដូច្នេះត្រូវលាបឡេដើម្បីសំណើមបានយូរ។
៨. កុំភ្លេចសម្អាតមុខទាំងពេលព្រឹកនិងយប់
បើអ្នកគិតថា ពេលយប់អ្នកលាងមុខរួចហើយ ដូច្នេះពេលព្រឹកមិនបាច់លាងសម្អាតមុខដោយហ្វូមទេ នោះអ្នកគិតខុសហើយ។ តាមពិត ស្បែកធ្វើការហើយបញ្ចេញកោសិកាចាស់ៗនៅពេលយប់។ ម្ល៉ោះហើយ លាងមុខនៅពេលព្រឹកនិងយប់ គឺសំខាន់ដូចគ្នា៕
ចុចអាន៖ បែងចែកមិនដាច់ថាស្បែកមុខខ្លួនឯងស្ងួតឬខ្លាញ់ មកដឹងវិធីស្គាល់ប្រភេទស្បែកមុខ