ប្រាក់ខែ១៥០០ដុល្លារ ពេលបង្ហាញមុខនៅតែត្រូវម៉ែឪក្មេកតិះដៀលព្រោះមានម្តាយឪពុកលែងលះ
- 2019-09-18 03:00:00
- ចំនួនមតិ 0 | ចំនួនចែករំលែក 0
ប្រាក់ខែ១៥០០ដុល្លារ ពេលបង្ហាញមុខនៅតែត្រូវម៉ែឪក្មេកតិះដៀលព្រោះមានម្តាយឪពុកលែងលះ
មិត្តភ័ក្ដិខ្ញុំចង់ប្រកែកទៅវិញដែរ ដោយសារតែចិត្តនាងត្រង់ តែពេលទទួលបានសញ្ញាពីសង្សាររបស់ខ្លួន នាងបានត្រឹមតែឱនក្បាលចុះវិញ ទប់អារម្មណ៍ទាំងកំពុងឮគេនិយាយមិនល្អពីអ្នកមានគុណរបស់ខ្លួន។
ប៉ាម៉ាក់មិត្តភ័ក្ដិខ្ញុំ លែងលះគ្នាតាំងពីនាងអាយុ២ឆ្នាំ។ រស់នៅជាមួយម៉ែ មានមនុស្សស្រីតែ២នាក់គត់នៅក្នុងផ្ទះ។ ដោយសារហេតុនេះ នាងដឹងថាខ្លួនត្រូវឯករាជ្យ ហើយរឹងមាំ ទើបមើលថែខ្លួនឯងនិងម្ដាយបានល្អ ព្រោះគ្មានអ្នកណាអាចធ្វើរឿងនេះបានក្រៅពីនាងឡើយ។
មិត្តខ្ញុំ និងចិត្រាស្រលាញ់គ្នាបានជិត១ឆ្នាំ ចិត្រាក៏នាំនាងមកណែនាំឪពុកម្ដាយគេ។ ចិត្រាជាបុគ្គលិកក្រុមហ៊ុន ដោយមានប្រាក់ខែ៤០០ដុល្លារមួយខែ។ រីឯមិត្តខ្ញុំចេញធ្វើការតាំងពីនៅរៀនឆ្នាំទី១ ទើបពេលនេះបានក្លាយជាប្រធានផ្នែកនៃក្រុមហ៊ុនមួយទៅហើយ រួមទាំងប្រាក់ខែគឺប្រមាណ១៥០០ដុល្លារ។ ទោះបីជាចំណូលខុសគ្នាស្រឡះក៏ដោយ ក៏មិត្តខ្ញុំមិនដែលអន់ចិត្តនឹងចិត្ត្រានោះឡើយ។
ឪពុកម្ដាយចិត្ត្រាសុទ្ធតែជាមន្ត្រីរដ្ឋចូលនិវត្តន៍អស់ហើយ និងជាគ្រួសារដែលមានទំនៀមទម្លាប់តឹងតែង។ ការណាត់ជួបគ្នាលើកដំបូង ដើរទៅដោយរលូន រហូតដល់ពេលពួកគាត់ដឹងថា ឪពុកម្ដាយមិត្តខ្ញុំលែងលះគ្នា។ ពួកគាត់សម្ដែងចេញមកដូចជាភ្ញាក់ផ្អើលខ្លាំង។
“ក្មួយពូកែគ្រាន់បើ ឮចិត្រាប្រាប់ថាប្រាក់ខែបានដល់១៥០០ដុល្លារ ប៉ន្តែស្រលាញ់គ្នាត្រូវស្មោះត្រង់ណាក្មួយ កុំបោកប្រាស់គ្នា ព្រោះក្រដាសខ្ចប់ភ្លើងមិនជិតឡើយ។ កុំគិតថាដោយសារស្រលាញ់ គេអាចលើកលែងឲ្យយើងបានទាំងអស់ ព្រោះនោះជាការបោកខ្លួនឯង”។ សម្ដីទាំងនេះ ធ្វើឲ្យមិត្តខ្ញុំដឹងថាគ្រួសាររបស់ ចិត្រាពិតជាអប់រំខ្ពស់ណាស់ គ្រប់ម៉ាត់និយាយចេញមកសុទ្ធតែមានអត្ថន័យទាំងអស់។
ក្រោយពេលប្រៀនប្រដៅហើយ ម្ដាយចិត្រាបន្ថែមថា៖ “តែមានការពិតមួយដែលមិនអាចលាក់បាំងបានថា ក្មេងៗដែលធំឡើងក្នុងគ្រួសារមានឪពុកម្ដាយលែងលះគ្នាភាគច្រើនតែងមិនបានប្រៀនប្រដៅត្រឹមត្រូវ គួបផ្សំនឹងការរស់នៅខុសពីក្មេងដទៃទៀតនោះ ទាំងសតិអារម្មណ៍ក៏ដូចជាសុជីវធម៌សុទ្ធតែនៅមានចន្លោះទាំងអស់”។
ស្ដាប់បានត្រឹមនេះ មិត្តខ្ញុំមុខឡើងក្រហមតែក៏ព្យាយាមទប់អារម្មណ៍។ ម្ដាយចិត្រាបន្ថែម៖ “ម្ដាយក្មួយអត់មានយកគ្រួសារមួយទៀតទេហ្ន? មនុស្សស្រីម្នាក់ឯងចិញ្ចឹមកូនពិតជាមិនស្រួលឡើយ គឺងាយទន់ចិត្តនឹងមនុស្សប្រុសដទៃខ្លាំងណាស់”។
ក្រោយពេលនិយាយបញ្ឈិតបញ្ឈៀងថាម្ដាយមិត្តខ្ញុំ ប្រាកដជាមានប្រុសខាងក្រៅហើយ ទើបអាចចិញ្ចឹមកូនរួចនោះ មិត្តខ្ញុំពេលនេះទប់លែងជាប់ ក៏ងើបឈរនិយាយត្រង់ៗថា៖“អ៊ុំនិយាយត្រូវ មនុស្សម្នាក់ឯងចិញ្ចឹមកូនពិតជាមិនងាយឡើយ ខ្ញុំមិនច្បាស់ថាម្ដាយខ្ញុំ មានឆ្លងកាត់មនុស្សប្រុសណាឬអត់ទេ តែម្ដាយខ្ញុំមិនបានជះឥទ្ធិពលអ្វីដល់ខ្ញុំទាំងអស់។ ខ្ញុំក៏មិនដែលធ្វើទង្វើអ្វីឲ្យគេពេបជ្រាយនោះដែរ។ នៅក្នុងមនោសញ្ចេតនាជាមួយកូនអ៊ុំ ខ្ញុំមិនដែលមានចិត្តទី២ឡើយ។ ប៉ុន្តែកូនរបស់អ៊ុំធ្លាប់មានក្រៅជាមួយអ្នកធ្វើការជាមួយគាត់ ត្រូវខ្ញុំចាប់បាន។ បងឯងមើលៗ បងចិត្រាអត់មានគ្រួសារដែលលែងលះគ្នាទេ តែគាត់នៅជាមនុស្សបោកប្រាស់មនោសញ្ចេតនាគេ អ៊ីចឹងគ្រួសារលែងលះមានកំហុសដែរឬទេអ៊ុំ?”
បន្ទាប់មក មិត្តខ្ញុំបែរទៅសង្សារនាង ហើយនិយាយថា៖ “យើងបែកគ្នាទៅ”។ រួចនាងដើរចេញទាំងមិនបែរក្រោយ។ ការពិតនាងចង់បែក ដោយសារនាងធ្លាប់ត្រូវចិត្រាក្បត់ម្ដង តែអ្វីខឹងបំផុតនោះគឺ ពេលឃើញថានាងត្រូវគេជិះជាន់ គេមិនហ៊ានបើកមាត់ការពារសូម្បីមួយម៉ាត់៕
ចុចអាន៖ បើគេលែងស្រលាញ់អ្នកទៀតហើយ ឲ្យគេទៅៗ