បង្កើនភាពស៊ាំដល់កូនៗកុំឲ្យឧស្សាហ៍ផ្តាសាយ ពេលអាកាសធាតុផ្លាស់ប្តូរញឹកញាប់
- 2019-09-12 07:00:00
- ចំនួនមតិ 0 | ចំនួនចែករំលែក 0
បង្កើនភាពស៊ាំដល់កូនៗកុំឲ្យឧស្សាហ៍ផ្តាសាយ ពេលអាកាសធាតុផ្លាស់ប្តូរញឹកញាប់
ជឿជាក់ថា គ្រប់ឪពុកម្ដាយទាំងអស់តែងព្រួយបារម្ភពេលឃើញកូនឈឺ ក្ដៅខ្លួន គ្រប់ពេលដែលអាកាសធាតុផ្លាស់ប្ដូរ ពិសេសរដូវភ្លៀង។ អាកាសធាតុច្រើនតែត្រជាក់ និងសើមដែលធ្វើឲ្យកុមារងាយនឹងផ្ដាសាយជាងពេលណាទាំងអស់។ ប៉ុន្តែ កុំបារម្ភអី កញ្ញា សូមណែនាំពីវិធីបង្កើនភាពស៊ាំដល់សុខភាពកុមារ ដែលអ្នកអាចអនុវត្តបានតាមវិធីខាងក្រោម៖
១. បង្វឹកកូនឲ្យញ៉ាំផ្លែឈើនិងបន្លែ
គុណប្រយោជន៍របស់បន្លែផ្លែឈើ គឺសំបូរវីតាមីន និងសារធាតុរ៉ែសំខាន់ដែលរាងកាយមិនអាចបង្កើតដោយខ្លួនឯងបាន។ សារប្រយោជន៍មួយទៀត វាក៏បង្កើតប្រព័ន្ធភាពស៊ាំដល់កុមារផងដែរ។ ដូច្នេះ ឪពុកម្ដាយគួរតែរកវិធីបញ្ចុះបញ្ចូលឲ្យកូនៗញ៉ាំបន្លែផ្លែឈើឲ្យច្រើន។ លើសពីនេះ អាហារទាំង៥ក្រុមផងដែរ។ អ្នកម្ដាយអាចសាកល្បងងាកមកកិនផ្លែឈើជាទឹកផ្លែឈើវិញ និងចិតបន្លែជាចំណិតតូចៗ ដើម្បីឲ្យកូនងាយស្រួលញ៉ាំ។
២. លំហាត់ប្រាណ
ក្មេងៗដែលតែងធ្វើលំហាត់ប្រាណ ឬសកម្មភាពបញ្ចេញញើសច្រើន នឹងមានប្រព័ន្ធភាពស៊ាំរឹងមាំជាងក្មេងដែលមិនសូវហាត់ប្រាណ។ ម្ល៉ោះហើយ ឪពុកម្ដាយគួរតែឧស្សាហ៍នាំកូនធ្វើសកម្មភាពខាងក្រៅខ្លះ ដោយមិនត្រឹមបានលេងសប្បាយទេ តែក៏ជួយសុខភាពដល់ពួកគេផងដែរ។
៣. យកចិត្តទុកដាក់លើចំណីអាហារ
ម្ហូបដែលកុមារទទួលទាន ត្រូវតែប្រាកដថាបានលាងសម្អាតត្រឹមត្រូវ និងមានអនាម័យខ្ពស់។ បើសិនអ្នកខំជ្រើសរើសចំណីអាហារមានជីវជាតិខ្ពស់ តែបែរជាគ្មានអនាម័យទៅវិញ នឹងធ្វើឲ្យកូនរាគ និងឧស្សាហ៍ឈឺទៀតផង។
៤. ពាក់ខោអាវឲ្យកូនឲ្យបានត្រឹមត្រូវ
អំឡុងរដូវភ្លៀង អាណាព្យាបាលគួរជ្រើសរើសសម្លៀកបំពាក់ណាដែលសក្ដិសមសម្រាប់កូន ។ ការស្លៀកពាក់ឲ្យកក់ក្ដៅ និងមានផាសុកភាពក៏ជួយបង្កើនភាពស៊ាំ ព្រមទាំងកាត់បន្ថយជំងឺរបស់កុមារបានខ្លះផងដែរ។
ដំបូន្មានខាងលើ អាចចាត់ទុកថាចាំបាច់សម្រាប់ឪពុកម្ដាយ។ ដូច្នេះអ្នកត្រូវយកចិត្តទុកដាក់ការពារកូនៗ កុំឲ្យឈឺនៅពេលអាកាសធាតុផ្លាស់ប្ដូរញឹកញាប់។ បើសិនអ្នកបានធ្វើរឿងទាំងអស់នេះ សុខភាពកូនៗនឹងរឹងមាំ និងចៀសឆ្ងាយពីជំងឺផ្ដាសាយបានយ៉ាងពិតប្រាកដ៕
ចុចអាន៖ អាហារ ៥ ប្រភេទ អ្នកម្តាយគួរឈប់ញ៉ាំ ក្នុងអំឡុងពេលបំបៅដោះកូន