៥ វិធីជួយអ្នកឲ្យមានសម្រស់កាន់តែស្អាតក្នុងរយៈពេលមួយខែ សម្រាប់មិត្តនារី

2019-08-14 08:00:00
ចំនួនមតិ 0 | ចំនួនចែករំលែក 0

ភាពស្រស់ស្អាតជាអ្វីនារីគ្រប់រូបប្រាថ្នាចង់បាន។ ប៉ុន្តែគ្រាន់តែស្រស់ស្អាតពីខាងក្រៅមិនគ្រប់គ្រាន់នោះទេ ត្រូវតែដុះខាត់ខ្លូនឯងឲ្យស្អាតទាំងកាយទាំងចិត្តផងដែរ។ ប្រសិនបើអ្នកចង់ផ្លាស់ប្តូរខ្លូនអ្នកឲ្យកាន់មានភាពស្រស់ស្អាតនិងទាក់ទាញថែមទៀតនោះ ប៉ុន្មានវិធីខាងក្រោមពិតជាសក្កិសមបំផុតសម្រាប់មិត្តនារីយើង៖

១ បរិភោគអាហារសុខភាពដើម្បីថែរាងឲ្យស្អាត

បើទោះបីជារូបរាងស្អាតធ្វើឲ្យអ្នកស្រស់ស្អាតនិងមានភាពទាក់ទាញ ប៉ុន្តែបើអ្នកថែរាងអ្នកដោយគ្រាន់តែញ៉ាំតែបន្លែមួយមុខ មិនញ៉ាំសាច់ ហើយញ៉ាំក្នុងបរិមាណដ៏តិចមួយនោះ មិនល្អសម្រាប់រាងកាយអ្នកឡើយ។ ពេលខ្លះគ្រាន់តែចង់បានរាងស្អាត ធ្វើឲ្យអ្នកសុខចិត្តតមអាហារគ្រប់យ៉ាង ហើយនេះជាមូលហេតុបណ្ដាលឲ្យអ្នកមានអារម្មណ៍តានតឹង។ អីច៊ឹង សម្រាប់អ្នកចង់បានរាងស្អាត ត្រូវញ៉ាំអាហារទាំងបីពេលឲ្យទៀងទាត់ ព្រោះវាជាចំណែកមួយជួយធ្វើឲ្យរាងកាយមានតុល្យភាពនិងមានភាពរ៉ឹងមាំផងដែរ។

២ បរិភោគអាហារមានជាតិសរសៃឲ្យបានរាល់ថ្ងៃ

ប្រសិនបើអ្នកចង់បានសម្រស់កាន់តែស្រស់ស្អាត អ្នកត្រូវបរិភោគអាហារដែលមានប្រយោជន៍ដល់រាងកាយ។ តួយ៉ាង អាហារដែលសម្បូរជាតិសរសៃ ព្រោះវាជួយឲ្យពោះវៀនមានដំណើរការល្អ និងជួយឲ្យប្រព័ន្ធរំលាយអាហារកាន់តែល្អប្រសើរ។ នៅពេលប្រព័ន្ធរំលាយអាហារមានដំណើរការល្អ ចរន្ដឈាមក៏ដើរស្រួល ហើយក៏ធ្វើឲ្យស្បែកអ្នកស្រស់ថ្លា។

៣ ឧស្សាហ៍ធ្វើលំហាត់ប្រាណ

បន្ថែមពីការញ៉ាំសុខភាព ការហាត់ប្រាណបានទៀងទាត់ជាផ្នែកសំខាន់មួយដែលជួយឲ្យអ្នកមានសុខភាពល្អនិងរូបរាងកាន់តែទាក់ទាញ។ អ្នកអាចហាត់ប្រាណក្នុងមួយថ្ងៃឲ្យបានកន្លះម៉ោង ឬ ៣ ថ្ងៃក្នុងមួយសប្ដាហ៍។ ការហាត់ប្រាណនឹងជួយបញ្ចេញជាតិពុលពីរាងកាយអ្នកដោយធ្វើឲ្យអ្នកមានអារម្មណ៍ស្រស់ស្រាយ ហើយសម្រស់អ្នកក៏កាន់តែស្អាតតាមនោះដែរ។

៤ ថែរក្សានិងការពារស្បែកពេលត្រូវពន្លឺថ្ងៃ

អ្នកគួរលាបឡេការពារកម្ដៅថ្ងៃ រាល់ពេលអ្នកចេញទៅក្រៅដើម្បីការពារស្បែកអ្នកពីកាំរស្មី UV របស់ព្រះអាទិត្យ។ ប្រសិនបើអ្នកមិនលាបអ្វីសោះ ស្បែកអ្នកងាយនឹងមានបញ្ហាផ្សេងៗព្រោះគ្មានអ្វីជួយការពារពីខាងក្រៅ។

៥ ត្រូវថែបំប៉នស្បែកអ្នកជារៀងរាល់ថ្ងៃ

មុនពេលចូលគេងនិងក្រោកពីគេង អ្នកត្រូវលាបផលិតផលដែលផ្ដល់សំណើមដល់មុខនិងរាងកាយអ្នក។ ត្រូវតែថែទាំមុខនិងរាងកាយអ្នកជាប្រចាំ ដោយជ្រើសរើសយកអ្វីដែលសមស្របនឹងស្បែករបស់ខ្លួនឯង។ ជាងនេះទៅទៀត អ្នកអាចប្រើម៉ាសបិទមុខ ២ ឬ ៣ ដងក្នុងមួយសប្ដាហ៍។

សម្រស់អ្នកនឹងប្រែស្អាតជាងមុន ឲ្យតែអ្នកអនុវត្តវីធីទាំង៥ នេះបានត្រឹមត្រូវក្នុងរយៈពេលមួយខែដំបូង។ កើតមកនាមជាមនុស្សស្រី ត្រូវតែមានតិចនិចថែរក្សាសម្ផស្សឲ្យកាន់តែស្អាតនិងទាក់ទាញ។

ចុចអានបន្ត៖ឱសថធម្មជាតិ ៥ យ៉ាងនេះជួយការពារស្បែកមុខឲ្យក្មេងជាងវ័យ អ្នកគួរសាងល្បងប្រើ

ប្រភព៖ akerufeed ប្រែសម្រួល៖ ង៉ាន់ សុគុន