រៀនពូកែ អត្តចរិតល្អ ជម្រុញឲ្យនិស្សិតស្រីខ្មែរជាប់អាហារូបករណ៍ដ៏កម្រទៅបារាំង

2019-08-13 10:10:00
ចំនួនមតិ 0 | ចំនួនចែករំលែក 0

មិនមែនជារឿងស្រួលទេសម្រាប់និស្សិតស្រីខ្មែរយើង ដែលតែងមានក្ដីស្រមៃ ទម្រាំមានឱកាសសិក្សាបន្តនៅបរទេស ជាពិសេសថ្នាក់អាហារូបករណ៍តាមជំនាញផ្សេងៗគ្នា។

ក្នុងបទសម្ភាសមកកាន់ គេហទំព័រ កញ្ញា និស្សិតស្រីឆ្នើមម្នាក់ ដែលបានទទួលអាហារូបករណ៍ នៅសិក្សានៅប្រទេសប៉ែកអឺរ៉ុប ជំនាញឱសថសាស្ត្របានប្រាប់ពីគន្លឹះខ្លីៗ និងអត្ថប្រយោជន៍នៃការបន្តថ្នាក់អនុបណ្ឌិតនៅប្រទេសបារាំង។

កញ្ញា ផល ដាណេ មានស្រុកកំណើតនៅបាត់ដំបង និងជានិស្សិតបានបញ្ចប់ការសិក្សាបរិញ្ញាបត្រកាលពីឆ្នាំ ២០១៧ ផ្នែកឱសថសាស្ត្រ នៃសាកលវិទ្យាល័យវិទ្យាសាស្ត្រសុខាភិបាលនៅកម្ពុជា។ សព្វថ្ងៃខ្លួនកំពុងបន្តការសិក្សាថ្នាក់អនុបណ្ឌិតនៅប្រទេសបារាំង។

រំលឹកទៅអតីតកាល ផល ដាណេ គឺជាសិស្សស្រីរៀនពូកែតាំងពីតូច និងមានការតស៊ូស្វិតស្វាញ រហូតទទួលបានអាហារូបករណ៍ដ៏កម្រ ពោលគឺក្នុងឆ្នាំសិក្សា២០១៨ មានតែកញ្ញាម្នាក់គត់ពីកម្ពុជា ដែលបានទៅរៀនថ្នាក់អនុបណ្ឌិតផ្នែកឱសថនៅប្រទេសបារាំង។

អ្វីដែលកាន់តែពិសេស ឱកាសអាហារូបករណ៍នេះផ្ដល់ឲ្យពីរដ្ឋាភិបាលបារាំង គឺសម្រាប់និស្សិតកម្ពុជាដែលផ្ដោតពិសេស និងទាមទារឲ្យនិស្សិតទាំងនេះ មានពិន្ទុប្រចាំឆ្នាំខ្ពស់ ឬហៅថា (GPA)។ ក្រៅពីនេះនិស្សិតដែលអាចទទួលបានក៏ត្រូវមានអត្តចរិតល្អ ចំណេះដឹងទូទៅទូលំទូលាយ រួមនិងចំណេះដឹងភាសាបារាំងខ្ពស់ ដែលឆ្លងកាត់ការប្រឡងសមត្ថភាព ទៅតាមដំណាក់កាលនីមួយៗ។

បច្ចុប្បន្ន និស្សិតស្រីខ្មែររូបនេះ កំពុងបន្តការសិក្សាថ្នាក់អនុបណ្ឌិត តាមរយៈអាហារូបករណ៍ នៅសកលវិទ្យាល័យ (University of Aix-Marseille) ក្នុងប្រទេសបារាំង ផ្នែកឱសថ និងផលិតផលសុខាភិបាល ផ្ដោតសំខាន់ទៅលើផលិតផលប្រើប្រាស់នៅលើស្បែក។

ក្រៅពីបំពេញក្ដីស្រមៃរៀនជំនាញ ដែលខ្លួនស្រឡាញ់ យុវតីរូបនេះបានប្រាប់ពីអត្ថប្រយោជន៍ជាច្រើន អំឡុងពេលសិក្សានៅប្រទេសបារាំង និងជាគន្លឹះល្អៗ សម្រាប់និស្សិតដែលមានបំណងទៅរៀននៅទីនេះត្រូវដឹងមាន៥ចំណុច៖

១. យល់ដឹងពីប្រព័ន្ធអប់រំផ្នែកសុខាភិបាលនៅបារាំង

ចំណុចដែលបេក្ខជនត្រូវដឹង គឺប្រព័ន្ធអប់រំនៅប្រទេសបារាំងមិនមានសាលាឯកជនឡើយ មានតែសាលារដ្ឋតែប៉ុណ្ណោះ។ សម្រាប់ថ្នាក់បរិញ្ញាបត្រមុខជំនាញឱសថ គឺត្រូវសិក្សារយះពេល៦ឆ្នាំ ដោយនៅឆ្នាំទី ៥ និង ៦ គ្រូនឹងឲ្យសិស្សរើសមុខជំនាញឲ្យកាន់តែច្បាស់លាស់ សម្រាប់អ្នកដែលមានបំណងចូលធ្វើការនៅតាមឱសថស្ថាន ឬធ្វើការនៅគ្លីនិកឯកជន។ មួយវិញទៀតក៏អាចមានជំនាញ និងអាចចេញធ្វើការនៅតាមពេទ្យរដ្ឋ ឬធ្វើការនៅតាមមន្ទីរពិសោធន៍ និងរោងចក្រផលិតថ្នាំផងដែរ។

២. ការប្រាស្រ័យទាក់ទង

វាមានប្រយោជន៍ណាស់ក្នុងការទាក់ទង ព្រោះបើយើងមករៀនស្ងាត់ឈឹងមិនមានទំនាក់ទំនងជាមួយគ្រូ និង សិស្សអន្តរជាតិជាមួយគ្នានោះ យើងអាចដាច់ទំនាក់ទំនងជាមួយគេនិងសង្គម។ ក្រៅពីការសិក្សា ការចេះសួរនាំ អាចធ្វើឲ្យយើងយល់ដឹងពីគ្នា ក៏ដូចជាការប្រើប្រាស់ភាសាបារាំងច្រើនកាន់តែឆាប់រហ័ស។

៣. ចែករំលែកវប្បធម៌

ចំណុចនេះកញ្ញា ដាណេ បានប្រាប់ថា បើត្រឹមតែប្រាប់ថាខ្លួនជានិស្សិតមកពីប្រទេសកម្ពុជាគឺប្រហែលមិនសូវមានអ្នកស្គាល់ទេ។ ការចែករំលែកវប្បធម៌ដែលឆ្លាតវៃ គឺនិស្សិតស្រីរូបនេះ បានប្រាប់គេថា នាងមកពីប្រទេសមួយដែលមានអង្គរវត្ត គឺហៅថាឈ្មោះប្រទេសកម្ពុជា ពោលគឺគ្រប់ៗគ្នាសុទ្ធតែស្គាល់។

ដូច្នេះមិនថាមានកម្មវិធីសាលា នាងតែងនាំយកប្រពៃណី សិល្បៈ ភាសារបស់ខ្មែរយើង ចែករំលែកទៅវិញឲ្យនិស្សិតបរទេសកាន់តែស្គាល់ច្រើនពីខ្មែរ។

៤. ការសម្របខ្លួនឲ្យកាន់តែលឿន

ការរស់នៅ ចំណីអាហារ គឺជាកត្តាសំខាន់ខ្លាំងពេលទៅបរទេស ពិសេសទម្លាប់នៃការរស់សម្របខ្លួនទៅ នឹងអាហារតាមតំបន់។ អ្វីៗគឺត្រូវមានការរៀបចំទុកមុន។ ឧទាហរណ៍ នៅទីនេះប្រសិនបើយើងចង់បានអ្វីមួយភ្លាមៗ គឺថ្លៃ ម្ល៉ោះហើយធ្វើអីត្រូវកក់មុន ដូចជាសំបុត្រឡាន យន្តហោះ មុនមានគម្រោងហោះហើរ ទៅធ្វើការ ឬដើរលេង។ រីឯអាកាសធាតុវិញ នៅទីនេះមាន ៤រដូវ ហើយមិនមានរដូវប្រាំង រដូវវស្សាដូចយើងទេ ដូចនេះមុនទៅណាគេមើលឧតុនិយម ហើយឧតុនិយមនៅទីនេះគឺច្បាស់ណាស់។

៥. ទទួលបានសេវាកម្មសុខភាពជាច្រើនយ៉ាង

សេវាសុខភាព គឺមានសិទ្ធិស្មើគ្នាទាំងស្រី ទាំងប្រុស ចាស់ក្មេង ទៅពេទ្យរដ្ឋមិនអស់លុយទេ។ ដោយយើងគ្រាន់តែមានកាត វីតាល់ (ហៅតាមភាសាបារាំង) ដើម្បីបង្ហាញគេពីព័ត៌មានក្នុងនាមជាអ្នកជំងឺ។

មួយវិញទៀត បើយើងឈឺតិចតួច យើងត្រូវមានគ្រូពេទ្យផ្ទាល់ខ្លួនសម្រាប់ប្រឹក្សាយោបល់ ហើយរឹតតែពិសេសពីលើបណ្ណសុខភាពនោះ យើងនឹងទទួលបានប្រាក់មកវិញពេលដែលយើងទិញថ្នាំដោយរដ្ឋជាអ្នកផ្តល់ជូនលុយរបស់យើងមកវិញ។

រូបថតទាំងអស់ផ្តល់ឲ្យដោយ៖ កញ្ញា ផល ដាណេ

ចុចអាន៖ នាវ នារីបញ្ចពិសី ស្រ្តីកម្ពុជាដំបូងឆ្លងកាត់ភ្នំអាល់វែងជាងគេនៅតំបន់អឺរ៉ុបដោយម៉ូតូ

អត្ថបទ៖ សុវណ្ណ ស្រីពីន