រាងកាយខ្វះវីតាមីន D ធ្ងន់ធ្ងរហើយ បើមានអាការៈជ្រុះសក់ អស់កម្លាំង និងឈឺប៉ុន្មានមុខនេះ
- 2019-08-13 02:10:00
- ចំនួនមតិ 0 | ចំនួនចែករំលែក 0
រាងកាយខ្វះវីតាមីន D ធ្ងន់ធ្ងរហើយ បើមានអាការៈជ្រុះសក់ អស់កម្លាំង និងឈឺប៉ុន្មានមុខនេះ
វីតាមីន D គឺជាប្រភេទវីតាមីនមួយមុខគត់ដែលរាងកាយអាចទទួលបានដោយមិនចាំបាច់ទាល់តែញ៉ាំចំណីអាហារដូចវីតាមីនផ្សេងទៀត ពោលគឺត្រឹមទទួលពន្លឺព្រះអាទិត្យ រាងកាយនឹងទទួលបានវីតាមីននេះគ្រប់គ្រាន់។ ប៉ុន្តែសម្រាប់អ្នកដែលចូលចិត្តនៅតែក្នុងម្លប់ មិនសូវចេញឱ្យត្រូវកម្ដៅថ្ងៃ រាងកាយរបស់អ្នកនឹងខ្វះវីតាមីន D ហើយលទ្ធផលនៃកង្វះនេះនឹងបង្កឱ្យរាងកាយមានបញ្ហាដូចខាងក្រោម៖
អស់កម្លាំង
អាការៈអស់កម្លាំងអាចបណ្ដាលមកពីការងងុយដេក ការធ្វើការច្រើន ឬកង្វះវីតាមីន D។ គ្រូពេទ្យបានណែនាំថា បញ្ហានៃការអស់កម្លាំងភាគច្រើនគឺជារោគសញ្ញានៃការខ្វះវីតាមីន D ក្នុងរាងកាយ ដូច្នេះអ្នកគួរញ៉ាំអាហារណាដែលសម្បូរវីតាមីនដូចជា ថ្លើមគោ ស៊ុតក្រហមជាដើមដើម្បីបង្កើនកម្លាំងឡើងវិញ។
ឈឺខ្នង
អាការៈឈឺខ្នងអាចបង្កមកពីការអង្គុយ ឬពត់ខ្លួនដោយមិនត្រឹមត្រូវ ឬការអង្គុយយូរពេក។ ប៉ុន្តែនៅមានមូលហេតុមួយទៀត គឺការខ្វះវីតាមីន D ក្នុងរាងកាយ ដែលបណ្ដាលឱ្យអ្នកជំងឺមានការឈឺចាប់ផ្នែកខ្នងរ៉ាំរ៉ៃ។ ដើម្បីដោះស្រាយបញ្ហានេះ អ្នកគួរតែឧស្សាហ៍ចេញទៅខាងក្រៅទទួលកម្ដៅថ្ងៃនៅពេលព្រឹក និងពេលល្ងាច ឬញ៉ាំអាហារដែលមានវីតាមីន D។
ឈឺសាច់ដុំ
ជាទូទៅ ការឈឺសាច់ដុំកើតឡើងក្រោយជួបប្រទះគ្រោះថ្នាក់ ឬការរងគ្រោះអ្វីមួយ។ ប៉ុន្តែបើអ្នកនៅសុខៗស្រាប់តែឈឺសាច់ដុំ ឬឈឺក្នុងឆ្អឹងដោយគ្មានមូលហេតុ គួរតែប្រញាប់គិតពីការបំពេញវីតាមីន D ដល់រាងកាយបន្ថែម។
បាក់ទឹកចិត្ត
ការចេញទៅក្រៅញឹកញាប់នឹងធ្វើឱ្យអារម្មណ៍បានជ្រះស្រឡះនិងរីករាយ។ ចំណែកអ្នកដែលមិនសូវចេញក្រៅ អាចមានភាគរយនៃការកើតជំងឺធុញថប់ ឬបាក់ទឹកចិត្តខ្ពស់។ ឧទាហរណ៍ មិនថាមនុស្សចាស់ ជំទង់ដែលនៅតែក្នុងផ្ទះ មើលថែកូន ឬមិនចូលចិត្តចេញក្រៅសោះ អារម្មណ៍នឹងចេះតែស្រងេះស្រងោច រឹតតែមិនចង់ទៅណាទាំងអស់។ បញ្ហាទាំងនេះ វីតាមីន D អាចដោះស្រាយបាន។
របួសក្រជាសះ
ជាធម្មតា របួសដែលមុតឬដាច់រលាត់អាចនឹងជាសះបន្ទាប់១ទៅ២សប្ដាហ៍។ ប៉ុន្តែបើអ្នកសង្កេតឃើញថា មុខរបួសរបស់អ្នកត្រូវចំណាយពេលយូរជាងនេះដើម្បីក្រៀមឬជាសះ បានន័យថារាងកាយកំពុងខ្វះជាតិវីតាមីន D ហើយ ព្រោះវីតាមីន D មានតួនាទីជួយបង្កើនល្បឿនកោសិកាក្នុងការបណ្ដុះសាច់ថ្មីដើម្បីបិទផ្ជិតមុខរបួសឱ្យជាសះស្បើយ។
ជ្រុះសក់
ការសិក្សាជាច្រើនបានរកឃើញថា វីតាមីន D ជួយបង្កើតឫសសក់ថ្មីៗបានច្រើន និងឆាប់រហ័ស ដូច្នេះបើអ្នកកំពុងជួបបញ្ហាជ្រុះសក់ ប្រហែលអាចជួបប្រទះនូវកង្វះវីតាមីនមួយនេះហើយ។
សម្ពាធឈាមឡើងខ្ពស់
របាយការណ៍មកពីគ្លីនិក Mayo បានឱ្យដឹងថា មូលហេតុមួយក្នុងចំណោមមូលហេតុធំៗនៃជំងឺបេះដូង និងសម្ពាធឈាមឡើងខ្ពស់ខុសពីធម្មតា បណ្ដាលមកពីកង្វះវីតាមីន D៕