ការងារតាម Online ៤ ប្រភេទអាចរកប្រាក់បានស្រួល មិនរងសម្ពាធពីមេ

2019-08-05 05:05:00
ចំនួនមតិ 0 | ចំនួនចែករំលែក 0

វិធីរកប្រាក់បន្ថែមមានច្រើនរបៀប ដូចជាតាមរយៈការលក់ផលិតផលតាម Online លក់សម្លៀកបំពាក់មួយតឹក លក់រូបថត ឬការសរសេរអត្ថបទ ទាំងនេះសុទ្ធតែអាចរកប្រាក់បាន ដែលមនុស្សជាច្រើនមិនសូវគិតដល់។

ប៉ុន្តែពេលខ្លះការឆ្លៀតរកប្រាក់បន្ថែមពេលទំនេរពីការងារពេញម៉ោង អាចជារឿងស៊ាំញ៉ាំបន្តិចសម្រាប់យុវវ័យ។ ស្របពេលបណ្ដាញសង្គមកំពុងរីកធំ វិធីរកប្រាក់តាមរបៀបនេះកាន់តែពេញនិយម និងស្របច្បាប់។ អ្នកជំនាញបានឲ្យវិធីសាស្ត្រខាងក្រោមដូចជា៖

១. សរសេរពីផលិតផលនិងសេវាកម្ម

ប្រភេទការងារនេះពិតជាមើលទៅរីករាយណាស់។ បើអ្នកជាមនុស្សចូលចិត្តកន្លែងញ៉ាំប្លែកៗ ទៅកន្លែងណាថ្មីៗ អ្នកច្បាស់ជាពេញចិត្តការងារនេះមិនខាន។ អ្វីដែលអ្នកចាប់ផ្ដើមធ្វើ គឺសរសេរឲ្យបានម៉ត់ចត់ពីផលិតផលនិងសេវាកម្មដូចនឹងចំណង់ចំណូលចិត្តរបស់អ្នក នូវចំណុចសំខាន់ៗ នោះ Brand ល្បីៗជាច្រើននឹងរត់មករកអ្នកឲ្យជួយសរសេរដែរ មិនខាន។

២. ការងារតាមវ៉ែបសាយ

ថ្មីៗនេះមានវ៉េបសាយជាច្រើនផ្ដល់នូវការងារសាមញ្ញៗដែលអ្នកអាចឆ្លៀតពេលធ្វើបាន និងទទួលកម្រៃទៀតផង។ ការងារទាំងនោះមិនសូវចំណាយពេលច្រើនទេដូចជា រៀបចំការផ្សព្វផ្សាយលើគេហទំព័រ សរសេរមតិយោបល់តាមការកំណត់របស់វ៉េបសាយ សរសេរBlog និងបង្កើតសមាជិកសម្រាប់អ្នកប្រើប្រាស់លើគេហទំព័រផ្សេងៗជាដើម។

៣. លក់រូបថត

បើអ្នកចេះថតរូបស្អាតៗ ការរកលុយតាម Online លែងពិបាកហើយ។ មានអ្នកជំនាញថតរូបជាច្រើនបានលក់រូបថតរបស់ពួកគេ ព្រមទាំងទទួលបានប្រាក់កម្រៃជាទីពេញចិត្ត។ កាន់តែថតរូបស្អាត មានអ្នកទិញក៏កាន់តែច្រើន។ ដូច្នេះបើអ្នកចង់បានប្រាក់បន្ថែមតាមវិធីនេះ កុំភ្លេចត្រូវមានកាតសម្រាប់ទូទាត់ជាសាកល ដើម្បីងាយស្រួលពេលលក់រូបថត។

៤. Social Media តាមហាង Online

សព្វថ្ងៃចំនួនហាងលក់ផលិតផល ស្បែកជើង សម្លៀកបំពាក់ អាហារ ភេសជ្ជៈ និងគ្រឿងសង្ហារឹមតាម Online រីកដូចផ្សិត។ ភាគច្រើនអ្នកគ្រប់គ្រងហាងទាំងនោះមិនសូវមានពេលវេលាគ្រប់គ្រាន់ដើម្បីឆ្លើយតបសារ ឬ Comment របស់អតិថិជនទេ ដូច្នេះអ្នកអាចធ្វើការងារជា Social Media សម្រាប់ហាងទាំងនោះបាន។ អ្វីដែលអ្នកត្រូវធ្វើ គឺផុសព័ត៌មានចាំបាច់នៅលើ Page ឆ្លើយតបសារឲ្យបានលឿនតាមដែលអាចធ្វើបានសម្រាប់អតិថិជន។