កុំឲ្យខាត! ពេលជិះយន្តហោះ ត្រូវដឹងពីរបស់ដែលអាចហៅបាន Free

2019-05-31 09:30:00
ចំនួនមតិ 0 | ចំនួនចែករំលែក 0

អ្នកដែលធ្លាប់ជិះយន្តហោះ ប្រហែលជាធ្លាប់កុម្ម៉ង់របស់ផ្សេងៗ ដួចជាទឹក ម្ហូបអាហារ ឬថ្នាំសង្កូវជាដើម ពីពហុនិការ។ ដើម្បីកុំឲ្យខាត នៅមានរបស់ពិសេសៗជាច្រើនទៀត ដែលអ្នកអាចហៅបានដោយឥតគិតថ្លៃ នៅលើយន្តហោះ។

១. ម្ហូបអាហារ

សម្រាប់អ្នកដែលចូលចិត្តញ៉ាំគឺត្រូវម៉ាច់តែម្តង ព្រោះជើងយន្តហោះដែលមានផ្តល់អាហារជូនហ្រ្វី តែងបានត្រៀមចំណីអាហារជាច្រើនមុខដល់អ្នកដំណើរ ហើយអ្នកក៏អាចហៅថែមដោយមិនបាច់អស់លុយដែរ។ ដោយសារតែអ្នកដំណើរខ្លះ មិនចេះញ៉ាំអាហារដែលគេផ្តល់ឲ្យនោះ ទើបអ្នកអាចកុម្ម៉ង់ថែមតាមចិត្តចង់បាន។ ប្រសិនបើអ្នកមិនចូលចិត្តផឹកតែឬកាហ្វេ អ្នកក៏អាចប្តូរទៅជាទឹកផ្លែឈើ ទឹកក្រូច ទឹកដោះគោ ឬសូកូឡាក្តៅក៏បានដែរ។

២. បង់បិទរបួសឬឧបករណ៍វេជ្ជសាស្ត្រ

បើអ្នកមានអាការៈមិនស្រួលខ្លួន ដូចជាឈឺក្បាល ក្តៅខ្លួន ចុកពោះ ឬមានអារម្មណ៍ថាឈឺចាប់ត្រង់កន្លែងណាមួយ អ្នកអាចស្នើសុំថ្នាំបំបាត់ការឈឺចាប់បាន។ ម្យ៉ាងវិញទៀត បើអ្នកមានស្នាមរបួសសើស្បែក អ្នកក៏អាចពឹងឲ្យអ្នកបម្រើការលើយន្តហោះ ជួយសង្រ្គោះដោយការលាងរបួស បិទបង់បានដែរ។

៣. សុំជំនួយពីគ្រូពេទ្យ

ក្នុងករណីដែលអ្នកមានជំងឺមិនប្រក្រតីកើតឡើងភ្លាមៗ អ្នកអាចសុំឲ្យអ្នកបម្រើការលើយន្តហោះ ជួយប្រកាសរកក្រែងលោមានអ្នកដំណើរណាជាគ្រូពេទ្យ ដើម្បីមកជួយសង្គ្រោះនិងមើលថែបណ្តោះអាសន្ន។ បន្ទាប់មកខាងជើងយន្តហោះ នឹងមានផ្តល់ជូនប្រាក់លើកទឹកចិត្តដល់គ្រូពេទ្យវិញ។

៤. សុំប្តូរកៅអី

បើអ្នកមានបំណងចង់ផ្លាស់ប្តូរកៅអី ដើម្បីទៅអង្គុយជិតមិត្តភ័ក្តិឬក្រុមគ្រួសារ អាចប្រាប់ទៅដល់ពហុនិការឲ្យជួយសម្រួលបាន។ ឬមួយក៏អ្នកមិនពេញចិត្តនឹងកន្លែងអង្គុយរបស់ខ្លួន ពិហុការក៏អាចជួយរកកន្លែងស័ក្តិសមសម្រាប់អ្នក ប្រសិនបើមានទំនេរ។

៥. សុំចាក់ទឹកក្នុងដបបន្ថែម

មានអ្នកដំណើរមួយចំនួន យកដបទឹកទទេតាមខ្លួន ព្រោះនៅលើយន្តហោះ គេមិនអនុញ្ញាតឲ្យយកដបទឹកឡើងនោះទេ។ ប៉ុន្តែអ្នកអាចសុំទឹកចាក់ចូលក្នុងដបបាន ធ្វើបែបនេះអ្នកអាចផឹកទឹកបានច្រើនមិនស្ងួតក និងមិនសុំគេច្រើនដង។

៦. ស្រា

មានជើងយន្តហោះច្រើនណាស់ដែលផ្តល់ស្រាឲ្យមិនគិតថ្លៃ។ យ៉ាងណាមិញ នៅលើយន្តហោះធ្វើឲ្យរាងកាយអ្នកបាត់បង់ជាតិទឹកច្រើនណាស់ បើអ្នកផឹកស្រាច្រើនពេក វាមិនល្អចំពោះសុខភាពនោះទេ។

៧. សុំសេវាជូតសម្អាត

បើអ្នកត្រូវការឲ្យកន្លែងអង្គុយមានអនាម័យជាងនេះ ឬគិតថាវានៅកខ្វក់ មិនបាច់ស្ទាក់ស្ទើរទេ អាចសុំឲ្យគេជូតសម្អាតឲ្យបាន ដើម្បីផាសុកភាព។

៨. របស់ក្មេងលេង

ប្រសិនបើកូនអ្នកចង់បានរបស់លេងបន្ថែមដូចជា សៀវភៅរូបភាព Sticker ដីឥដ្ឋជាដើម។ លើសពីនេះទៅទៀត បើអ្នកគេងពុំលក់ អាចសុំរបាំងភ្នែក កាសផ្តល់កម្តៅត្រចៀកជាជំនួយបានទៀតផង។ រីឯថ្នាំដុសធ្មេញ ច្រាសដុសធ្មេញ ឬភួយពេលអ្នកមានអារម្មណ៍ថាត្រជាក់ក៏អាចសុំបានដែរ។ នៅពេលដែលអ្នកមិនបានទិញកៅអីសម្រាប់កូនក្រោមអាយុ២ឆ្នាំទេ អ្នកអាចសុំបន្ថែមកូនអង្រឹងបាន។