តារាស្រី៣ដួង ប្រែសម្រស់ខុសពីមុនដាច់ ក្រោយកែសម្ផស្សច្រើនលើក

2019-04-02 04:40:00
ចំនួនមតិ 0 | ចំនួនចែករំលែក 0

តារាស្រី៣រូប ត្រូវបានទស្សនិកជនចាប់អារម្មណ៍ថា ក្រោយវះកាត់កែសម្ផស្សច្រើនលើក ធ្វើឲ្យសម្រស់របស់ពួកគេប្រែប្រួល ខុសដាច់ពីមុនតែម្ដង។ ក្នុងនោះមានដូចជា៖

សាសា

សម្រស់ក្រោយវះកាត់

អតីតតារាចម្រៀងនៅផលិតកម្មថោន រូបនេះ ធ្លាប់សារភាពមិនលាក់លៀមថា ខ្លួនបានទៅវះកាត់កែសម្ផស្ស ដូចជា កែក្ដោងច្រមុះដល់ទៅ៨លើក វះកាត់ចង្កាឲ្យចេញទម្រង់មុខ V ព្រមទាំងកែដើមទ្រូងឲ្យធំ ផងដែរ ដោយភាគច្រើន សាសា និយមធ្វើនៅប្រទេសថៃ។

ឆ្លងកាត់ការកែសម្ផស្សច្រើនលើផ្ទៃមុខ សម្រស់របស់អតីតតារាស្រីងាកទៅបើកហាងលក់ផលិតផលសម្រស់រូបនេះ ប្រែប្រួលខ្លាំង ខុសពីមុនដាច់តែម្ដង។ ទោះយ៉ាងណា សម្រាប់ការវះកាត់ចង្ការបស់សាសា លើកចុងក្រោយនៅដើមឆ្នាំនេះ កញ្ញា បានទម្លាយថាអស់១២០០០ ដុល្លារ ហើយនាងក៏មានការសាយស្ដាយផងដែរ និងថែមទាំងបាន Live Video ប្រាប់អ្នកគាំទ្រឲ្យមានការប្រុងប្រយ័ត្ន កុំឲ្យអស់ទាំងលុយ ឈឺទាំងសាច់ និងខាតពេលវេលាដូចរូបនាង។

បេនីយ៉ាំង

សម្រស់ក្រោយវះកាត់

បេនីយ៉ាំង បានទម្លាយថា ច្រមុះនាងវះកាត់លើកនេះ មិនដូចដើម១០០%ទេ ព្រោះនាងវះកាត់ច្រើនដងពេក ។ លើសពីនេះ ពេទ្យនៅប្រទេសថៃបានកាត់ឆ្អឹងជំនីរបស់នាង ដើម្បីបំពេញឲ្យឃើញខ្ពស់ជាងមុន ផងដែរ។ លើសពីនេះ បេនីយ៉ាំង បានវះកាត់ត្របកភ្នែកឲ្យឡើងលើពាក់កណ្ដាលថែមទៀត ឲ្យឃើញភ្នែកធំស្អាត ដូចតុក្កតា។

ក្រោយទម្លាយមុខមាត់ ពាក់ម៉ាសច្រើនខែ អតីតតារាស្រីសិចស៊ីរូបនេះ ធ្វើឲ្យមហាជន បើកភ្នែកធំៗ នឹងសម្រស់របស់នាង ព្រោះមើលទៅប្លែកខ្លាំងពេក ពីសម្រស់កាលពីមុន។ ថ្វីត្បិតថៅកែស្រី ហាង Lorem ចូលចិត្តស៊ិចស៊ី និងញៀននឹងកែសម្ផស្សក្តី តែគេឃើញនាងមានចិត្តសន្តានល្អ ជួយក្មេងៗទ័លក្រ គួរឲ្យសរសើរ។

ដេនី ក្វាន់

សម្រស់មុននិងក្រោយវះកាត់

មិនខុសពីតារាស្រីខាងលើ ដេនី ក្វាន់ មិនដែលលាក់លៀមពីរឿងកែសម្ផស្សរបស់ខ្លួនឡើយ។ ជាក់ស្ដែង តារាស្រីមានឈ្មោះពិត បានចំណាយលុយច្រើនម៉ឺនដុល្លារ វះកាត់យ៉ាងណាឲ្យដូចតារាថៃ Kwan Usamanee ។ ទោះខំហោះឆ្លង ដល់ប្រទេសថៃ តែតារានិយមភាពស៊ិចស៊ី រូបនេះ បែរជាត្រូវមហាជនរិះគន់ ថាសម្រស់មើលមិនចូលភ្នែក និងឈប់ឲ្យនាងចំណាយលុយលើរឿងកែសម្ផស្សនេះទៀតទៅ។

ដោយសារតែបែបនេះ ដេនី ក្វាន់ បានបញ្ចេញអារម្មណ៍លើបណ្ដាញសង្គម សុំចិត្តទស្សនិកជនទាំងអស់ មេត្តាបញ្ឈប់រិះគន់រឿងនេះបន្តទៀត ព្រោះសម្រស់ធម្មជាតិរបស់មនុស្សម្នាក់ៗ មិនស្អាតដូចក្ដីប្រាថ្នាទាំងអស់នោះទេ។ ម្ល៉ោះហើយ កញ្ញាសុំចិត្ត សូមយល់ពីអារម្មណ៍អ្នកមានសម្រស់មិនទាន់ស្អាតពីធម្មជាតិហើយត្រូវឆ្លងកាត់មុខកាំបិតយ៉ាងឈឺចាប់ ដើម្បីមានសម្រស់ដូចក្ដីប្រាថ្នា៕