បើតាមស្រលាញ់ម៉ាកៗហ្នឹង ដាច់ខ្យល់ស្លាប់មិនខានទេចៅហ្វាយបងអើយ!

2019-03-20 10:00:00
ចំនួនមតិ 0 | ចំនួនចែករំលែក 0

ពេលដែលថ្នាក់លើលួចស្រលាញ់ មិនដឹងធ្វើម៉េចបាននិយាយរក មានតែទម្លាក់ការងារឲ្យធ្វើ។ រហូតដល់ចង់លាឈប់ ព្រោះហត់ពេកមួយថ្ងៃៗធ្វើការអីមិនដែលចេះត្រូវសោះ។

រូបតំណាង

ដំបូងនិយាយពីរឿងការងារសិន មុនដំបូងខ្ញុំមិនមែនធ្វើការនៅក្រុមហ៊ុនដែលមិត្តប្រុសខ្ញុំធ្វើការនោះទេ។ តែមកពីកន្លែងគាត់ខ្វះខាតបុគ្គលិក ទើបសុំខ្ចីបុគ្គលិកពីក្រុមហ៊ុនបងប្អូនគាត់ ហើយគឺខ្ញុំធ្វើការនៅទីនោះឯង ផ្នែកទំនាក់ទំនងភ្ញៀវ ហើយក្រុមហ៊ុនសង្សារ និងចៅហ្វាយខ្ញុំគឺដូចគ្នា ដូចនេះហើយទើបត្រូវការបុគ្គលិក ទើបខាងនោះបញ្ជូនមកត្រូវ។ តែអ្វីដែលមិនត្រូវ គឺខ្ញុំ និងចៅហ្វាយថ្មីឈ្លោះគ្នាតាំងពីមិនទាន់ចាប់ផ្ដើមការងារ ព្រោះមកជាជំនួយការគាត់ ទាំងដែលជាការងារមិនចូលចិត្តបំផុត។

ខ្ញុំសូមគាត់ប្ដូរទៅធ្វើអ្វីផ្សេងវិញ តែគាត់មិនព្រម និងបោះពាក្យឌឺដងដាក់ថា បើមនុស្សមានសមត្ថភាពការងារអ្វីក៏អាចធ្វើបានដែរ។ ឮពាក្យនេះខ្ញុំពិតជាខឹងណាស់ ព្រោះផ្លាស់មកក៏មិនចង់ បាត់ក្រុម មិនទម្លាប់ជាមួយបុគ្គលិកនៅទីនោះ ហើយសំខាន់វប្បធម៌ធ្វើការគឺខុសគ្នា។ កន្លែងចាស់ខ្ញុំធ្វើអីក៏បានដែរ ឲ្យតែការងារតាមការកំណត់ និងបានល្អ។ នៅទីនេះស្អីក៏ត្រូវឆ្លងកាត់មេ មើលតែមេនឹងម៉ែចឹង សែនធុញ។

បើនិយាយពីមេថ្មីរូបរាងសែនសង្ហារ កម្ពស់ចង់ ២ ម៉ែត្រ តែកុំមើលមុខ ឃើញមុខធ្វើការមិនចេញទេ។ មុខក៏ស្អាតហើយ តែចិញ្ចើមចងចូលគ្នារហូត បើនិយាយឲ្យចំ គេហៅមនុស្សមុខងាប់ មិនតែប៉ុណ្ណឹងទេផ្ដាច់ការទៀត។ ចាប់ផ្ដើមថ្ងៃ ២ គឺធ្វើឲ្យខ្ញុំសឹងតែស្រែកឲ្យបែក office ធ្វើរបាយការណ៍តាំងពីដើមឆ្នាំ ខណៈទើបចូលមិនទាន់ទាំងស្គាល់បន្ទប់ធ្វើការអស់ផង។ របាយការណ៍ការងារពីដើមឆ្នាំមកដល់ពាក់កណ្ដាលមិនទាន់ចប់ ថែមបញ្ជីបុគ្គលិកឈប់ និងនៅ ហើយត្រូវបញ្ជូនឲ្យ partner ជាច្រើន ហើយឲ្យពេលគ្នាធ្វើ ២ ម៉ោង លោកអើយលោក ចឹងតើបានបុគ្គលិកក្រុមហ៊ុនរត់ចោលអស់ ប្រាក់ខែច្រើនវាច្រើនហើយ តែការងារវារឹតតែច្រើនទៀត។

រូបតំណាង

បើទោះជាមុខមិនរីកមែន តែសង្កេតថាគាត់ជាមនុស្សចិត្តល្អណាស់ បុគ្គលិកចាស់ៗក៏និយាយចឹងដែរ គ្រាន់តែមេមិនសូវបញ្ចេញ។ ធ្វើយូរៗទៅ ខ្ញុំមានអារម្មណ៍ថា ខ្លួនឯងដូចកញ្ជះដាច់សាច់ទាំងដុំៗចឹង តែអ្នកផ្សេងការងារធម្មតា សូម្បីតែទៅទិញខោអាវ ទៅហាត់កីឡា ទៅមន្ទីរពេទ្យ និយាយទៅលើកលែងតែចូលបង្គន់មួយទេដែលមិនបានចូលទៅជាមួយ។ បែបនេះហើយបានជាលេខាមួយៗនៅមិនបានយូរ ហើយអ្វីដែលធ្វើឲ្យខ្ញុំមួម៉ៅទៀតនោះ គឺបែកគ្នាជាមួយសង្សារ ព្រោះតែលោកចៅហ្វាយជើងល្អនឹងឯង យូរៗទៅទៅការគេ ក៏ហៅឯងទៅជាមួយ។

ខឹងព្រោះការងារផង បែកសង្សារផង ចៅហ្វាយរករឿងផង ទីបំផុតខ្ញុំក៏ដាក់ពាក្យសុំឈប់ ហើយប្ដេជ្ញាថា ទោះគេឡើងប្រាក់ខែឲ្យប៉ុន្មានក៏មិនធ្វើទៀតដែរ។ ឃើញក្រដាសលាឈប់ មេជើងល្អបានមាត់ភ្លាម៖ "មិនចេះតស៊ូជួបការលំបាកតិចតួចសោះ ក៏ឈប់ ពូកែតែសម្ដី ស្មានតែអស្ចារ្យ"។ ឮបែបនេះមិនបាច់ដំឡើងប្រាក់ខែឲ្យទេ ខ្ញុំនៅឯងហ្មង ក្ដៅចិត្តតិចអីថាឯងគ្មានសមត្ថភាពនោះ ហើយក្រោយពីឌឺដងមិនឲ្យខ្ញុំឈប់បានសម្រេច ចៅហ្វាយចាប់ផ្ដើមយកចិត្តណាស់ហៅទៅប៉ាវញ៉ាំអាហារថ្លៃៗ និយាយស្ដីក៏មិនអាក្រក់ដូចមុន តែការងារនៅច្រើនដដែល។

រូបតំណាង

ធ្វើការបានប្រហែលជិត ១ ឆ្នាំ រៀងស្គាល់ចិត្តថ្លើមមេខ្ញុំក៏របូតមាត់សួរសំណួរមួយដែលធ្វើឲ្យពួកយើងយល់ចិត្តគ្នា ខ្ញុំសួរគាត់ថា "អាយុជាង ៣០ ឆ្នាំហើយ ទាំងដែលគ្រួសារក៏មានខ្លាំង ខ្លួនឯងក៏មានសមត្ថភាព ហើយរូបក៏ស្អាត មិនទាន់មានសង្សារទៀត”? គាត់ថា ឃើញកូនគេម្នាក់ហើយ តែមិនទាន់បានសួរនាំ តែគាត់បង្ហើបថា កាចតិច តែគាត់អាចទប់ទល់បាន។ ខ្ញុំក៏ថា សួរគេលឿនៗទៅ ប្រយ័ត្នគេរៀបការចោលបាត់។ និយាយមិនទាន់ផុតពីមាត់ផង គាត់ក៏សួរថា បើគាត់សុំធ្វើសង្សារ ខ្ញុំព្រមអត់?

ព្រះអើយ មិនបានត្រៀមខ្លួនសោះ ហើយក៏មិនដែលស្មាន។ ទោះខ្ញុំធ្លាប់មានសង្សារ តែក៏នៅតែអៀន ព្រោះវាលឿនពេក បានត្រឹមគាំងសម្ដីមិនដឹងនិយាយម៉េច មុខក៏ចាប់ផ្ដើមក្ដៅ តែខ្លាចគាត់និយាយលេង ដើម្បីសើចចំអក។ គាត់ក៏ថា ក្រែងប្រាប់ថា ឲ្យសួរនាំឲ្យលឿន ហើយដល់គេសួរតាំងមិនឆ្លើយ រួចក៏សើចញឹមៗ ធ្វើឲ្យខ្ញុំនេះកាន់តែអៀន លែងហ៊ានមើលមុខ ទម្រាំតែសម្រួលអារម្មណ៍បាន គាត់មកកៀកខ្លួនបាត់ ហើយបន្តថា ព្រមធ្វើសង្សារគាត់អត់? ខ្ញុំក៏ដាច់ចិត្តនិយាយ ហើយមកស្រលាញ់ម៉េចបើ ជេររាល់តែថ្ងៃចឹង គាត់ថា មកពីពូកែតមាត់នឹងហើយបានគាត់ស្រលាញ់នោះ។ ខ្ញុំក៏ថា ធ្វើបាបគេម្ង៉ៃៗចង់ងាប់ ហើយមកស្រលាញ់គេ គាត់ថាបើមិនធ្វើបាបចឹង ម៉េចបាននិយាយគ្នាច្រើន បន្ទាប់មកខ្ញុំក៏សុំគាត់ថា កុំប្រាប់រឿងនេះដល់អ្នកនៅកន្លែង ខ្លាចគេបង្អាប់ គាត់ថាគ្មាននរណាហ៊ានបង្អាប់ទេ ព្រោះគេដឹងពេញហ្នឹងទាំងអស់ អត់តែខ្លួនឯង។

ចាប់ពីពេលនោះមកពួកយើងចាប់ផ្ដើមសេពគប់គ្នាជាសង្សារ និងមើលចិត្តថ្លើមគ្នា ដើម្បីស្ទង់ថាមានឱកាសអាចចូលរោងការជាមួយគ្នាអត់ ហើយគឺថា ខ្មាសគេក៏មិនតិចដែរនៅកន្លែង ព្រោះគេដឹងទាំងអស់ គេថាចៅហ្វាយមិនដែលនិយាយជាមួយបុគ្គលិកយូរៗទេ សូម្បីតែលេខាមុនៗស្អាតជាងនឹង ១០ ដងណោះ តែនិយាយច្រើន សើចច្រើនបានន័យថាស្រលាញ់។