ឈឺចាប់បំផុតគឺបែកគ្នាដោយសារអំនួតរៀងខ្លួន ទាំងនៅស្រលាញ់គ្នាខ្លាំង

2019-03-11 07:00:00
ចំនួនមតិ 0 | ចំនួនចែករំលែក 0

នៅក្នុងចិត្តគឺច្បាស់ខ្លាំងណាស់ថានៅស្រលាញ់គ្នា តែដោយសារតែខ្លាចពាក្យថា “ថោក” "អន់" "ចាញ់ " ក៏រឹងរូសរៀងខ្លួនរហូតដល់ថ្នាក់បែកគ្នា។

រូបតំណាង

ពេលស្រលាញ់គ្នា អ្នកណាក៏ចង់ឲ្យនៅក្បែរគ្នាឲ្យបានយូរ អាចកាន់ដៃគ្នាដើរដល់អស់ផ្លូវជីវិតជាមួយគ្នា។ តែបើគ្រប់ចំណងមនោសញ្ចេតនាសុទ្ធតែបញ្ចប់ដោយសុភមង្គល គឺមិនអាចទៅរួចឡើយ។ ដោយសារហេតុផលណាមួយ ពួកយើងនៅតែត្រូវនិយាយពាក្យថាបែកដាក់គ្នាដដែល។ បែកគ្នាដោយសារអស់ស្រលាញ់គ្នាជារឿងធម្មតាទេ តែបែកគ្នាទាំងស្រលាញ់ ដោយអត់មានអ្នកទីបីសោះទើបឈឺចាប់ខ្លាំង។ គឺមានហេតុផលតែមួយគត់ ចិត្តអំនួតរបស់ខ្លួនឯងធំពេក។

ពួកយើងសុទ្ធតែមានគំនិត ចំណង់ចំណូលចិត្ត និងរបៀបរស់នៅផ្ទាល់ខ្លួន ហើយស្នេហាគឺត្រូវផ្ដើមឡើងដោយបុគ្គល២នាក់ ដោយអ្នកទាំង២អាចលះបង់ចោលគ្រប់យ៉ាងនៅពេលស្រលាញ់គ្នារួចហើយ។ ទើបមានឃ្លាមួយលើកឡើងថា «ឃ្លានឆ្ងាញ់ស្រលាញ់ល្អ»។

យ៉ាងណាក៏ដោយ ដើម្បីជម្នះរាល់ព្យុះភ្លៀងបាននៅក្បែរគ្នាយូរ ភាគីទាំងសងខាងត្រូវចេះបន្ទាបខ្លួនតាមកាលៈទេសៈ ទើបមនោសញ្ចេតនាបានស្ថិតស្ថេរ។ បើខ្លាំងៗទាំងសងខាង យកឈ្នះរៀងខ្លួន ចង់ស្នេហារឹងមាំយ៉ាងក៏ត្រូវបែកគ្នាដែរ។

រូបតំណាង

ដោយសារតែបច្ចុប្បន្ននេះ ទាំងប្រុសទាំងស្រីសុទ្ធតែមានកំរិតវប្បធម៌ និងចំណេះដឹងខ្ពស់ ដែលធ្វើឲ្យពួកគេប្រកាន់ជំហររបស់ខ្លួនយ៉ាងដាច់អហង្ការ។ អាស្រ័យហេតុនេះ រាល់ពេលជម្លោះផ្ទុះចេញម្ដងៗ ពួកគេនឹងតស៊ូមតិរបស់ខ្លួនរហូតដល់ទីបញ្ចប់ ហើយលទ្ធផលគឺគ្មានអ្វីក្រៅពីបែកគ្នានោះឡើយ។ ពេលនិយាយពាក្យថាបែកនេះគឺនិយាយឲ្យស្រួលមាត់សិនតែប៉ុណ្ណោះ។ ក្រោយមក មកដល់ផ្ទះវិញទើបស្ដាយក្រោយ។ ស្ដាយក្រោយរឿងអី? គឺរឿងដែលចិត្តនៅស្រលាញ់ដូចដើម តែដោយសារតែចិត្តអំនួត ខ្លាចគេថា “ថោក” ទើបមិនហ៊ានទទួលកំហុស ហើយក៏បាត់បង់ចំណងមនោសញ្ចេតនាមួយយ៉ាងសោកស្ដាយបំផុត។

តាមនេះដែរ ដូចនិយាយនៅលើស្រាប់ បើយើងពិតជាស្រលាញ់គ្នាមែន កុំក្រែងបន្ទាបខ្លួន បើខ្លួនខុសមែន ដើម្បីរក្សាមនុស្សដែលខ្លួនស្រលាញ់ឲ្យបាន៕

ចុចអាន៖ដំបូន្មានស្នេហាសម្រាប់មនុស្សស្រីគ្រប់គ្នា ដើម្បីកុំឲ្យពិបាកចិត្តនៅពេលក្រោយ

ប្រភព៖ Kenh14 អត្ថបទ៖Caramel