ដំបូន្មានស្នេហាសម្រាប់មនុស្សស្រីគ្រប់គ្នា ដើម្បីកុំឲ្យពិបាកចិត្តនៅពេលក្រោយ

2019-03-01 10:00:00
ចំនួនមតិ 0 | ចំនួនចែករំលែក 0

ពេលស្រឡាញ់នរណាម្នាក់អ្នកនឹងទទួលបានអារម្មណ៍ពីរផ្សេងគ្នាក្នុងពេលតែមួយ ហើយទោះចង់មិនចង់អ្នកមិនអាចគេចផុតឡើយ នោះគឺសេចក្ដីសុខ និងភាពឈឺចាប់។

មនុស្ស២នាក់ស្រឡាញ់គ្នា ចៀសមិនផុតពីភាពទាស់ទែងគ្នា មិនចុះសម្រុងគ្នាឡើយ។ ស្នេហាមិនអាចធ្វើឲ្យអ្នកញញឹមរហូតទេ ព្រោះនៅពេលអ្នកចាប់ផ្ដើមមានមនុស្សម្នាក់ក្នុងចិត្ត ភាពឯកា ការនឹករលឹក ការបារម្ភ ការប្រចណ្ឌហួងហែង ទាំងនេះសុទ្ធតែជាទុក្ខដែលអ្នកត្រូវជួប។

ធ្លាប់សួរខ្លួនឯងទេថាតើអាចធ្វើយ៉ាងណាដើម្បីកុំឲ្យឈឺខ្លាំងពេលជួបបញ្ហា?

ចម្លើយនោះគឺជាការត្រៀមខ្លួន និងស្វែងយល់ថាតើអ្វីដែលអ្នកគួរធ្វើឬមិនគួរធ្វើ?

កូនស្រីគ្រប់គ្នាចាំណាមនុស្សប្រុសសឹងតែទាំងអស់ទៅហើយ មិនចូលចិត្តមនុស្សស្រីដែលជោរខុសរបៀបឡើយ ដូច្នេះចូរកុំបណ្ដោយខ្លួនឲ្យដល់ចំណុចមួយដែលគេនិយាយថា «ជោរ»។ កុំអាងតែគេស្រឡាញ់ខ្លួនខ្លាំងហើយបានចិត្តមិនគិតក្រែងគេ ឲ្យគេតាមខ្លួនរហូតនោះ។ បើអ្នកជាមនុស្សស្រីបែបនេះ មនុស្សប្រុសនោះមិនយូរមិនឆាប់នឹងចាកចេញពីអ្នក ហើយទោះអ្នកចាប់ផ្ដើមជាថ្មីជាមួយអ្នកណាទៀតក៏លទ្ធផលនៅដដែល ព្រោះស្នេហាតម្រូវឲ្យមានទៅវិញទៅមក ដូច្នេះបើមានតែម្ខាងជាអ្នកខំ មិនយូរវានឹងដាច់។

កុំរំពឹងខ្លាំងពេកថាគេអាចផ្ដល់សេចក្ដីសុខឲ្យអ្នកគ្រប់ពេល តែអ្នកត្រូវចេះផ្ដល់សេចក្ដីសុខឲ្យខ្លួនឯងពេលគេមិនបានផ្ដល់។ កុំទាមទារឲ្យមនុស្សប្រុសផ្ដល់គ្រប់យ៉ាងមកឲ្យអ្នកអី នោះគឺមិនអាចឡើយ ព្រោះគេនៅមានរឿងច្រើនទៀតដែលត្រូវធ្វើ និងត្រូវគិត។ បើគ្រាន់តែគេមិនបានខ្វល់ពីអ្នកមួយថ្ងៃ ឬទុកអ្នកចោលនៅពេលណាមួយអ្នកមិនអាចទ្រាំបាននោះ អ្នកនឹងទទួលការឈឺចាប់ខ្លួនឯង។

រូបតំណាង

ការអត់ធ្មត់គឺសំខាន់ណាស់សម្រាប់មនុស្សស្រី ព្រោះពេលខ្លះបើគ្រាន់តែរឿងតិចតួចសោះអ្នកធ្វើវាឲ្យក្លាយជារឿងធំ នោះមួយជីវិតនេះអ្នកមិនអាចសប្បាយចិត្តនោះទេ។ បើមានរឿងអីលើសលោះ មិនពេញចិត្ត បំភ្លេចបានក៏បំភ្លេច មិននិយាយបានកុំនិយាយ។

ចិត្តល្អ និងទន់ភ្លន់នៅតែជាចំណុចខ្លាំងរបស់មនុស្សស្រី ដូច្នេះកុំចោលភាពទន់ភ្លន់ និងចិត្តល្អសម្រាប់មនុស្សរាល់គ្នា។ មនុស្សប្រុសស្រឡាញ់បំផុតមនុស្សស្រីដែលចិត្តទូលាយមិនរឹតត្បិត មិនរឹងរូស ចចេសគ្មានហេតុផល។ បែបនេះហើយត្រូវធ្វើជាមនុស្សស្រីមានហេតុផល ចេះស្ដាប់គ្នា និងមិនមានៈយកតែឈ្នះ ព្រោះនោះសុទ្ធតែជាផ្លូវនាំអ្នកទៅកាន់ភាពក្ដៅក្រហាយ មិនស្រួលចិត្ត ហើយគ្មានសេចក្ដីសុខ។

កុំខ្វល់ថាអ្នកណាចង់ជ្រៀតជ្រែកស្នេហាអ្នក ឬមនុស្សប្រុសម្នាក់នោះ បើកដៃឲ្យអ្នកណា តែអ្នកត្រូវខ្វល់ថាអ្នកល្អគ្រប់គ្រាន់ អ្នកល្អជាងគេឬនៅ។ មនុស្សប្រុសមិនល្ងង់ជ្រើសយកមនុស្សស្រីដែលអន់ជាងអ្នក នោះទេ តែបើមនុស្សស្រីនោះល្អជាងអ្នក នោះកុំបន្ទោសគេ ព្រោះមនុស្សយើងតែងត្រូវការភាពល្អ ដូច្នេះវាជាសារជាតិមនុស្សទៅហើយ។

ពេលខ្លះមិនបាច់ធ្វើខ្លួនរឹងមាំចំពោះមនុស្សដែលខ្លួនឯងស្រឡាញ់ពេកទេ ត្រូវខ្សោយខ្លះក៏ល្អ ងរខ្លះក៏ល្អ ញ៉ិកញ៉ក់ខ្លះក៏ល្អ កូរគេខ្លះក៏ល្អ ព្រោះមនុស្សប្រុសនៅតែត្រូវការមនុស្សស្រីបែបហ្នឹង គ្រាន់ទេថាកុំឲ្យលើស កុំឲ្យជ្រុលទៅបានហើយ។

ការបែកបាក់គ្នាជារឿងចៀសមិនរួច គ្រាន់តែថាយូរ ឬក៏ឆាប់ អស់ចិត្ត ឬមិនទាន់អស់ចិត្តតែប៉ុណ្ណោះ ដូច្នេះគ្មានការជួបជុំណាដែលមិនបែកគ្នាទេ។ អ្នកត្រូវត្រៀមចិត្តឲ្យបានគ្រប់ពេល ដើម្បីកុំឲ្យឈឺចាប់ខ្លាំងនៅពេលថ្ងៃនោះមកដល់។

ការពិតអ្វីៗនឹងអាចឆ្លងកាត់ទៅបានយ៉ាងរលូន បើអ្នកដឹង និងត្រៀមខ្លួនទុកមុន។ ស្នេហាក៏ដូចគ្នា អ្នកមិនអាចរំពឹងភាពឥតខ្ចោះបាននោះទេ ព្រោះក្នុងធម្មជាតិនេះ គ្មានរបស់ណា មនុស្សណាឥតខ្ចោះឡើយ៕

ចុចអាន៖បណ្តាំលោកយាយមកកាន់ចៅស្រីមុនពេលរៀបការ

អត្ថបទ៖ ផេង ផលធិតា