កំហុស៥យ៉ាងសម្រាប់អ្នកប្រើចង្ក្រានហ្គាសធំ អាចបណ្ដាលឱ្យងាយផ្ទុះឆេះ
- 2018-11-24 03:44:40
- ចំនួនមតិ 0 | ចំនួនចែករំលែក 0
កំហុស៥យ៉ាងសម្រាប់អ្នកប្រើចង្ក្រានហ្គាសធំ អាចបណ្ដាលឱ្យងាយផ្ទុះឆេះ
អារម្មណ៍ភ័យខ្លាច និងការប្រុងប្រយ័ត្នពេលប្រើចង្ក្រានហ្គាសតែងតែកើតមានចំពោះស្ត្រីមេផ្ទះ ប៉ុន្តែការដាំស្លក៏ជារឿងដែលជៀសមិនផុត។ ហេតុនេះហើយ កញ្ញាសូមបង្ហាញចំណុចខុសឆ្គងមួយចំនួនដែលអាចបណ្ដាលឱ្យមានការផ្ទុះឆេះដោយសារតែចង្ក្រានហ្គាសប្រភេទធុងធំ ដើម្បីឱ្យស្ត្រីមេផ្ទះទាំងឡាយបានយល់ដឹង និងបង្ការគ្រោះថ្នាក់ទុកជាមុន។
១-ប្រើចង្ក្រានចាស់ពេក
ចង្ក្រានដែលចាស់ៗ ឬប្រើយូរឆ្នាំពេកអាចឡើងទៅជាច្រែះ បាក់បែក ឬធ្លាយកន្លែងណាមួយដែលអ្នកមិនអាចចាប់អារម្មណ៍។ កត្តានេះអាចធ្វើឱ្យហ្គាសធ្លាយចេញមកក្រៅ ហើយស្រួលមិនស្រួលអាចកើតជាអគ្គិភ័យបានយ៉ាងងាយ។
ដូច្នេះហើយ អ្នកមិនគួរបន្តប្រើចង្ក្រានដែលមានអាយុកាលយូរទៀតទេ ហើយដោយសារតែបច្ចុប្បន្នតម្លៃចង្ក្រានក៏មិនថ្លៃប៉ុន្មាន អ្នកអាចទិញថ្មី បើមើលឃើញថាចង្ក្រានដែលប្រើសព្វថ្ងៃចាស់ពេក ពុក ឬឡើងស្នឹមខ្លាំង ហើយត្រូវជ្រើសទិញចង្ក្រានណាដែលមានយីហោល្បី មានការទុកចិត្ត ប្រើសាកនៅកន្លែងសិន និងឱ្យគេតម្លើងឱ្យបានត្រឹមត្រូវ មានសុវត្ថិភាព។
២- មិនឧស្សាហ៍ពិនិត្យទុយោហ្គាស
ការប្រើយូរ មិនត្រឹមតែតួចង្ក្រានអាចឡើងច្រែះ ឬក្បាលហ្គាសធ្លុះធ្លាយ តែខ្សែទុយោក៏ជារឿងសំខាន់ដែលត្រូវយកចិត្តទុកដាក់ផងដែរ។ កាលណាមិនបានពិនិត្យឱ្យបានត្រឹមត្រូវ ឬញឹកញាប់ បើទុយោមានកន្លែងធ្លាយត្រង់ណា អាចបណ្ដាលឱ្យភ្លើងដែលចេញពីចង្ក្រាននិងហ្គាសដែលធ្លាយត្រង់ខ្សែហ្គាសឆាបឆេះយ៉ាងងាយ។
៣- ភ្លេចមួលធុងហ្គាសបិទ ក្រោយប្រើរួច
នេះជាកំហុសមួយដែលអ្នកប្រើភាគច្រើនតែងប្រព្រឹត្តជាញឹកញាប់ ហើយក៏បណ្ដាលឱ្យមានបញ្ហាញឹកញាប់ដែរ។ ការដែលមិនបានមួលធុងហ្គាសបិទឱ្យជិត ក្រោយប្រើរួច ជាតិហ្គាសនឹងបន្តស្ថិតក្នុងខ្សែទុយោយូរ ហើយបណ្ដាលឱ្យធ្លាយខ្សែ ចេញជាផ្កាភ្លើងឆេះបាន។
ចុចអាន៖ ចំណុចត្រូវចៀសវាង បើមិនចង់ឲ្យមានអគ្គីភ័យដោយសារផ្ទុះចង្ក្រានហ្គាសតូច
៤- មិនយកចិត្តទុកលើចរន្តហ្គាសពេលកំពុងចម្អិន
មិនគួរទុកឆ្នាំងឬរបស់ដាំស្លចោលនៅលើចង្ក្រានដោយមិនមានអ្នកនៅចាំមើលឡើយ ព្រោះវាអាចបង្កទៅជាគ្រោះថ្នាក់បានជាយថាហេតុ។ ពេលកំពុងបើកហ្គាសដាំស្លលើចង្ក្រាន មិនត្រូវឱ្យមានក្រដាស ដបឬថង់ប្លាស្ទិចនៅក្បែរនោះទេ។ មួយទៀតថ្នាំបាញ់ទាំងឡាយក៏មិនត្រូវនៅក្បែរចង្ក្រានដែលកំពុងបើកហ្គាសដែរ។
៥-ប្រើឆ្នាំងឬខ្ទះមិនសមស្របនឹងទំហំចង្ក្រាន
មិនមែនឆ្នាំងណាក៏អាចប្រើបាននោះទេ។ កាលណាទំហំឆ្នាំងតូច ឬធំជាងចង្ក្រានពេកក៏អាចបង្កជាគ្រោះថ្នាក់បានដែរ។ ម្យ៉ាងទៀតអាហារមួយចំនួនអាចបណ្ដាលឱ្យឆាបឆេះយ៉ាងងាយ។ ហេតុនេះហើយ ពេលកំពុងចម្អិនគួរតែបន្ថែមការយកចិត្តទុកដាក់ ជាពិសេសការប្រើប្រាស់ភ្លើងតែម្ដង។
សរុបមក មិនថាប្រើចង្ក្រានប្រភេទណាក៏ដោយ គួរតែកុំធ្វេសប្រហែស។ ជាពិសេសបើកាលណាមានធុំក្លិនហ្គាស ឬឈ្ងៀមខុសប្រក្រតី អ្នកត្រូវតែប្រុងប្រយ័ត្នឱ្យមែនទែន។ ម្យ៉ាងទៀត បើមានបញ្ហាភ្លើងឆេះដោយប្រការណាមួយ អ្វីដែលត្រូវធ្វើគឺបើកទ្វារបង្អួចឱ្យខ្យល់ចេញចូល និងងាយគេចខ្លួន ប្រញាប់បិទហ្គាសឱ្យបានឆាប់ ហើយបើគ្មានប្រដាប់ពន្លត់អគិ្គភ័យនៅជិតខ្លួន អ្នកអាចប្រើកំណាត់ ឬភួយសើមទៅគ្របកន្លែងដែលកំពុងឆេះតូចតាចនោះសិន។ ក្រៅពីនេះ អ្នកត្រូវចេញពីក្នុងផ្ទះមកខាងក្រៅ ហើយទាក់ទងក្រុមសង្គ្រោះជាបន្ទាន់៕