៤ចំណុចត្រូវចៀសវាង បើមិនចង់ឲ្យមានអគ្គីភ័យដោយសារផ្ទុះចង្ក្រានហ្គាសតូច

2017-09-18 02:12:07
ចំនួនមតិ 0 | ចំនួនចែករំលែក 0

បើទោះបីជាចង្ក្រានហ្គាសមីនីមានរូបរាងតូចក៏ដោយ តែឥទ្ធិពលបំផ្លាញរបស់វាគឺមិនអាចលេងសើចបាននោះឡើយ។

កាលពីដើមខែកញ្ញាកន្លងទៅនេះ គ្រួសារមួយដែលមានសមាជិកប្រមាណ១០នាក់នៅខេត្ត Dak Lak ប្រទេសវៀតណាមទើបតែក្លាយជាជនរងគ្រោះនៃការផ្ទុះចង្ក្រានហ្គាសធ្វើឲ្យមានការភ្ញាក់ផ្អើលយ៉ាងខ្លាំង។ ហេតុការណ៍នេះបានធ្វើមនុស្សម្នាក់ត្រូវរលាក និងម្នាក់ទៀតដាច់ជើងដោយសាររត់ជាន់អំបែងកែវ។

ហេតុការណ៍ខាងលើបានធ្វើឲ្យអ្នកគ្រប់គ្នាភ័យខ្លាចយ៉ាងខ្លាំងនៅពេលប្រើប្រាស់ចង្ក្រានហ្គាសប្រភេទនេះ។ ដើម្បីជៀសវាងគ្រោះថ្នាក់បែបនេះកើតឡើង អ្នកគួរអនុវត្តតាមវិធីសាស្ត្រខាងក្រោម៖

១. ហាមដាច់ខាតប្រើចង្ក្រានចាស់

ប្រសិនបើ ចង្ក្រានចាប់ច្រែស ឬរបកថ្នាំហើយនោះ សូមប្ដូរចង្ក្រានថ្មីហើយឈប់ប្រើអាចាស់បន្តទៀត។ ហើយបើគន្លឹះកាច់លែងស៊ីភ្លើងហើយ ក៏ត្រូវប្ដូរចង្ក្រានថ្មីដូចគ្នា។ កំប៉ុងហ្គាសចាស់រហូតដល់មានច្រែសលើសពី៥០%ក៏ត្រូវចៀសវាងដូចគ្នា។

២. មិនរំលែកហ្គាស

រំលែកហ្គាសគឺសកម្មភាពបញ្ចូលហ្គាសពីកំប៉ុងមួយទៅកំប៉ុងមួយទៀត។ បើសិនជាមិនមែនជាអ្នកជំនាញទេ ក្នុងពេលរំលែកនោះអាចមានហានិភ័យកើតឡើងដោយមជ្ឈដ្ឋានជុំវិញ។ ដូចនេះល្អបំផុតគឺមិនរំលែកតែម្ដង

៣. មិនប្រើឆ្នាំធំពេកចំពោះចង្ក្រានតូច

ជើងទ្រចង្ក្រានហ្គាសមីនីគឺទាបជាងចង្ក្រានហ្គាសធំ ដូចនេះបើប្រើឆ្នាំងធំពេក វានឹងធ្វើឲ្យភ្លើងរាតត្បាតធំឡើង។ នៅពេលនោះភ្លើងអាចប៉ះនឹងហ្គាសផ្ទាល់បង្កគ្រោះថ្នាក់ដល់អ្នកប្រើប្រាស់។

៤. មិនស្ងោរក្នុងរយៈពេលវែង

ចង្ក្រានមីនីគឺសម្រាប់ប្រើតែពេលបណ្ដោះអាសន្នតែប៉ុណ្ណោះមិនអាចយកមកស្ងោរស៊ុប ឬឆ្អឹងរាប់ម៉ោងបាននោះឡើយត្បិតវាឆាប់ក្ដៅជាងចង្ក្រានធំ។ បើចង់ប្រើរយៈពេលយូរគួរប្រើចង្ក្រានធំជំនួសវិញទើបសុវត្ថិភាព៕

ប្រភព៖ Eva ប្រែសម្រួល៖ Caramel