ចាំអង្កាល់! យាយកន្ដែរ៉ែបង្ហាត់ល្ខោនខោល និងរបាំបុរាណឥតគិតថ្លៃ

2018-10-12 05:26:43
ចំនួនមតិ 0 | ចំនួនចែករំលែក 0

មកដល់ហើយសម្រាប់អ្នកដែលចង់រៀនទម្រង់ល្ខោនខោលនិងរបាំក្បាច់បុរាណតែអត់មានពេល ឥឡូវនេះក្រុមសិល្បៈយុវជនល្ខោនខោលជំនាន់ថ្មីកំពុងជ្រើសរើសបេក្ខជនដើម្បីចូលរួមក្នុងជំនាន់ទី៦ដែលនឹងចាប់ផ្ដើមហាត់នៅចុងខែតុលានេះហើយ។

រូបភាពពី ទំព័របណ្ដាញសង្គម ក្រុមសិល្បៈយុវជនល្ខោនខោលជំនាន់ថ្មី

ការហាត់ល្ខោនខោលជាមួយនឹងក្រុមសិល្បៈយុវជនល្ខោនខោលជំនាន់ថ្មី អ្នកនឹងទទួលបាននូវចំណេះដឹងអំពីល្ខោនខោល យល់ដឹងពីតួអង្គនីមួយៗជាពិសេសគឺក្បាច់រាំរបស់តួអង្គ ដែលមានការបង្ហាត់ពីលោកគ្រូ ហង់ ភូមិរ៉ា ដែលគេនិយមហៅយាយកន្ដែរ៉ែផ្ទាល់តែម្ដង។

រូបភាពពី ទំព័របណ្ដាញសង្គម ក្រុមសិល្បៈយុវជនល្ខោនខោលជំនាន់ថ្មី

តាមរយៈទំព័របណ្ដាញសង្គមផ្លូវការរបស់ក្រុមសិល្បៈយុវជនល្ខោនខោលជំនាន់ថ្មី បានបញ្ជាក់ថាការហាត់ល្ខោននិងរបាំបុរាណគឺធ្វើឡើងនៅរៀងរាល់ថ្ងៃអាទិត្យ និងមិនតម្រូវឲ្យបង់ថវិកាអ្វីនោះឡើយ។ ការបើកបង្រៀនលើកនេះគឺទទួលយកសិស្សដែលស្រលាញ់សិល្បៈល្ខោនខោល ហើយជ្រើសយកតែសិស្សស្រីចំនួន៣០នាក់ និងសិស្សប្រុស៣០នាក់តែប៉ុណ្ណោះ។

រូបភាពពី ទំព័របណ្ដាញសង្គម ក្រុមសិល្បៈយុវជនល្ខោនខោលជំនាន់ថ្មី

ក្រុមសិល្បៈយុវជនល្ខោនខោលជំនាន់ថ្មី គឺជាក្រុមដែលបង្កើតឡើងក្នុងគោលបំណង បង្ហាត់បង្រៀន យុវជនឲ្យមានចំណេះដឹងផ្នែកសិល្បៈបុរាណ នឹងចូលរួមចំណែកក្នុងការថែរក្សានូវទម្រង់សិល្បៈបុរាណមួយទុកអោយខ្មែរជំនាន់ក្រោយ។

រូបភាពពី ទំព័របណ្ដាញសង្គម ក្រុមសិល្បៈយុវជនល្ខោនខោលជំនាន់ថ្មី

ការហាត់ល្ខោននិងរបាំបុរាណ ជាចំណែកមួយក្នុងការចូលរួមអភិរក្សនិងថែរក្សានូវសម្បត្តិវប្បធម៌បន្សល់ពីដូនតាយើង ដូច្នេះចាំអីទៀតអាចដាក់ពាក្យចូលរៀនហាត់ហើយកុំភ្លេចទៅធ្វើតេសនៅថ្ងៃទី២១ ខែតុលា ឆាប់ៗនេះទាំងអស់គ្នាណា។