៥វិធីងាយៗជួយសម្រកភ្លៅឲ្យតូចស្លីម ស្លៀកខោចេញរាងស្អាត ជឿជាក់

2018-08-22 05:14:53
ចំនួនមតិ 0 | ចំនួនចែករំលែក 0

សម្រាប់ប្រិយមិត្តស្រីៗដែលកំពុងមានបញ្ហាភ្លៅធំ ភ្លៅមិនតឹងណែន ស្លៀកខោរឹបរាងមិនសូវស្អាត ខាងក្រោមនេះ កញ្ញាសូមបង្ហាញពីតិចនិកខ្លះៗដើម្បីជាជំនួយក្នុងការសម្រក ដែលសុទ្ធសឹងជាវិធីងាយៗ ដែលប្រិយមិត្តអាចអនុវត្តបានដោយខ្លួនឯងនៅផ្ទះ។ កុំឲ្យខាតពេលយូរ យើងមកអានទាំងអស់គ្នាតែម្ដង រួចហើយអនុវត្តឲ្យបានរាល់ថ្ងៃដើម្បីឃើញលទ្ធផល៖

១. ផឹកទឹកឲ្យច្រើន

ការផឹកទឹកស្អាតគឺជារឿងដ៏ចាំបាច់សម្រាប់រាងកាយ។ ក្នុងមួយថ្ងៃៗយើងត្រូវញ៉ាំទឹកឲ្យបានលើសពី ១លីត្រ ហើយបើបាន ២លីត្រកាន់តែប្រសើរ។ ទឹកត្រូវបានចាត់ទុកថាជារបស់ជំនួយសំខាន់ក្នុងការសម្រកទម្ងន់ ហើយសម្រកជើងក៏ដូចគ្នា។

២. ក្បាច់ហាត់ប្រាណ Squat

នេះជាក្បាច់ហាត់ប្រាណដែលស្រីៗមិនចាំបាច់បញ្ចេញកម្លាំងច្រើន ប៉ុន្តែវានឹងអាចជួយបន្តឹងសាច់ដុំជើង និងក្បាលពោះបានល្អបំផុត។ ដូច្នេះសម្រាប់អ្នកដែលចង់សម្រកក្បាលពោះ និងភ្លៅដោយមិនបាច់បញ្ចេញកម្លាំងខ្លាំង គួរជ្រើសរើសក្បាច់នេះ។ អ្នកមិនទាន់ចេះ អាចទស្សនាវីដេអូខាងក្រោម៖

៣. ធាក់កង់

មិនថាចេញទៅជិះកង់នៅខាងក្រៅ ឬហាត់ប្រាណក្បាច់ធាក់កង់ (គេងផ្ងារហើយលើកជើងឡើងចុះឆ្លាស់គ្នាដូចធាក់កង់) គឺសុទ្ធតែជាជម្រើសល្អសម្រាប់អ្នកដែលចង់សម្រកភ្លៅ ប៉ុន្តែត្រូវធ្វើឲ្យបានជាប្រចាំ ឬរាល់ថ្ងៃ ទើបអាចទទួលបានលទ្ធផល មិនអាចធ្វើមួយថ្ងៃ ឈប់ពីរបីថ្ងៃនោះទេ។

៤. កាត់បន្ថយជាតិប្រៃ

ការកាត់បន្ថយជាតិសូដ្យូម ឬជាតិប្រៃ អាចកាត់បន្ថយអាការៈហើម ដែលកើតឡើងដោយសារមានទឹក ឬទឹករងៃដក់នៅក្នុងផ្នែកផ្សេងៗនៃរាងកាយច្រើនពេក។ អ្នកអាចសង្កេតមើលបានថា នៅពេលដែលអ្នកទទួលទានសូដ្យូមច្រើន នោះនឹងមានអាការហើមជើង ហើមដៃ ឬហើមខ្លួន។ ហេតុដូច្នេះហើយអ្នកគួរទទួលទានប្រៃល្មម ឬតិចតួចបានហើយ។

៥. រត់

ចំណុចនេះ គ្រប់គ្នាប្រហែលជាដឹងច្បាស់ហើយថា ការរត់គឺអាចជួយឲ្យយើងសម្រកភ្លៅបានយ៉ាងល្អ ហើយជាវិធីងាយ។ ប៉ុន្តែក៏ត្រូវរត់ឲ្យត្រឹមត្រូវដែរ មិនមែនរត់យកស្លាប់រស់តែមួយថ្ងៃ ពីរថ្ងៃហើយក៏ឈប់នោះទេ។ ការរត់ដែលមានប្រសិទ្ធភាព គឺត្រូវរត់ក្នុងល្បឿនសមរម្យ ហើយរត់ឲ្យបានជាប្រចាំរាល់ថ្ងៃ នោះសាច់ដុំជើងរបស់អ្នកនឹងណែនស្អាត។

ទាំងអស់នេះសុទ្ធតែវិធីងាយៗ ប៉ុន្តែដូចដែលនិយាយម្ដងហើយម្ដងទៀត គឺអ្នកត្រូវមានការអត់ធ្មត់ កុំធ្វើអ្វីតាមតែចិត្តក្ដៅ ហើយបោះបង់ចោលងាយៗ។ គួរអនុវត្តល្មមៗតាមកម្លាំងប៉ុន្តែឲ្យបានទៀងទាត់យ៉ាងហោច ៣ទៅ៤សប្ដាហ៍ នោះនឹងឃើញលទ្ធផលមិនខាន ៕

ចុចអាន៖

ប្រភព៖ Spiceee ប្រែសម្រួល៖ ស្វាយ វ៉ាន់ថន