ដេកលេងនៅតែផ្ទះ Jun Jihyun នៅតែទទួលលុយ១៥ម៉ឺនដុល្លាររាល់ខែ ដោយសាររឿងនេះ

2018-08-18 04:00:34
ចំនួនមតិ 0 | ចំនួនចែករំលែក 0

ទោះបីជាមួយរយៈនេះ មិនមានគម្រោងអ្វីនៅក្នុងសិល្បៈក៏ដោយ តែកំពូលតារាសម្ដែងស្រីកូរ៉េ Jun Jihyun នៅតែមានចំណូលចូលជារឿយៗដោយវិនិយោគទុនត្រូវកន្លែង។

កាលពីថ្ងៃទី១៦ខែសីហាមុននេះ បណ្ដាញព័ត៌មាន ON របស់ហុងកុងបានរាយការណ៍ថា បច្ចុប្បន្នតារាសម្ដែងស្រីជួរមុខកូរ៉េ Jun Jihyun មានអចលនទ្រព្យចំនួន៧នៅទីក្រុងសេអ៊ូល។ ជារៀងរាល់ខែ តួរឿង “Legend of the Blue Sea” ទទួលបានថ្លៃជួលផ្ទះចំនួន១៦០លានវ៉ុន (១៥ម៉ឺនដុល្លារ)។ អាស្រ័យហេតុនេះ ទោះបីជាមិនថតរឿង ឬសកម្មភាពច្រើនក្នុងសិល្បៈក្នុងរយៈពេលនេះក៏ដោយ ក៏ស្រីស្អាតវ័យ៣៦ឆ្នាំមានចំណូលច្រើនគួរឲ្យកត់សម្គាល់។ អចលទ្រព្យដែលស្រីស្អាតរូបនេះកំពុងដាក់ជួលបានថ្លៃជាងគេ គឺជួលឲ្យហាងកាហ្វេ Star Buck ដោយតម្លៃជួលប្រចាំខែឡើងដល់១៣០០០ដុល្លារ។

គួរបញ្ជាក់ផងដែរថា កាលពីដើមឆ្នាំ សិល្បការិនីកើតឆ្នាំ១៩៨១ បានធ្វើឲ្យគេភ្ញាក់ផ្អើលនៅពេលទិញផ្ទះតម្លៃ២៩លានដុល្លារ នៅតំបន់ Yongsan ទីក្រុងសេអ៊ូល។ បូកសរុបអចលនទ្រព្យទាំង៧កន្លែងរបស់ Jun Jihyun គេសន្និដ្ឋានថាមានតម្លៃប្រមាណ៦៤លានដុល្លារ៕