មើលត្រឹមកាយវិការថតដែលចូលចិត្ត ក៏អាចដឹងថាអ្នកជាមនុស្សបែបណា

2018-07-20 09:03:36
ចំនួនមតិ 0 | ចំនួនចែករំលែក 0

ជារឿងមិនអាចបដិសេធបានឡើយដែលថាស្រីៗបច្ចុប្បន្នច្រើនចូលចិត្តថតរូបបង្ហោះតាមបណ្ដាញសង្គម ហើយម្នាក់ៗប្រាកដជាមាន Style ឬកាយវិការណាមួយដែលខ្លួនចូលចិត្តថតញឹកញាប់បំផុត។ តាមការពិត កាយវិការថតរូបដែលអ្នកចូលចិត្តនោះក៏អាចបង្ហាញពីអត្តចរិតអ្នកបានខ្លះដែរ។ ចង់ដឹងថាអាចបញ្ជាក់យ៉ាងណាខ្លះនោះ សូមតាមដានជាមួយ កញ្ញាខាងក្រោមនេះ៖

១. អ្នកចូលចិត្តថតធ្វើមុខមាត់លេងសើចខ្លាំង

សម្រាប់អ្នកដែលចូលចិត្តធ្វើមុខធ្វើមាត់កំប្លែងៗបែបនេះ ការពិតគឺជាមនុស្សដែលខ្មាសអៀនច្រើនទៅវិញទេ ដោយពួកគេមិនសូវហ៊ានបង្ហាញអារម្មណ៍ត្រង់ៗចេញមកឲ្យអ្នកណាដឹងឡើយ។ នៅពេលលួចស្រលាញ់អ្នកណា ក៏មិនធ្វើអ្វីឲ្យគេដឹងទាំងអស់។ នៅពេលនៅជាមួយមិត្តភ័ក្ដិ ពួកគេនឹងជាមនុស្សដែលចូលចិត្តលេងសើច ដែលអ្នកណាៗក៏ចូលចិត្ត ចង់នៅក្បែរ ប៉ុន្តែបើជាមួយអ្នកមិនស្គាល់គ្នា ពួកគេនឹងស្ងាត់ស្ងៀមតែម្ដង។

២. អ្នកចូលចិត្តថតញញឹមអស់ៗ

ភាគច្រើនអ្នកដែលចូលចិត្តថតរូបបែបនេះគឺជាមនុស្សដែលមានចិត្តល្អ ញញឹមស្រស់ស្រាយ រួសរាយជាមួយអ្នកគ្រប់គ្នា ចូលចិត្តជួយយកអាសាអ្នកដទៃដោយមិនរំពឹងអ្វីតបស្នង ដែលធ្វើឲ្យពួកគេមានមិត្តភ័ក្ដិច្រើន។ ត្បិតតែពួកគេមានមិត្តច្រើន ប៉ុន្តែបុគ្គលក្រុមនេះក៏ជាមនុស្សដែលលាក់អារម្មណ៍ច្រើនដែរ ប៉ុន្តែបើពួកគេបើកចំហខ្លួនឯងជាមួយអ្នកណាម្នាក់ គឺទាល់តែម្នាក់នោះជាមនុស្សដែលពួកគេទុកចិត្ត។

៣. អ្នកថតរូបបែរចំហៀង

អ្នកចូលចិត្តថតរូបបែបនេះ ច្រើនជាមនុស្សដែលរឹងមាំ មានការគំនិត និងពោរពេញដោយជំហរផ្ទាល់ខ្លួន។ ពួកគេជាមនុស្សពូកែ និងឧស្សាហ៍ធ្វើការ ពូកែដោះស្រាយបញ្ហា និងអាចជំរុញចិត្តអ្នកដទៃបាន។ អត្តចរិតល្អរបស់គេ ធ្វើឲ្យមានតែមនុស្សចង់ចូលក្បែរ ប៉ុន្តែពេលខ្លះពួកគេក៏ទន់ខ្សោយដូចគ្នា។

៤. អ្នកថតឈរផ្ចុចជើងដូចម៉ូដែល

សម្រាប់អ្នកចូលចិត្តថតបែបនេះ ភាគច្រើនគឺជាអ្នកដែលមានការជឿជាក់ ហ៊ានស៊ីហ៊ានសងគ្រប់រឿង ចូលចិត្តធ្វើអ្វីតាមចិត្តខ្លួនឯង ចូលចិត្តការប្រកួតប្រជែង ប៉ុន្តែគឺជាមនុស្សដែលមានអារម្មណ៍ឆាប់ប្រែប្រួល។ ពួកគេជាមនុស្សដែលចូលចិត្តភាពស៊ីវិល័យ ស្រស់ស្អាត។

៥. អ្នកចូលចិត្តថតយកដៃចាប់ថ្ពាល់ ឬច្រត់ចង្កា

ពួកគេជាមនុស្សដែលមានសិល្បៈក្នុងខ្លួនច្រើន មិនចូលចិត្តឲ្យអ្នកណាមករវល់ជាមួយជីវិតឯកជនរបស់ខ្លួន។ គឺជាមនុស្សដែលលះបង់ខ្លាំងទាំងរឿងការងារ និងស្នេហា។ ពួកគេសន្សំលុយមិនប៉ិនទេ ព្រោះច្រើនតែចាយតាមអារម្មណ៍។ ជាមនុស្សដែលស្រលាញ់អ្នកណាគឺស្រលាញ់ខ្លាំង តែបើស្អប់ ក៏ស្អប់ខ្លាំងដូចគ្នា។

៦. អ្នកចូលចិត្តថតរូបឱបដៃ

អ្នកចូលចិត្តថតរូបបែបនេះគឺមិនសូវខុសគ្នាពីចំណុចខាងលើមុននេះទេ ព្រោះពួកគេជាមនុស្សដែលចូលចិត្តភាពឯករាជ្យ ចូលចិត្តប្រថុយប្រថាន និងហ៊ានស៊ីហ៊ានសងដូចគ្នា។ ប៉ុន្តែពួកគេមានការគ្រប់គ្រងអារម្មណ៍បានល្អ និងប្រើហេតុផលក្នុងការដោះស្រាយបញ្ហា។ ពួកគេមិនចូលចិត្តឲ្យអ្នកដទៃយកប្រៀប ជាមនុស្សដែលនឹងនរក្នុងរឿងស្នេហា អ្នកណាបានធ្វើជាគូប្រាកដជាទទួលបានការថែទាំយ៉ាងល្អ។

យ៉ាងម៉េចដែរ ចូលចិត្តការថតមួយណា ហើយមានត្រូវតាមការទស្សន៍ទាយខាងលើឬអត់? ការទស្សន៍ទាយអត្តចរិតអាចមានខុសខ្លះត្រូវខ្លះអាស្រ័យលើបច្ច័យជាច្រើនទៀតដូចជាចរិតផ្ទាល់ខ្លួនរបស់មនុស្សម្នាក់ៗជាដើម។ ទោះយ៉ាងណាមិនបាច់ Serious ជាមួយវាពេកក៏បាន គ្រាន់តែមើលលេងជាការកម្សាន្តៗគ្រប់គ្រាន់ហើយ ៕

ចុចអាន៖

ប្រភព៖ jelly ប្រែសម្រួល៖ ស្វាយ វ៉ាន់ថន