វិធីសាស្ត្រ៣ រកសង្សារ ឲ្យអ្នកអត់គូយូរឆ្នាំ ឬមិនដែលមានសោះ បានយ៉ាងមានប្រសិទ្ធភាព

2018-06-02 04:25:33
ចំនួនមតិ 0 | ចំនួនចែករំលែក 0

មនុស្សជាច្រើន មួយថ្ងៃៗ អង្គុយតែត្អូញថានៅលីវរហូត មិនដឹងថាពេលណាមានអ្នកបណ្ដើរនឹងគេ នឹងមិនបានរកនឹកពីវិធីដើម្បីកែប្រែស្ថានភាពនេះឡើយ។ សម្រាប់អ្នកដែល នៅម្នាក់ឯងយូរឆ្នាំ ឬតាំងពីកំណើតតែម្ដងអាចសាកល្បង វិធីទាំងនេះសិនបាន។

ពេលខ្លះយើងសួរខ្លួនឯងថា ហេតុអ្វីមកដល់អាយុនេះហើយ នៅតែឯកាម្នាក់ឯង ខណៈមិត្តភ័ក្ដិខ្លះប្ដូរសង្សារ មើលតែប្ដូរខោអាវទៅហើយនោះ។ ការពិតគឺគ្មានសង្សារឯណា ធ្លាក់មកពីលើមេឃឲ្យយើងស្រាប់នោះទេ ទាល់តែយើងត្រូវស្វះស្វែងខ្លួនឯង ទើបរកបាន។ អ្នកប្រើតិចនិកខាងក្រោមបើសិនជាយើងនៅព្រៅយូរពេក។

១. ចូលសង្គមឲ្យបានច្រើន

មាត់ត្អូញថាពិបាកចិត្តណាស់ថានៅតែម្នាក់ឯងរហូត តែសៅរ៍អាទិត្យឡើង កុំមើល គឺនៅតែផ្ទះមិនដែលទៅណាឡើយ។ ហើយប្រុងឲ្យមនុស្សប្រុសធ្លាក់ពីលើមេឃឬយ៉ាងម៉េច? មូលហេតុដែលមិនព្រមចេញក្រៅនេះហើយ គឺជាកត្តាដែលធំបំផុត ធ្វើឲ្យអ្នកអត់គូ។ បើនៅរៀន គួរចូលរួមរាល់កម្មវិធីដែលសាលារៀបចំ រីឯអ្នកធ្វើការវិញ អាចចូលរួមរាល់ដំណើរ កម្សាន្តដែលក្រុមហ៊ុនរៀបចំ ក៏ដូចជាសិក្ខាសាលានានា កុំសម្ងំនៅតែផ្ទះឲ្យសោះ។

២. ញញឹមឲ្យបានច្រើន

ស្ដាប់មើលទៅដូចសាមញ្ញ តែវិធីនេះពិតជាមានប្រសិទ្ធភាពពិតមែន។ អ្នកសាកគិតមើលទៅ បើសិនជាយើងធ្វើមុខស្អុយគ្រប់ពេល បើគេចង់ចូលមកនិយាយជាមួយយើងក៏គេមិនហ៊ានដែរ។ ញញឹមឲ្យបានស្រស់បំផុត តាមដែលអាចធ្វើទៅបាន ព្រោះគេតែងពោលថា គ្មានទេមនុស្សស្រីអាក្រក់ មានតែមនុស្សស្រីមិនចេះញញឹមតែប៉ុណ្ណោះ ព្រោះអ្នកណាញញឹមក៏ស្អាតជាងមុនដោយស្វ័យប្រវត្តិដែរ។

៣. ក្លាហានជាងមុន

មនុស្សស្រីយើងតែងគិតថា ចាំឲ្យគេចូលចែចូវមុនទើបត្រឹមត្រូវ ព្រោះបើយើងហ៊ានតែញ៉ែគេមុនប្រាកដជាត្រូវគេវាយតម្លៃជាក់ជាមិនខាន។ យ៉ាងណាក្ដី នេះគឺជាសតវត្សទី២១ទៅហើយ គំនិតនេះក៏គួរតែបោះបង់ចោលដែរ។ បច្ចុប្បន្ននេះ ប្រសិនបើយើងមិនតាមចាប់អ្វីដែលយើងស្រលាញ់ទេ អ្នកដទៃនឹងចូលមកដណ្ដើមពីយើង។ ដូចនេះដើម្បីទទួលបានអ្វីដែលយើងចង់បាន ត្រូវក្លាហានឡើង។ ឆាតទៅគេមុន ទូរសព្ទទៅគេមុន ណាត់គេទៅមើលកុន បើគេមិនបដិសេធនឹងសំណើទាំងនេះទេ គេក៏មានអារម្មណ៍លើយើងដែរ ព្រោះគ្មានអ្នកណាគេទៅអង្គុយក្នុងរោងកុនរាប់ម៉ោងជាមួយមនុស្សដែលខ្លួនមិនចូលចិត្តឡើយ៕