ចង់ដឹងថាខ្លួនឯងមានផ្ទៃពោះ ឬក៏អត់ ពិនិត្យមើលសញ្ញាទាំងនេះ

2018-02-02 01:20:00
ចំនួនមតិ 0 | ចំនួនចែករំលែក 0

មានសញ្ញាមួយចំនួនក៏អាចបង្ហាញពីការមានផ្ទៃពោះបានដែរ ដូច្នេះហើយអ្នកត្រូវតែយកចិត្តទុកដាក់សង្កេតឲ្យមែនទែន។ បើសិនជាអ្នកសង្កេតឃើញថាខ្លួនឯងមានសញ្ញាទាំងនេះ នោះអ្នកអាចនឹងមានផ្ទៃពោះហើយ ៖

១. ខកខានការមករដូវ

វាអាចជាសញ្ញាមួយដែលអាចបញ្ជាក់ថាអ្នកអាចនឹងមានផ្ទៃពោះ ប៉ុន្តែនេះគឺសម្រាប់មនុស្សស្រីដែលមករដូវទៀងទាត់ប៉ុណ្ណោះ រីឯស្ត្រីដែលមកមិនទៀងវិញគឺមិនអាចសន្និដ្ឋានតែចំណុចនេះមួយទេ គឺត្រូវមើលលើចំណុចជាច្រើនទៀត។

២. ឈឺចាប់ក្នុងសុដន់ ឬប្រែប្រួលទម្រង់នៃសុដន់

អ្នកចាប់ផ្ដើមមានអារម្មណ៍ថាឈឺតិចៗចាប់ ឬស្រគាលក្នុងសុដន់ដែលហាក់ដូចជាអារម្មណ៍មុនពេលមករដូវដែរ ប៉ុន្តែវាបន្តកើនឡើងជាលំដាប់ ហើយសុដន់របស់អ្នកចាប់ផ្ដើមផ្លាស់ប្ដូររូបរាងដើម្បីផលិតទឹកដោះ។ សញ្ញានេះក៏អាចបញ្ជាក់ថាអ្នកនឹងអាចមានផ្ទៃពោះផងដែរ។

៣. អស់កម្លាំង ល្ហិតល្ហៃ

អ្នកមានអារម្មណ៍ថាអស់កម្លាំងនៅដើមសប្ដាហ៍ ហើយបន្តរហូតដល់សប្ដាហ៍បន្ទាប់ៗទៀត ដោយសារតែការកើនឡើងកម្រិតនៃប្រូសេស្តេរ៉ូ។

៤. មានអារម្មណ៍ចង់ក្អួត ឬ ក៏ក្អួតតែម្ដង

វាជាសញ្ញានៃការមានផ្ទៃពោះ ព្រោះនៅពេលដែលមានការបង្កកំណើតនៅរវាងពីរនិងបួនសប្ដាហ៍ អ្នកអាចមានអារម្មណ៍ថាចង់ក្អួត ដែលហៅការ «ការចាញ់កូន» ដែលអាចមានរយៈពេលត្រឹមតែត្រីមាសដំបូងនៃការមានផ្ទៃពោះបន្ទាប់មកវានឹងត្រឡប់ទៅជាធម្មតាវិញ។

៥. នោមញឹកញាប់

អំឡុងពេលមានផ្ទៃពោះ ស្ត្រីមានការកើនឡើងជាតិទឹកនៅក្នុងរាងកាយ ហើយតែងតែមានអារម្មណ៍ចង់នោមច្រើនជាងថ្ងៃធម្មតា ក៏ព្រោះតែការកើនឡើងជាតិទឹកដែលបណ្ដាលត្រូវការបន្ថែមដើម្បីទៅដំណើរការក្នុងតម្រងនោមនិងចូលទៅក្នុងប្លោកនោម ដែលធ្វើឲ្យអ្នកមានអារម្មណ៍បែបនេះ។

៦. ឡើងក្បាលពោះ ឬ ហើមពោះ

បើមើលទៅពោះរបស់អ្នកកាន់តែធំទៅៗ ស្លៀកអីចេះតែតឹង ចេះតែចង្អៀត តែអ្នកមិនបានចាប់អារម្មណ៍ថាជាសញ្ញានៃការមានផ្ទៃពោះនោះទេ ព្រោះប្រហែលគិតថាជាការឡើងទម្ងន់។ តែវាក៏អាចជាការកើនឡើងនៃស្បូននៅពេលដែលទារកចាប់កំណើត។

៧. ឈឺក្បាល ឬ ឈឺចង្កេះ

វាអាចនឹងមានបញ្ហានេះនៅដំណាក់កាលដំបូង ព្រោះអ័រម៉ូនពេលខ្លះអាចបង្កឲ្យមានការកើនឡើងនៃការឈឺក្បាល ការឈឺ ឬ រោយ ចង្កេះនៃរយៈពេលដំបូងនៃការមានផ្ទៃពោះ។

បើអ្នកកំពុងតែពិនិត្យឃើញសញ្ញាប៉ុន្មានខាងលើនេះវាអាចនឹងជាសញ្ញាដំបូងនៃការមានផ្ទៃពោះ ដូច្នេះដើម្បីឲ្យប្រាកដក្នុងចិត្ត អ្នកគួរតែទៅរធ្វើតេស្ត ជាមួយគ្រូពេទ្យដែលមានជំនាញ៕

ប្រភព៖ healthcentral ប្រែសម្រួល៖ ផេង ផលធិតា