តួ តុងហ្វាពូហ្វាយ Joe Chen ត្រូវប៉ូលិសចាប់ពេលទៀបភ្លឺព្រោះបើកបរទាំងស្រវឹង

2018-01-05 04:28:00
ចំនួនមតិ 0 | ចំនួនចែករំលែក 0

ហេតុការណ៍តារាសម្ដែងជួរមុខចិន Joe Chen ត្រូវប៉ូលិសចាប់ដោយសារបើកបរក្នុងពេលស្រវឹងកំពុងធ្វើឲ្យអ្នកគាំទ្រភ្ញាក់ផ្អើលយ៉ាងខ្លាំង។

កាលពីយប់អធ្រាត្រថ្ងៃទី៣រំលងចូលថ្ងៃទី៤ខែមករានេះ បណ្ដាញសង្គមចិនកំពុងជ្រួលច្របល់ជាខ្លាំងជាមួយព័ត៌មានតារាសម្ដែងស្រីលំដាប់ A តៃវ៉ាន់ Joe Chen ត្រូវបានប៉ូលិសចាប់ពេលកំពុងធ្វើដំណើរដោយរថយន្តផ្ទាល់ខ្លួនរបស់នាង។ តាមនោះដែរ នៅពេលដែលត្រូវបានឃាត់ខ្លួន ស្រីស្អាតវ័យ៣៨ឆ្នាំ ត្រូវបានគេវាស់កម្រិតជាតិអាកុលនៅក្នុងខ្លួនគឺ ០,៦៧ លើសពីកម្រិតដែលចាប់អនុគ្រោះឆ្ងាយណាស់។

ក្រោយពេលត្រូវឃាត់ខ្លួនប៉ុន្មានម៉ោងតួ តុងហ្វាពូហ្វាយក៏ត្រូវបានអនុញ្ញាតឲ្យត្រលប់ទៅផ្ទះវិញ ដោយត្រូវមានមុខនៅស្នងការប៉ូលិសនៅពេលព្រឹកថ្ងៃដដែល។ រហូតដល់ម៉ោង៩ថ្ងៃទី៤ថ្ងៃដដែល តារាកើតឆ្នាំ១៩៧៩ បានមានវត្តមាននៅប៉ុស្តិ៍ប៉ូលិសទីក្រុងតៃប៉ិដោយរូបរាងនឿយហត់យ៉ាងខ្លាំង។ មានមុខនៅទីនេះ នាងបានឱនក្បាលសូមទោសអ្នកគាំទ្រ និងអ្នកកាសែតជាច្រើនដង ដោយសូមអភ័យទោសដល់ខ្លួនផង។ ជាមួយគ្នានោះដែរ នាងក៏ត្រូវបង់លុយផាកពិន័យចំនួន២៥០០ដុល្លារផងដែរ ដោយសារបើកបរក្នុងពេលស្រវឹង។

ក្រោយពីត្រលប់ពីប៉ុស្តិ៍ប៉ូលិសវិញ តារាស្រីរូបនេះបានបកស្រាយនៅលើបណ្ដាញសង្គមរបស់ខ្លួនថា៖ នៅក្នុងយប់កើតហេតុនោះ ក្រោយពេលញ៉ាំស្រាក្រហមហើយ នាងក៏បើកឡានផ្ទាល់ខ្លួនចេញក្រៅ ប្រុងរកអីទទួលអាហារពេលយប់ដោយគិតថាកម្រិតអាកុលក្នុងខ្លួនរបស់នាងមិនហួសកម្រិត តែមិននឹកស្មានថាក៏កើតរឿងដូចនេះ។ ជាចុងក្រោយនាងបានបន្ថែមថា នាងពិតជារៀនមេរៀនមួយដ៏មានតម្លៃក្រោយហេតុការណ៍នេះឡើង ហើយក៏មិនភ្លេចសូមទោសអ្នកទាំងអស់គ្នាម្ដងទៀតដែរ៕