៦វិធីសាស្រ្តធ្វើឲ្យមនុស្សដែលលែងមានជំនឿលើអ្នកត្រលប់មកជឿជាក់លើអ្នកសាជាថ្មី

2017-11-16 01:02:00
ចំនួនមតិ 0 | ចំនួនចែករំលែក 0

ជាធម្មតា មនុស្សដែលធ្លាប់ត្រូវបានគេក្បត់ កុហក បោកប្រាស់ ប្រាកដជាឈឺចាប់ខ្លាំង រហូតធ្វើឲ្យពួកគេរាងចាល លែងហ៊ានជឿជាក់លើអ្នកណាតទៅទៀត។ ដូច្នេះប្រសិនអ្នកបានធ្វើឲ្យអ្នកណាម្នាក់បាត់បង់ជំនឿលើអ្នក ឬជួបមនុស្សដែលធ្លាប់ជួបរឿងបែបនេះ ខាងក្រោមនេះជាវិធីសាស្ត្រដែលអាចឲ្យអ្នកធ្វើឲ្យពួកគេមានជំនឿលើអ្នកសារជាថ្មី៖

១. ទទួលខុសត្រូវចំពោះទង្វើរបស់អ្នក

អ្នកត្រូវទទួលស្គាល់កំហុសចាស់ៗ ដែលអ្នកធ្លាប់ធ្វើដាក់ពួកគេ។ ការគ្រាន់តែនិយាយពាក្យសុំទោស ដែលបានធ្វើឲ្យពួកគេឈឺចាប់ ដោយយកលេសមួយចំនួនធ្វើជាហេតុផល ពិតជាមិនមែនជាវិធីល្អនោះទេ។ អ្នកគួរតែសុំទោសដោយចេញពីចិត្តស្មោះពិតៗ ទើបអាចឲ្យពួកគេលើកទោសឲ្យអ្នកបាន។

២. ស្វែងយល់ថាហេតុអ្វីបានជាអ្នកធ្វើរឿងបែបនោះ

បន្ទាប់ពីសុំទោសរួច ពួកគេប្រាកដជាចោតសួរអ្នកវិញថាហេតុអ្វីបានជាអ្នកធ្វើរឿងបែបនោះដាក់ពួកគេ ដូចនេះអ្នកត្រូវត្រៀមខ្លួនឆ្លើយសំនួរមួយនោះ ដោយប្រើហេតុផលពិតប្រាកដ និងដែលអាចទទួលយកបាន។ ដូច្នេះអ្នកត្រូវព្យាយាមយល់ពីខ្លួនឯងជាមុនសិន ថាអ្វីជាកត្តាដែលជំរុញឲ្យអ្នកធ្វើបែបនោះ។

៣. ពង្រឹងទំនាក់ទំនង

មនុស្សដែលបាត់បង់ជំនឿនឹងក្លាយជាមនុស្សដែលការពារខ្លួនឯងគ្រប់ពេល ដូច្នេះពួកគេប្រាកដជាមិនងាយនិងសម្ដែងអារម្មណ៍ ឬចាប់ផ្តើមទំនាក់ទំនងជាមួយអ្នកដោយស្ម័គ្រចិត្តឡើយ។ ដូច្នេះអ្នកត្រូវទៅទាក់ទងពួកគេមុន បង្ហាញឲ្យពួកគេដឹងថាអ្នកជាមនុស្សបើកចំហ និងឲ្យតម្លៃចំពោះពួកគេខ្លាំង។

៤. ស្មោះត្រង់ ភាពស្មោះត្រង់ មិននិយាយក្រឡេចក្រឡុច និយាយបែបណាធ្វើបែបនោះ មិនលលេងអារម្មណ៍ពួកគេ អាចឲ្យអ្នកទទួលបានការជឿជាក់ឡើងវិញបន្តិចម្តងៗ តែបើអ្នកគ្មានការប្ដេជ្ញានឹងរក្សាភាពស្មោះត្រង់ទេ អ្នកក៏គ្មានថ្ងៃឲ្យយកឈ្នះលើចិត្តពួកគេម្តងទៀតដែរ។

៥. ទឹកចិត្តល្អ ភាពស្មោះត្រង់សំខាន់ តែទឹកចិត្តល្អប្រពៃរបស់អ្នករឹតតែសំខាន់ខ្លាំង ក្នុងការព្យាបាលរបួសដែលពួកគេធ្លាប់ឈឺចាប់កន្លងមក។ ការយកចិត្តទុកដាក់ ព្រួយបារម្ភ ជួយយកអាសា ដោយស្មោះអស់ពីចិត្ត យូរឬឆាប់ប្រាកដជាធ្វើឲ្យពួកគេផ្លាស់ប្តូរ និងត្រលប់មកចូលចិត្តអ្នកវិញជាក់ជាមិនខាន។

៦. អត់ធ្មត់

ធ្វើឲ្យចិត្តដែលខ្ទេចខ្ទីព្រោះការក្បត់ ឬកុហក ត្រលប់មកដូចដើមក្នុងរយៈពេលមួយយប់ សូម្បីទេវតាក៏មិនអាចធ្វើបានដែរ។ ដូច្នេះអ្នកត្រូវមានការអត់ធ្មត់គ្រប់គ្រាន់ ក្នុងការរង់ចាំ ដើម្បីទុកពេលឲ្យពួកគេព្យាបាល និងរៀនក្នុងការជឿលើអ្នកម្តងទៀត ៕