មនុស្សគំនិតអាក្រក់មកលើអ្នក១០ប្រភេទ ដែលអ្នកគួរងើយមុខអរគុណត្រលប់ទៅវិញ
- 2017-11-11 08:09:48
- ចំនួនមតិ 0 | ចំនួនចែករំលែក 0
មនុស្សគំនិតអាក្រក់មកលើអ្នក១០ប្រភេទ ដែលអ្នកគួរងើយមុខអរគុណត្រលប់ទៅវិញ
កូនសោនៃជីវិតគឺក្ដីសុខ។ បណ្ដាអ្នកប្រាជ្ញ ឬទស្សនវិទូជាច្រើនអ្នកតែងបង្រៀនយើងឲ្យធ្វើអ្វីល្អៗ ក៏ដូចជាបង្រៀនឲ្យយើង “ចេះអរគុណ” មិនថាជាការអរគុណមិនថាមនុស្ស សត្វ ធម្មជាតិ និងវត្ថុរបស់របរប្រើប្រាស់ នានាដែលបានរួមចំណែកនាំក្ដីសុខមកកាន់ជីវិតរបស់យើង។
រឿងមួយទៀតដែលយើងត្រូវចេះអរគុណ គឺបុគ្គលនានាដែលចូលមកក្នុងជីវិត ទាំងមនុស្សល្អ និងមនុស្សអាក្រក់ ដែលសុទ្ធតែផ្ដល់មេរៀនដល់ជីវិតរបស់យើង។ ដូច្នេះត្រូវចេះសម្របសម្រួលការគិតរបស់ខ្លួនដោយព្យាយាមរកមើលចំណុចល្អៗពីបញ្ហាដែលកើតឡើង និងអរគុណគេ។ អ្វីដែល កញ្ញា ចង់បង្ហាញក្នុងអត្ថបទនេះ គឺថាបើគិតដូចខាងក្រោមនេះបាន ជីវិតនឹងមានក្ដីសុខ៖
១. នៅពេលនរណាម្នាក់មិនចាប់អារម្មណ៍នឹងអ្នក គឺគេកំពុងបង្រៀនអ្នកឲ្យរស់នៅបានដោយគ្មានគេ។
២. នៅពេលនរណាម្នាក់ធុញទ្រាន់អ្នក គឺគេកំពុងបង្រៀនឲ្យអ្នក ផ្ដល់ពេលវេលាឲ្យខ្លួនឯងច្រើនជាងចំណាយពេលសម្រាប់គេ។
៣. នៅពេលនរណាម្នាក់សម្លឹងមកអ្នកក្នុងផ្លូវអាក្រក់ គឺគេកំពុងបង្រៀនអ្នកថា មនុស្សមិនបានមើលគ្នាលើទឹកចិត្តនោះទេ ប៉ុន្តែចូលចិត្តវាយតម្លៃយកៗដោយមើលតែសម្បកក្រៅ។
៤. នៅពេលនរណាម្នាក់ធ្វើឲ្យអ្នកអស់សង្ឃឹម គឺគេកំពុងបង្រៀនអ្នកថា កុំរំពឹងចង់បានអ្វីពីម្នាក់នោះឲ្យសោះ។
៥. នៅពេលនរណាម្នាក់ធ្វើបាបអ្នកពីក្រោយខ្នង គឺគេកំពុងបង្រៀនអ្នកថា កុំទុកចិត្តមនុស្សដោយមិនរើសមុខ។ ត្រូវចំណាយពេលស្គាល់គេឲ្យបានយូរគ្រប់គ្រាន់សិន។
៦. នៅពេលនរណាម្នាក់ ភ្លេចគុណរបស់អ្នក គឺគេកំពុងបង្រៀនអ្នកថា អ្នកណាមិនគួរជួយ កុំជួយច្រើនពេក អ្នកណាមិនគួរឲ្យ កុំឲ្យច្រើនពេក។
៧. នៅពេលនរណាម្នាក់រិះគន់បំបាក់មុខអ្នក គឺគេកំពុងបង្រៀនអ្នកថា មនុស្សគ្មានអ្វីល្អ គ្មានតម្លៃ និងគ្មានស្នាដៃ ចូលចិត្តបំផ្លាញអ្នកដទៃកម្រិតណា។
៨. នៅពេលនរណាម្នាក់រករឿងអ្នក គឺគេកំពុងបង្រៀនអ្នកឲ្យចិត្តត្រជាក់ជាមួយមនុស្សមានការគិតលំដាប់ទាបៗ និងចេះអភ័យទោសឲ្យមនុស្សមាននិស្ស័យមិនថ្លៃថ្នូរ។
៩. នៅពេលនរណាម្នាក់ផ្លាស់ប្ដូរចិត្ត គឺគេកំពុងបង្រៀនអ្នកឲ្យចាប់ផ្ដើមធ្វើខ្លួនឲ្យមានតម្លៃដោយមិនចាំបាច់ខ្វាយខ្វល់ពីគេ។
១០. នៅពេលនរណាម្នាក់មិនស្រឡាញ់អ្នក គឺគេកំពុងបង្រៀនអ្នកឲ្យ ចេះស្រឡាញ់ខ្លួនឯង។
អរគុណចំពោះអ្វីគ្រប់យ៉ាងដែលខ្លួនមាន តស៊ូជម្នះដើម្បីអ្វីដែលខ្លួនត្រូវការ ចេះសម្របខ្លួនឲ្យបានសមរម្យ នោះជីវិតនឹងប្រសើរឡើង។ អរគុណ!
ចុចអាន៖
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
