បើគេមិនធ្វើទង្វើ ១០ យ៉ាងនេះទេមានន័យថាគេមិនស្រឡាញ់អ្នកខ្លាំងគ្រប់គ្រាន់ទេ
- 2017-11-09 05:00:00
- ចំនួនមតិ 0 | ចំនួនចែករំលែក 0
បើគេមិនធ្វើទង្វើ ១០ យ៉ាងនេះទេមានន័យថាគេមិនស្រឡាញ់អ្នកខ្លាំងគ្រប់គ្រាន់ទេ
មនុស្សស្រីណាក៏ចង់បានក្តីស្រឡាញ់ខ្លាំងពីមនុស្សប្រុសដែលខ្លួនស្រឡាញ់ដែរ។ ធ្វើបែបណាទើបដឹងថាគេស្រឡាញ់អ្នកខ្លាំង? ងាយស្រួលណាស់ឲ្យតែអ្នកពូកែសង្កេត។ ប្រសិនបើបុរសម្នាក់នោះមិនបានធ្វើទង្វើខាងក្រោមនេះទេ មានន័យថាគេមិនបានស្រឡាញ់អ្នកខ្លាំងគ្រប់គ្រាន់ សម្រាប់ឲ្យអ្នកជ្រើសជាគូជីវិតឡើយ៖
១. ប្រាប់អ្នកថាអ្នកជាមនុស្សស្រីស្រស់ស្អាតបំផុត៖ ក្នុងកែវភ្នែករបស់គាត់ អ្នកគួរតែជាមនុស្សស្រីដែលស្រស់ស្អាតបំផុត ហើយគាត់គួរតែនិយាយវាចេញមក ព្រោះថាអារម្មណ៍ដែលស្រឡាញ់អ្នកខ្លាំង ពិតជាមិនអាចលាក់ទុកក្នុងចិត្តម្នាក់ឯងបានឡើយ។
**២. បើកទ្វារឲ្យអ្នក៖** មិនមែនគ្រប់ពេលរហូតនោះទេ ប៉ុន្តែម្តងម្កាលមនុស្សស្រីពិតជាចង់ឲ្យបុរសដែលស្រឡាញ់ខ្លួន ចាត់ទុកខ្លួនជាព្រះនាង។ បើគាត់ស្រឡាញ់អ្នកខ្លាំង គាត់ប្រាកដជាយល់ពីរឿងនេះ។
៣. ជួយជ្រោមជ្រែងឲ្យអ្នកសម្រេចក្តីស្រមៃ៖ មិនថាអ្នកចង់ធ្វើជាអ្នកនិពន្ធ ឬអ្នកចំរៀងទេ គាត់ព្យាយាមជួយអ្នកឲ្យសម្រេចក្តីស្រមៃនោះ។ ធ្វើជាហ្វេនអង្គុយស្តាប់អ្នកច្រៀងរាប់ម៉ោង ក៏គាត់មិនដែលរអ៊ូរទាំមួយម៉ាត់ដែរ។
៤. ដើរលេងជាមួយមិត្តភក្ដិរបស់អ្នក៖ ចង់ឬមិនចង់ ចូលចិត្តឬមិនចូលចិត្ត គាត់ព្រមទៅដើរលេងជាមួយអ្នក និងមិត្តភក្តិរបស់អ្នក ព្រោះគាត់ចង់ស្វែងយល់ពីអ្នកបន្ថែម តាមរយៈមិត្តភក្ដិទាំងនោះ។
៥. ព្យាយាមចុះសម្រុងជាមួយគ្រួសារអ្នក៖ គាត់ចង់ទៅញ៉ាំអាហារជាមួយគ្រួសាររបស់អ្នក ឬចូលរួមគ្រប់ពិធីខួបកំណើតសាច់ញាតិរបស់អ្នក ព្រោះគាត់ចង់ធ្វើឲ្យមានភាពស្និទ្ធស្នាល និងចង់ឲ្យអ្នកទាំងអស់គ្នាទទួលយករូបគាត់។
៦. ពេលណាត់ជួបគ្នាគាត់យល់ព្រមតាមការសម្រេចចិត្តរបស់អ្នក៖ពេលណាត់ជួបគ្នា គាត់យល់ព្រមធ្វើរឿងដែលអ្នកចង់ធ្វើទោះបីវាមិនមែនជាចំណង់ចំណូលចិត្តរបស់គាត់ក៏ដោយ។ ការលះបង់ដែលអាចឲ្យអ្នកមានក្តីសុខ បុរសដែលស្រឡាញ់អ្នកខ្លាំងប្រាកដជាមិនរារែកចិត្តនឹងធ្វើឡើយ។
៧. ថើបអ្នករៀងរាល់ថ្ងៃ៖ ប្រសិនបើគាត់មិនសូវបង្ហាញភាពស្និទ្ធស្នាលដោយការថើប ឬកាន់ដៃអ្នកទេ មានន័យថាគាត់មិនបានស្រឡាញ់អ្នកខ្លាំងគ្រប់គ្រាន់ឡើយ។ បុរសដែលស្រឡាញ់អ្នកខ្លាំង ប្រាកដជាចង់ប៉ះពាល់អ្នក និងថ្នាក់ថ្នមអ្នកស្ទើរគ្រប់ពេលនៅក្បែរគ្នា។
៨. នៅក្បែរនិងមើលថែអ្នកពេលអ្នកជួបទុក្ខ៖ នៅពេលអ្នកឈឺ គាត់ស្ម័គ្រចិត្តដាំបបរ ហុចទឹកក្តៅ ទឹកត្រជាក់ និងបំរើអ្នកយ៉ាងដិតដល់ ដោយមិនចាំបាច់ឲ្យអ្នកហត់មាត់ប្រាប់ ឬបង្គាប់បញ្ជាឡើយ។
៩. ឈ្លោះគ្នាជាមួយអ្នក៖ ស្តាប់ទៅដូចជាចម្លែក ប៉ុន្តែវាជាការពិត។ ប្រសិនបើអ្នកដើរលេងយប់ គាត់មិនដែលអើពើ ឬប្រចណ្ឌខឹងពេលអ្នកស្និទ្ធស្នាលជាមួយប្រុសផ្សេងទេ មានន័យថាគាត់មិនបានស្រឡាញ់អ្នកខ្លាំងគ្រប់គ្រាន់ឡើយ។
១០. គោរពអ្នក៖ ហិង្សាទាំងផ្លូវកាយ ឬផ្លូវចិត្ត គឺសុទ្ធតែបង្ហាញឲ្យឃើញពីទង្វើដែលគ្មានការគោរព។ បើអ្នកជួបមនុស្សបែបអ្នក អ្នកគួរជៀសឲ្យឆ្ងាយ។ ស្នេហាដែលគ្មានការគោរពគឺជាស្នេហាអពមង្គលបំផុត។
បុរសដែលស្រឡាញ់អ្នកពិត ប្រាកដជាធ្វើទង្វើខាងលើ ដោយមិនស្ទាក់ស្ទើរចិត្ត ឬសួរកហេតុផលឡើយ ដូច្នេះបើអ្នកបានជួយបុរសបែបនេះហើយ អ្នកត្រូវចេះរក្សាគាត់ឲ្យល្អ ព្រោះគាត់ជាគូគាប់ដែលអាចផ្តល់សុភមង្គលឲ្យអ្នកពេញមួយជីវិត។
ចុចអាន៖៣ យ៉ាងដែលអ្នកគួរដឹងបើមានដៃគូជាមនុស្សប្រុសវ័យចំណាស់