កុំរៀបការទាំងបង្ខំ បើមិនចង់មានវិប្បដិសារីក្នុងជីវិត

2017-09-26 12:00:00
ចំនួនមតិ 0 | ចំនួនចែករំលែក 0

ស្នេហាគឺជារឿងមួយដែលមិនអាចបង្ខំបានឡើយ បើមិនអីចឹងអ្នកនឹងរងសម្ពាធជាច្រើនដែលប៉ះទង្គិចលើផ្លូវចិត្ត អារម្មណ៍ និងការរស់នៅទៀតផង. ដូច្នេះបើអាចអ្នកមិនគួររៀបការដោយសារការបង្ខិតបង្ខំនោះទេព្រោះ ៖

១. គ្មានចិត្តស្រឡាញ់

មនុស្សពីរនាក់បើមិនស្រឡាញ់គ្នាហើយគឺគ្មានអារម្មណ៍ រស់នៅជាមួយគ្នាទេ។ ធ្វើអីក៏មិនស្បាយនឹងធ្វើ និយាយរួមគឺដូចបង្ខំអ្នកឲ្យញ៉ាំរបស់អ្នកដែលមិនចូលចិត្តអីចឹង វាពិតជាមិនស្រណុកចិត្តឡើយ ដែលឲ្យអ្នករស់នៅជាប្ដីប្រពន្ធជាមួយមនុស្សដែលមិនបានស្រឡាញ់នោះ។

រូបតំណាង

**២. មិនចុះសម្រុងគ្នា**

បើគ្មានចិត្តស្រឡាញ់គ្នា រស់នៅក៏មិនចុះសម្រុងគ្នាដែរ ព្រោះសូម្បីតែមនុស្សស្រឡាញ់គ្នានៅឈ្លោះ នៅមិនពេញចិត្តគ្នា ចុះទម្រាំនៅជាមួយគ្នាទាំងបង្ខំទៀតនោះ តើវានឹងទៅជាយ៉ាងណា? អ្នកស្រមៃមើលថាស្ថានភាពនោះវាយ៉ាងម៉េច? មិនដឹងចិត្តគ្នា ដូច្នេះនឹងអាចធ្វើខុស ធ្វើមិនត្រូវចិត្តច្រើន ហើយការអនុគ្រោះក៏មានតិច បែបនេះពិតជាពិបាករស់នៅណាស់។

៣. ដាក់សម្ពាធលើជីវិត

រៀបការជាមួយមនុស្សខ្លួនមិនស្រឡាញ់ជាសម្ពាធផ្លូវចិត្តដ៏ធ្ងន់ធ្ងរសម្រាប់ជិវិតជាមនុស្ស។ ការបង្ខំចិត្តធ្វើបែបនេះ វាដូចជាធ្វើបាបខ្លួនឯងខ្លាំងពេកហើយ ដូច្នេះបើអាចអ្នកគួរកុំទទួលមង្គលការអី ព្រោះវាអាចនឹងបំផ្លាញជីវិតដ៏ស្រស់ស្អាតអ្នកមួយ។

រូបតំណាង

៤. គ្មានសេចក្ដីសុខក្នុងគ្រួសារ

អ្វីៗសុទ្ធតែមិនបានធ្វើចេញពីចិត្ត តើរកសេចក្ដីសុខក្នុងគ្រួសារឃើញទេ? ភាពរីករាយក៏គ្មាន ឈ្លោះគ្នា មិនត្រូវគ្នាក៏ញឹកញ៉ាប់ ហើយបើធ្លាប់មនុស្សនៅក្នុងចិត្តពីមុនមកទៀត រឹតតែងងឹតឆឹងតែម្ដង ដូច្នេះទោះគ្រួសារនោះមាន ខ្ពង់ខ្ពស់យ៉ាងណាក៏ដោយក៏មិនអាចមានសុភមង្គលចេញពីចិត្តដែរ។

៥. ប្រឈមមុខនឹងការលែងលះ

រៀបការហើយតើមានមនុស្សប៉ុន្មាននាក់ចង់លែងលះនោះ? តែបើមានបញ្ហាមិនអាចដោះស្រាយ មិនអាចបន្តទៅមុខនោះ ទោះចង់ឬមិនចង់ក៏អ្នកត្រូវដើរដល់ផ្លូវនេះដែរ ហើយអ្វីដែលសំខាន់គឺមុខមាត់សាមីខ្លួន គ្រួសារ និង ចំណងកូនៗដែលពិបាកនឹងដើរចេញ។ ដូច្នេះបើមិនចង់ឲ្យរឿងនេះកើតឡើងទេ គួរកុំរៀបការទាំងបែបនេះអី។